Santa Rosa: “Miho bo paga un tiki mas y sa cu e ta un producto local y cu e ta saludabel”

Directora di Santa Rosa Natalie Maduro a bisa Bon Dia Aruba cu ora  cumpra berdura of fruta produci local, berdad por spera un costo mas halto cu ora e bin internacional. Esaki tin di haber cu e trabou cu e productornan ta hinca den e produccion. Mester pone den balansa e calidad y siguridad di cuminda den e caso aki.

“Ohala cu nos tin hopi comerciante cu ta produci riba un base mas constante, ainda ta wak cu tin cunukero ta chikito, pero pa motibo cu ta keda sostene nan y motiva nan por ehempel mustrando nan cu si  nan traha poco mas duro y produci poco mas hopi, nan ta haya mas cliente y ta evita cu mester importa asina hopi producto cu nos mes por produci na Aruba.”

Costo

Pa loke ta e prijs di berduranan, esaki ta den man di Departamento di Asuntonan Economico. Santa Rosa ta pidi si pa ora cu e cunukeronan bin bende nan productonan na Mercado di Santa Rosa, pa nan haci esaki teniendo e costo na un prijs rasonabel cu hende por paga. Di otro banda mester compronde si cu tin ora locual cu ta bin di afo ta un tiki mas barata cu locual ta wordo produci localmente, pero si bo wak bon e dificultad cu e cunukeronan tin pa haya awa. Tambe locual cu ta bin di afo no por wordo controla con el a  wordo maneha prome cu el a bin Aruba. Mientras cu na Aruba mes hopi biaha tin e control y bo por wak con el a wordo produci. P’esey tin ora ta miho bo paga un tiki mas y bo sa cu e ta un producto local y cu e ta saludabel compara cu uno di afo cu hopi biaha ta geneticamente modifica y hopi kimico a wordo uza riba nan. Mas nos sostene nos cunukeronan ta mas nan por produci, pasobra nan no ta hendenan  cu ta yega haya prestamo na banco. Hopi biaha ta di nan ganashi cu nan ta re inverti bek den nan plantacion.

Inversion Hydroponic

Tin hopi inversionista for di Sur America y Europa cu ta dispuesto pa bin inverti den sistema di Hydroponic na Aruba pero no tin dato of un model cu bo por presenta na nan ora cu nan bin Aruba pa wak si nan ta dicidi di inverti of no. Pues e ora ey  e rol di e comision ta pa por haci  cierto estudionan pa ora e hendenan aki bin tin esaki. “Personalmente ami ta desea cu nos inversionistanan local mes cuminsa pensa den e direccion ey y inverti den e tipo di proyectonan aki en bes di bay traha mas supermercado of restaurant, cual ta tipo di negoshinan cu tin suficiente di nan caba.” Awo con esaki ta factibel tambe ta  cu como gobierno mester sostene y motiva studiantenan cu ta cabando Colegio of Universidad pa nan busca un estudio den e direccion di Hydroponic, pasobra nos mester di experto aki tambe unabes cu bin sistema nobo. Mester tin hende cu e estudio cu por mantene esaki a termino largo, pasobra sino mester keda busca conseheronan di afo cu ta costa hopi placa, cual tampoco ta sostenibel. Tin scolnan awendia cu tin hopi experticio den esey. “Mi mes a bishita aña pasa na Washington DC un universidad cu ta enfoca hopi riba sistemanan innovativo.”

Mercado Santa Rosa

Santa Rosa ta informa tambe cu nan ta bay tin un mercado di Santa Rosa atrobe dia 3 di april y dia 22 cu ta dia di tera lo tin un dia publico cu mini farmers market cu matanan di fruta. Y e dia ey no ta bay cobra ningun cunukero e 25 florin cu ta cobra normal, pa para pa bende producto. Esaki lo bira un dia cu Santa Rosa lo duna bek na e cunukeronan, lo informa mas di e celebracionnan aki ora e dia ta mas cerca.