Den e dianan aki e discusion ta enfoca hopi riba e desaroyo, o redesaroyo di e tereno di refineria na San Nicolas. Esey tin su logica pero den e calor di e debate nos tin e tendencia di perde for di vista cu ta trata, den termino di desaroyo socio-economico, di un asunto hopi mas amplio. Realmente e discusion lo mester ta tocante e desaroyo integra di henter e parti oriental di nos isla, cu pa varios decada ta sclama auxilio… y no ta haya loke e mester.

Ta trata di e parti di e isla cu mas a deteriora desde añanan 60 caba, unda gradualmente Playa a cuminza tuma mayor parti di e desaroyo comercial, ademas cu mayoria di e servicionan gubernamental a keda concentra na parti pabao di e isla. E ciere di e refineria den añanan 80 a marca nada mas cu e golpi final di un proceso cu tabata anda pa varios aña. San Nicolas a perde importancia economico y seguidamente a haya e trato tambe di sucesivo gobiernonan cu tabata parce logico pero no ta. Manera nos a yega di trece dilanti na varios ocasion, cada gobierno di cualkier pais tin e sagrado deber pa traha riba e partinan di su teritorio cu ta kedando atras den e desaroyo general di e pais. Y esaki ta e fayo clave di e sucesivo gobiernonan, cu no tabata mira como nan tarea y obligacion pa mantene e ciudad na cierto nivel aceptable di desaroyo. San Nicolas no tabatin pakico keda atras, djis pasobra e refineria a cera. Sin refineria nos tabata papiando keto bay di un parti sustancial di nos poblacion, cu tabata yama e lugar ey nan hogar. Y por lo tanto tabatin derecho di tin un ciudad cu un nivel aceptable di por lo menos e servicionan gubernamental. Cu a resulta dificil pa mantene un nivel bon di comercio tin su logica, ora e poder di compra local a cay hopi, pa cual ta bira dificil pa mantene un bon nivel di tienda cu bon surtido, manera ta existi na otro banda di e isla. Sin embargo, di ningun manera ta hustifica cu no tabata mantene caya, henter e infrastructura pa cual gobierno(nan) tabata responsable a keda bay atras. No cu no tabatin intento di mehora algo, pero e esfuerzonan tabata demasiado poco y altamente politisa. Tabata parce cu San Nicolas no tabatin derecho riba nada, pero de vez en cuando nan por a haya algo, a base di e ‘benevolencia’ di tal o cual partido o politico individual.

Cu e manera di pensa aki, tambe masha rapido a perde for di vista cu pa realmente drecha algo structuralmente, lo mester haci algo mas integra y planifica. Y sigur ora e deterioro a continua tambe den e parti priva, manera e viviendanan cu a para bira ruina pasobra parti (grandi) di e siguiente generacion a bay di e lugar, cu consecuencia cu mas y mas e restonan di un pasado mas glorioso a keda pa domina e scenario, y no solamente den centro di ciudad, sino den tur bario. Awor, na aña 2020, no ta un cuestion di añora un pasado perdi, sino simplemente di e tarea di nos pa cumpli cu San Nicolas, pa cumpli cu nos pais. Y pa haci esaki nos mester cambia fundamentalmente e manera di pensa di nos comunidad y di gobernacion, cu ta basa riba tur sorto di cos, menos planificacion. No cu nunca esey tabata ausente, pero e poco intentonan cu tabatin a bay perdi, sin cu nan a laga sikiera algo atras.

Pa bolbe na actualidad; nos ta discutiendo awor kico lo mester sucede cu e tereno di refineria. Ey cada un tin su opinion y nos ta respeta esey, pero pa por tin un discusion sano, nos mester papia ‘fact-based’ si y no ignora hecho grandi nos dilanti. Y esey no ta toca solamente e posibilidadnan di uso pa e tereno ey, pero tambe loke mester ta e plan mas general, di unda nos kier hiba e ciudad aki den futuro. Y aki nos por mira cu e posibilidadnan di San Nicolas a keda reduci, pasobra no tabata contempla e lugar mes den otro proyectonan di Aruba. Por ehemplo, asina nos a ‘end up’ cu un waf di container minusculo, cu no ta apto pa ricibi barco di container mas grandi, cu e consecuencia cu nos por lubida di por sirbi como hub pa transshipment di container. Na San Nicolas keto bay tin e posibilidad pa un puerto di container grandi, cu por acomoda hasta tres barco di e tamaño mas grandi actualmente den uso internacionalmente. Ta papia si di un proyecto di ferry pa Corsou, pero no tocante e otro posibilidadnan cu por tin, y pakico? Pasobra na Aruba cada proyecto ta riba su mes, cu un ministro como ‘doño’ intelectual di esaki. Ora un gobierno ta opera manera un tipo di archipelago, cada un riba su isla, nos no ta mira nada di planificacion, y mucho menos di planificacion integra, unda no por ta asina cu cada mandatario ta hiba un negoshi semi-secreto, mientras ora nan sali bin afor cu nan plan ya cushina, ta spera di resto di comunidad cu nos ta aplaudi, y keda keto. Den e dianan aki, nos no ta sinti cu nos ta avanzando den esey.