ORANJESTAD – Diabierna mainta, CEO di Refineria di Aruba (RdA), Alvin Koolman durante un conferencia di prensa a dicidi di trece algun aclaracion, y te hasta speransa, rond di e proyecto di Citgo Aruba.

El a bisa cu nan a haya autorisacion pa seis luna mas di operacion pa caba e proyecto di e segundo fase di rehabilitacion di e refineria na San Nicolas.

Relacion cu Guaidó
Koolman a referi na e ultimo desaroyo cu a sosode despues di dia 10 di januari ultimo, ora cu Maduro a huramenta atrobe como presidente, despues di un eleccion cu a wordo condena internacionalmente como fraudulento. Pero tambe riba e decision di Asamblea Nacional pa institui Juan Guaidó como presidente interino, pa un proceso di transicion pa medio di un eleccion.

Hunto cu esaki, y pa garantisa fondo pa e gobierno di transicion, Merca a bin cu sancionnan nobo, cu no ta permiti pa placa bay Venezuela riba benta di combustibel na Merca. Den e parti tecnico y operacional, ta haci cu Citgo por sigui opera si ta sigui ricibi crudo Venezolano, pero e ta bay den un cuenta blokia. Si e ta sigui haya otro crudo cu no ta Venezolano, e placa tambe mester bay den un cuenta blokia.

Mirando e panorama aki, y mirando e structura di Citgo Aruba, Koolman a splica cu tempo cu nan a negosha na 2015, e plan tabata ta pa pone Citgo Aruba bou Citgo Petroleum. Pero na e mesun aña ey, ya caba Citgo Petroleum a laga sa cu instituto financiero no por pone un credito financiero riba nan, ya cu entrada y ganashi tabata destina pa e bonus cu nan a saca pa PDVSA Venezuela. E instituto financiero a indica cu Citgo Aruba no por cay bou Citgo Petroleum, sino riba PDVSA Holding

Reto financiero
Despues pa di siguiente fase, nan tin cu bay instituto financiero pa busca e placa. Pero debi na e retonan cu e regimen Maduro ta bou dje (pero tambe PDVSA y Citgo) ta dificil pa haya e placa necesario. E ta mantene e speransa cu unabes ta bin un cambio na Venezuela, e proyecto lo sigui ya cu e ta un di e mas importante pa Venezuela, pero tambe pa Aruba.

El a indica cu e facilidad cu nos tin den e refineria no ta uno di produci gasolin of diesel, sino cu e por bira un mehorado of upgrader di crudo. Un di e crudo mas pisa cu tin ta den e pais bisiña di Venezuela, e ta situa fraha di Orinoco na Venezuela. Nan tin un reserva grandi, y apenas nan ta produci 1.2 miyon bari. Mientras cu economia di Venezuela ta depende basicamente di produccion di crudo. Esaki ta haci -segun Sr. Koolman- un proyecto asina masha atractivo, ya cu nan no mester cuminsa di cero, sino rehabilita e refineria pa produci crudo adicional pa Venezuela. Esaki den tempo relativamente mas corto cu ora nan ta cuminsa cu un proyecto di nobo. Un punto cu ta haci e refineria di Aruba atractivo ta cu pa medio di inversion no mucho grandi -1.2 mil miyon dollar- nan por start e refineria.

P’esey Citgo Aruba a bin na remarca pa rehabilita e refineria como un mehorado of upgrader, pa cuminsa opera den un periodo di 4 aña, considerando e dificultad financiero cu for di inicio a wordo premira rond di e proyecto aki, door di e sancion nan imponi contra e regimen di presidente Nicolas Maduro.

Den un situacion mas faborabel, e rehabilitacion di e refineria aki tabata demanda alrededor di 18 luna so, segun e experto aki. Pa colmo, na augustus 2017 a bin sancion extra y tambe contra ehecutivonan liga na e regimen di Maduro, cu a haci mas dificil ainda pa haya e placa pa pone den operacion e refineria.

Sancion extra
Sinembargo, a pesar di e sancionnan aki, nan por a keda opera e proyecto di Citgo Aruba, pasobra nan a cay bou Citgo Aruba Holding, cu ta afilia na PDVSA Holding. E ta reconoce cu for di 2016, un di e retonan mas grandi ta si Citgo por haya e fiansa necesario pa pone den funcionamento e proyecto aki.

E sancion ultimo di 10 dia pasa ta bisa cu, paCitgo Petroleum por sigui financia e proyecto di Aruba, cu ta inclui e operacion, nan mester haya autorisacionnan, ya cu nan no mag di saca e placa di Citgo Petroleum mand’e pa Citgo Aruba Holding.

For di siman pasa, Koolman a declara cu nan ta deliberando hunto cu gobierno di Aruba, RdA y Citgo Petroleum, pa percura cu Aruba por haya e fondo necesario pa sigui e operacion aki. Tambe el a menciona cu den e proceso aki nan ta bezig tambe cu e grupo di Venezuela den e parti di transicion, pa percura pa e proyecto por sigui cana, a pesar di e situacion interno na Venezuela.