For di varios luna caba Departamento di Agricultura, Cria y Pesca Santa Rosa a planea un campaña di conscientisacion riba seguridad di cuminda. Mundialmente hopi ta wordo haci pa loke ta seguridad di cuminda. Esaki ta pa e individuo por cuminsa pensa pa planta su propio alimento pa e por disfruta di esaki.
Logicamente esaki ta yuda economia tambe. Baha un poco pa loke ta nos importacion. Cumpra mas localmente manera cu semper Santa Rosa a bin ta promove y conscientisa. Unda cu Santa Rosa por a haci un of otro presentacion semper nos ta encurasha mas pa nos hendenan por planta mas pa nan por mas saludabel tambe. Esaki ta e idea principal di nos campaña di conscientisacion. Y no tabata tin mas mihor dia cu ta Dia di Tera pa lansa e tremendo campaña di conscientisacion aki.
Pa duna mas empuhe na nos campaña di conscientisacion riba seguridad di cuminda nos a acerca algun productor exitoso di Aruba pa forma parti di e comercialnan. E productornan exitoso aki ta den persona di e hoben Garvin Ras di Cocolishi Green; Darrel Koolman di Koolman Family Farm y Sr. Aldrich Croes, un personahe bon conoci den e mundo di media aki na Aruba y tin un pasion enorme pa cultiva su productonan pa propio consumo.
E produccion di e comercialnan aki tabata den man di Telearuba NV hunto cu Randy Maduro. A realisa tres tipo di comercial, cu tres diferente contenido y tres diferente mensahe.
Na e ocasion di lansamento di e campaña tabata presente Sr. Ursell Arends, minister di Transporte, Integridad, Naturalesa y Asuntonan di Adulto Mayor y di cual Sector Primario ta resorta, Sra. Nathalie Maduro, director di Departamento di Agricultura, Cria y Pesca, y Sra. Zulema Dabian-Erasmus di Departamento di Economia, kende a traha cu lasonan estrecho di cooperacion pa realisacion di e campaña aki.
E comercialnan aki ya caba ta pasando na nos planta nacional di television Telearuba NV y tambe lo bai scucha esakinan na mayoria Radio Stacion local.
