Mirando cu temporada di horcan a cuminsa caba, cual CMO y Meteo a pronostica cu ta bay ta un temporada di yobida mas intenso compara cu añanan anterior, departamento di Agricultura, Cria y Pesca di Santa Rosa kier encurasha piscadonan pa proteha nan boto y asina tambe informa nan di kico mester cuminsa haci pa prepara pa un situacion di calamidad.
Temporada di horcan a cuminsa dia 1 di juni y ta caba dia 30 di november, maske Aruba no a pasa den un horcan directo pa masha tempo no por descarta e posibilidad y por corda cu den pasado recien mes tabata tin tormentanan cu a bolter lama suficiente pa causa daño na pier y botonan di piscado na costa. Mester corda tambe cu den e area cu Aruba ta, ta 3 dia of menos di anticipacion so tin entre prome aviso pa e tormenta afecta e costanan.
Esey ta hopi cortico y tur hende por corda e caos cu por pasa aden e ora pa core haci tur preparacion, specialmente si mester busca of cumpra material, ma e motibo ey e preparacion mester ta di awo caba manera Santa Rosa ta indica.
No ta existi un solo plan cu ta pas pa tur situacion ni circunstancia, esey ta depende individualmente cada biaha di varios factor y cu ta specifico pa un situacion particular. P’esey, esaki ta e prome yamada pa traha plan(nan) di antemano, prepara material y otro cosnan necesario pa por ta un stap adelanta pa actua. Check di antemano cu instancianan necesario y zorg pa otronan sa di e plan aki y detayenan tambe pa caso di emergencia.
Aki ta sigui algun punto clave pa cuminsa bo pensamento y stimula bo cuminsa prepara di awo caba, por ehemplo, unda ta (bay) laga e boto? Un boto mara riba tera ta miho protegi semper cu uno den awa.
Si acaso no por saca e boto, mester di un luga protegi unda e por keda hancra. Sa di antemano si unda e boto ta mara ta adecuado y sino mester sa unda ta bay hibele pa si e por keda mara bon proteha. Corda cu tin 72 pa 48 ora so entre aviso y e tormenta su efectonan dal. Si ta bay saca e boto hiba tera, mester tin ekipo manera trailer, cabuya y otro material, cla prepara y den bon condicion, mester corda cu lo ta druk y tur otro hende tambe ta riba caminda cu na preparacion.
Mara e boto extra y zorg pa tin cabuya extra y mara e boto dobel, ta ser bisa cu e boto mester keda mescos cu ta den un cas di haraña e ta y mara 2 set di cabuya unda uno por ta mas largo cu e otro pa acomoda e extra haltura di awa y ola si mester. Si ta na tera, zorg pa e boto ta hancra na tera cu staca of renchi den concret. Si e boto ta contra un muraya e ta miho protegi door cu por lo menos 1 banda lo tin menos efecto di biento.
Santa Rosa lo sigui informa comunidad di piscado pa e preparacionnan aki pero ta importante pa cuminsa prepara for di trempan y presupuesta tur cos for di awor ora alarma di calamidad lo por zona.
Potret di ilustracion.
