Pronto tur club nocturno mester cumpli cu regla y maneho nobo of enfrenta sancionnan hopi mas pisa manera ceramento di luga y perdida di permiso. Esaki minister Arthur Dowers di Husticia a declara ayera unda e ta desmenti faboritismo di su banda.

Den e ultimo temponan aki a sali varios reportahe riba rednan social relaciona cu clubnan nocturno cu no ta cumpli cu nan orario di cera. Na mas cu un ocasion autoridad a haya problema cu doñonan manera e incidente cu a bay for di man aña pasa na +297 Restaurant. Akinan ta referi na cierto casonan unda algun doñonan no ta respeta trabao di autoridad anto por a tuma nota tambe cu ningun sancion ta wordo duna.

Amistad cu doñonan
“Mi a mira tambe un publicacion den un corant unda nan ta sugeri cu minister di Husticia lo ta meti cu e hendenan aki. Mi ta spera cu nan lo bay over na rectifica informacion cu ta eroneo,” e mandatario ta comenta. Akinan e ta referi na un publicacion cu a sali den e corant Solo Di Pueblo ayera caminda ta para cu doñonan di clubnan nocturno tin mas poder cu e minister. Esaki referiendo na e luga Olde Molen cu polis a topa habri te cu 7’or di mainta ultimo fin di siman segun e publicacion di e corant. Algo similar a sosode den e caso di Chupitoz Shot Bar cu recientemente a habri su portanan na Palm Beach. A wordo comenta cu e doñonan di Chupitoz  y  +297 Restaurant ta den amistad cu minister y ta pa e motibo aki nan por cera ki ora cu nan kier. Reaccion cu Bon Dia Aruba a haya for di gerencia di Chupitoz, Maurice Neme algun siman atras tabata cu nan no ta ricibi ningun fabor politico for di ningun minister. Minister Dowers ta splica cu: “Pa ta hopi cla den esey, e orario di cera ta wordo determina door di minister van Algemene Zaken. Loke cu nos ta haci na Husticia ta controla si ta cumpli cu esaki of no. Na momento cu polis constata cu esaki no ta e caso y leynan ta wordo viola, nan ta pasa esaki pa Ministerio Publico cu dado momento lo cuminsa un investigacion. Esaki ta pa determina si e persona ta mina e siguridad y estado di derecho.”

Revocando permiso
Minister Dowers ta sigui bisa cu Cuerpo Policial ta haciendo un ‘tremendo’ trabao pa loke ta e controlnan aki y mayoria di luganan ta coopera. “Pero nos sa cu tin algun luga cu pa añanan largo no ta tene nan mes na ley. Ta pa e motibo aki tambe nos a dicidi cu lo bin un acercamento nobo.” E maneho ta bin for di e ministerio di Asuntonan General cu sosten di e Ministerio di Husticia.  E ta bisa cu e maneho nobo ta stipula cu tur negoshi mester cera pa 1’or di madruga den siman. Den fin di siman, tur esunnan cu nan orario di cera ta despues 3’or di madruga lo treci bek na 3’or. “E legislado mester a traha tur e permisonan nobo y despues cu tur hende haya nan permiso nobo anto e bieunan wordo revoca, tur hende mester tene nan mes na e reglanan aki.”

Sancion mas pisa den ley nobo
E tema aki tambe ta bin bek pa dilanti den e dialogonan cu ta tumando luga cu diferente ministerionan y departamentonan di husticia segun sr. Dowers. ” Mi a splica na un par di ocasion cu nos no ta sinti cu tur ora e ta efectivo pa bo keda bay y anto ripiti cerca e mesun grupo di hendenan kico ta e ley y maneho. Tur cos ta wordo buta riba papel awor akinan pa un dado momento nos bay over na bin cu sancionnan mucho mas pisa.” E ta bisa cu nan ta trahando riba un ley nobo caminda cu lo tin sancionnan mucho mas pisa cu a conoce te na e momento aki. Aworaki e sancionnan cu tin ta exigi un procedura largo pa cana y no mucho castigo segun e mandatario. “Nos lo bay over na un maneho caminda cu ta cera y revoca permiso sea pa tres of seis luna. Esey mi ta kere lo crea un efecto mucho mas pisa cu e caso den e momento aki.” Sin embargo e mandatario ta bisa cu algun luga cu no tabata tene nan mes na regla aworaki si ta cumpliendo cu tur regla debidamente.  “Minister di Husticia  no ta duna multa y no ta esun cu ta persigui esun cu no ta cumpli cu ley. Esey ta e tarea di Ministerio Publico pa determina y pone hende cana debidamente cu ley na Pais Aruba.”