For di algun luna caba por a disfruta di varios Pop-Up Market aki na Santa Rosa. Sigur nos bishitantenan a keda masha contento cu esaki ta tumando lugar cu mas frecuente.

Bishitantenan tabata tin e oportunidad di cana rond haci nan compras y sigui nan destino pa otro puntonan di benta cu tambe tabata den e mesun horario y riba diasabra. Pero toch asina mes varios di nos clientela ta keda puntra pa nos mercado grandi. Claro nos como departamento responsabel pa duna semper tur sosten merece na nos productornan local a dicidi cu pronto lo organisa un Mercado Santa Rosa grandi manera custumber cu gran variedad di stand. Ta simplemente e fecha mester a fiha y ranca sali cune.

P’esey diadomingo awo bo ta cordialmente invita pa haci nos un bishita den prome Mercado Santa Rosa grandi cu mas di 30 tent cu diferente product local produci. Nos ta cuminsa for di 9’or di mainta te cu 2 di atardi. Caminda cu bo lo bay haya fruta, berdura, productonan produci na Aruba manera Jam, Pica. Juicenan fresco, batido di fruta fresco. Cosnan dushi, Bolo den diferente sabor, Kuki y Tert. Den berdura nos tin lechuga fresco produci na Aruba, Comcomber, Mushroom. Carni fresco no por falta. E plato di cuminda crioyo pa completa e dia manera platonan di Pisca, Comcomber Stoba, Papaya Stoba, Sopi Carni, y un sin fin mas pa menciona di otro productonan cu bo lo bay haya unicamente den nos Mercado Santa Rosa diadomingo awo 2 di Juni cuminsando for di 9’or di mainta.

Manera semper nos ta haci un apelacion na tur esnan cu ta nos productornan invita pa por yega mas trempan posible pa haci bo setup y acomoda bo mes bou di bo tent concerni. Esaki ta debi cu e gostumbrado publico grandi cu semper ta bishita nos mercado por cana libremente haci su compras sin tin mester di wordo stroba pa autonan cu ta drenta y sali. Claro ta bon pa bo mes cu tin un of otro procducto na benta si bo tey trempan bo ta sigur cu bo lo bebe awa limpi y e bishitante tambe por haci su compra serca bo sin tin estorbo y sin mester di keda warda riba bo.

Un biaha mas ta recorda bo bin haci nos un bishita diadomingo awo 2 di juni for di 9’or di mainta den nos Mercado Santa Rosa cu un ambiente sin fin y familiar manera gostumber y haci bo compras y disfruta un rato di e ambiente cu nos so por ofrece bo.

Diadomingo awo 2 di Juni, no lubida nos ta ranca sali cu nos mercado Santa Rosa for di 9’or di mainta te cu 2’or dia atardi manera abo a pidi, y nos ta cumpli.