Ayera riba Dia di Mama Tera durante un conferencia di prensa Minister di Naturalesa, Ursell Arends, hunto cu director di Santa Rosa, Nathalie Maduro y representante di Departamento di Asuntonan Economico, Zulema Erasmus, a lansa un campaña di Food Security.

Director di Santa Rosa, Nathalie Maduro, a splica cu e proyecto aki eigenlijk a cuminsa desde aña 2020 y e ta un cooperacion entre Santa Rosa y Departamento di Asuntonan Economico caminda cu despues di COVID-19 nan nota cu tin hopi interes cu a crece pa loke ta trata cuminsa planta back. Pero na mesun momento por a wak cu tabatin cierto limitacionnan y esey a haci cu a bin dilanti e oportunidad pa nan por ricibi fondonan di Union Europeo pa asina bin cu un plan.

Maduro a sigui splica cu na 2021 e departamentonan a logra haya un rapport concreto di kico tur ta e posibilidadnan cu por wordo crea na Aruba cu no solamente por aporta e seguridad di cuminda, pero alabes cu lo por crea oportunidad di negoshi

“Sigur awe pa Santa Rosa ta un dia caminda cu hunto nos ta mustra cu departamentonan por traha hunto y bin cu no solamente mensahenan, pero bin cu proyectonan cu a largo plaso Aruba lo tin beneficio di dje. Nos ta contento tambe di tin e apoyo di Minister Arends pa asina nos por no solamente lansa e campaña aki pero pa sigui traha hunto tambe ariba dje”, Maduro a expresa.

Zulema Erasmus, representante di Departamento di Asuntonan Economico a remarca tambe e importancia di e lansamento di e campaña aki y a elabora ariba kico e campaña ta encera. El a subraya cu Departamento di Asuntonan Economico y Santa Rosa ta cooperando hopi di cerca ya pa hopi aña caba y nan a trahando riba e proyecto di “Agripreneur”, un proyecto recien y e campaña nobo aki ta e implementacion di e plan di accion di e rapport di World Bank. Pa esnan interesa e rapport ta disponibel riba e website di departamento di asuntonan economico.

Erasmus a splica cu e idea pa e rapport aki a cuminsa recien ora cu Aruba tabata den e pandemia, ora cu hopi persona tabata sinti inseguridad pa loke ta cuminda y si lo tin suficiente cuminda den e supermercadonan na Aruba.

Departamento di Asuntonan Economico ya caba tabata den un proyecto hunto cu Union Europeo pa aloca fondonan pa temanan manera resiliencia y recuperacion of temanan manera cambio climatico. Di e forma aki nan a dicidi, hunto cu Gobierno di Aruba y hunto cu Santa Rosa pa aloca fondonan pa un rapport riba seguridad di cuminda traha door di World Bank.

El a menciona tambe cu e proyecto aki a wordo lidera un banda door di un persona local, Sr. Randall de Kort, un experto cu a yuda e expertonan di World Bank. Segun el a elabora locual nan a haci ta evalua e situacion na Aruba y trese recomendacionnan di con pa reforsa e sector di agricultura y pa reforsa e seguridad di cuminda.

“Asina a bin recomendacionnan manera Natalie a menciona caba, recomendacionnan pa companianan den e sector pa stimula mas compania, mas comercio den e sector di agricultura. Pero tambe a bin cu recomendacionnan pa e grupo cu a crece hopi lihe durante pandemia cu ta e personanan cu ta planta den nan cura di cas”, el a agrega.

Erasmus a indica cu for di e recomendacionnan aki nan a traha un plan di accion pasobra nan no kier pa e rapport aki bay perdi y asina Departamento di Asuntonan Economico hunto cu Santa Rosa ta trahando hopi di serca pa asina implementa e accionnan aki.

Prome cu e proyecto, Erasmus a menciona, Departamento di Asuntonan Economico, specialmente e unit di IDEA, un unit cu ta yuda companianan cu kier habri cu guia, cu informacion, tayernan etc. E unita aki tabatin diferente proyectonan conhuntamente cu Santa Rosa cu temanan specifico pa e agripreneur y den interaccion cu e agripreneur tambe tabata mira ki reto nan tin y asina tabata adapta e tayernan pa nan.

El a enfatisa cu ta esencial cu tin otro departamentonan cu ta wak e importancia di e sector di agricultura y ta contribui na esaki. Algun ehempel cu el a duna ta entre otro, duana ta duna excepcion riba impuesto di importacion pa productonan cu ta destina pa wordo utilisa pa negoshinan di agricultura, cria, pesca of cuido di abeha. Departamento di impuesto tambe ta duna incentivo cu e meta pa stimula e aumento di produccion den e sector primario y si un persona tin un compania NV of VBA e ta haya vrijstelling riba winstbelasting, inkomstenbelasting, BBO, BAVP, BAZV.

“Awe ta un dia hopi special, awe ta dia di mama tera y mi ta kere ta un honor pa nos por lansa esaki”, Minister Arends a expresa tambe durante e conferencia. El a sigui señala cu pa loke ta trata Ministerio di Naturalesa di cual agricultura, cria y pesca ta forma parti, nan ta mira esaki como un posibilidad economico cu tin oportunidadnan grandi pa Aruba.

El a enfatisa cu esaki no ta toca solamente Ministerio di Naturalesa, pero tambe e ta den cooperacion estrecho cu Ministerio di Economia y pa e motibo aki, el a subraya, cu e campaña aki ta un proyecto cu ta inter-ministerial, “di e forma aki nos ta haci e proyectonan aki posibel y cu esey tambe mi kier a gradici Minister Wever pa e cooperacion tambe pa por haci esaki”, el a bisa.

Minister Arends a ratifica cu e meta y compromiso ta pa sigui engrandece e industria di agricultura na Aruba y e compromiso cu Ministerio di Naturalesa tin ta pa e aña aki ta pa por presenta GAP y GMP caminda cu por yuda empuha y yega na e certificacion cu tanto e agricultornan ta desea.