Sanna Marin di 34 aña di edad ta e minister di Transporte y lo huramenta pa bira e prome minister mas hoben den historia di e pais, ora e huramenta awe.
Riba diadomingo, Marin a gana e voto entre legisladornan social democrata, segun Reuters. Marin lo reemplasa e Prome Minister, Antti Rinne, kende a renuncia pa motibo cu e partner di coalicion, partido di centro, a bisa cu a perde confiansa pa e maneho di Rinne pa su maneho di un welga di trahado postal.
Prome minister electo a bisa periodistanan cu e tin ‘hopi trabou dilanti pa gana confiansa bek’. “Mi nunca a pensa riba mi edad of genero, mi ta pensa riba e motibonan pakico mi a drenta politica, y e cosnan pa cual nos a gana confiansa entre e votadonan”, el a bisa agencia di noticia Agence France-Presse.
Marin a mehora su posicion despues di lidera e conseho municipal di su ciudad natal industrial Tampere, ora cu e tabatin 27 aña di edad segun Reuters. E social democratanan ta e partido mas grandi di coalicion di 5 miembro di gobierno.
Marin ta ocupa e posicion top despues di vence e lider di e grupo parlamentario di e partido, Antti Lindtman. Sinembargo Marin no ta e unico lider mundial den su 30 aña di edad. E Prome Minister di Ucrania, Oleskiy Honcharuk tin 35 aña di edad y Prome Minister di New Zealand, Jacinda Ardern, tin 39 aña di edad.
E cinco partido principal den parlamento di Finlandia ta dirigi pa hende muhe, 4 di nan cu ta den nan 30 aña di edad. Li Andersson, 32, lider di ‘Left Alliance’. Maria Ohisalo, 34, lider di ‘Green League’. Partido di centro ta dirigi pa Katri Kumuni, 32 aña di edad y Anna-Maja Henriksson di 55 aña di edad ta lider di partido Pueblo Sueco di Finlandia.
