Ayera mainta, Departamento di Agricultura, Cria y Pesca, Santa Rosa Aruba, tabata anfitrion pa un grupo di delegado di Wageningen University, cu bishitando Aruba pa haci un estudio pa Gobierno di Aruba.
A traves di un publicacion ariba nanq pagina di Facebook, Santa Rosa a infora cu e grupo, cu a consisti di cuater miembro, a haci un recorrido den Santa Rosa y por a mira e diferente proyecto- y estudionan cu e departamento ta bezig cune, como tambe e diferente ekipo- y servicionan cu Santa Rosa ta encarga cune.
Despues e grupo tabatin e oportunidad pa bishita algun di e cunucunan local pa nan por a mira kico ta algun di e proyectonan exitoso cu Aruba ta conta cune pa loke ta trata agricultura. Nan a bishita Bee Haven Farm cu ta atende cu criansa di abeha pero na mesun momento ta planta producto nan agrario.
Despues nan a bishita Happy Ponics cuál ta un projecto Hydroponico cu ta produci un variedad di lechuga, cilantro, menta y hopi mas. Por ultimo e grupo a bishita e cunucu di Jimmy caminda cu nan a ricibi hopi informacion referente fruta, pero tambe nan por a purba un variedad di fruta.
“Nan a keda hopi impresiona cu Aruba ta conta cu proyectonan cu ta aportando na nos economia y seguridad di cuminda y cu a demostra cu hopi por wordo produci riba nos isla cu e conocemento y sosten nessecario. Union ta hasi forsa y ta importante pa por mustra mediante bishita nan asina, cu si tin futuro pa e Sector Primario di nos isla,” e departamento a remarca.
