San Nicolas ta bay… Mira mehoracion…?

Por observa bastante actividad riba tereno di intento pa reactiva economia di e parti mas deteriora di Aruba, San Nicolas. Esey ta di aprecia, aunke ta keda necesario pa evalua kico ta ser haci y con efectivo esaki ta.

Recientemente a tuma lugar por ehemplo un actividad pa stimula iniciativa di empresario hoben, cu a ricibi bastante atencion di medio di comunicacion. Tur esaki ta positivo, pero e pregunta cu ta keda ta, kico ta e cuadro general di accion pa mehora e condicionnan den cual e mehoracion di San Nicolas mester tuma lugar, y kico specificamente por haci pa e grupo di empresario potencial aki.

Mirando e situacion general di San Nicolas, cu a crece bira loke e ta awe durante ultimo decadanan, ta haya falta di un plan general di saneamento y mehoracion di San Nicolas. Esaki no solamente den sentido di mehoracion economico directo, sino tambe di re-urbanisacion y fortificacion di e cuadro di atencion social, cu ta sumamente urgente. E motibo pa esaki ta cu durante e deterioro economico di asina hopi aña, cos a bay robez riba tur tereno, entre otro riba tereno di cuido social y vivienda, asuntonan cu no ta bay remedia di biaha creando mas empleo so. San Nicolas tin un trayecto largo pa cana pa logra yega na un nivel aceptable di bienestar economico y social.

Esaki ta unda nos no ta tende nada di parti di gobierno y te awe nos no a mira un plan coherente y general pa atende desaroyo di San Nicolas den tur aspecto cu ta merece atencion. Mester bisa cu e critica aki no ta concerni primera ni principalmente e actual gobierno, sino cu ta un ausencia di planificacion integral di varios decada caba.

Un di e puntonan principal di critica tabata y ta ainda cu ta enfoca riba un par di asunto, manera e refineria, mientras no ta mustra di ta consciente di e hecho cu e problemanan di San Nicolas ta hopi mas diverso y amplio cu solamente trece un solucion pa e refineria, cu ademas tabata ser busca solamente, te awe ainda, den reactivacion di e planta. Y esaki ademas cu pa hopi aña ta bon cla cu net esey – reactivacion di refineria – ta un soño remoto. Sin embargo mayoria di nos politiconan ta keda cultiva e idea absurdo ey, cu no tin ningun base den realidad economico global, ni tampoco den realidad di e sector petrolero den nos region.

Bon Dia Aruba ta un di e poco medionan, tal vez hasta e unico, cu pa varios aña ta dedica atencion regularmente na e tema aki, a base di hecho y no a base di deseo politico sin hustificacion.

E situacion aki ta haci cu e ultimo intentonan pa mehora San Nicolas ta cay den un bashi, sin un rumbo claro unda kier hiba San Nicolas. Por observa naturalmente cu a opta pa trece turismo San Nicolas, loke ta un opcion cu por tin su betahanan, pero tambe tin pregunta cu a keda sin contesta. Por ehemplo, cu e actividad economico nobo ta tuma lugar pafor di San Nicolas – Sero Colorado no ta San Nicolas – y ta laga henter e problematica di e futuro di centro economico di San Nicolas sin atencion.

En corto bisa: bo por traha hotel na Sero Colorado pero cu esey bo no a tuma decision riba e refineria, cu ta e estorbo principal den e desaroyo di bida urbano saludable na San Nicolas mes. Pa duna un ehemplo concreto: pa un bon desaroyo turistico, si esey ta e escogencia, ta indispensable pa San Nicolas haya acceso na costa. Esey principalmente pa e parti na altura di Mainstreet, loke por duna e posibilidad di crea un ‘waterfront’ cu ta parce nos esencial pa desaroyo di horeca den e centro comercial antiguo. Di e manera aki por crea tambe un desaroyo urbanistico sano, fundamenta den conservacion y uso di loke San Nicolas tin ainda na edificio ‘art deco’ y en general e caracter Caribense di e ciudad.

Pero no ta trata solamente di desaroyo economico nobo, sea cu ta den horeca of no. E problemanan mayor di San Nicolas ta concerni e deterioro den e parti residencial, unda e desaparicion di hopi edificio y vivienda, pa falta di recurso o pa negligencia, ta pidi urgentemente pa rehabilitacion di e casco urbano di San Nicolas, envez di sigui duna tereno pa construccion den e areanan alrededor. Por cierto mester bisa cu algun tempo pasa e actual director di Infrastructura y Planificacion a toca e tema aki, pero despues nos no por a ripara mas cu e asunto aki tin atencion di gobierno.

A proposito, e problema di e no utilisacion di tereno den casco urbano di Oranjestad ta practicamente mes grandi cu esun di San Nicolas, unda tambe pa decadanan largo a duna prioridad na crece bay cu urbanisacion den tereno nobo, lagando e curazon di ciudad deteriora. Esaki no ta un fenomeno desconoci na otro pais; e diferencia ta cu cerca nos el a keda sin un respuesta, te awe.

Finalmente, pa referi na e actividadnan pa stimula iniciativa empresarial, por observa cu te awor no a mira cambio den e condicionnan general den cual empresa nobo y existente mester opera.

Un cuadro general di condicion mas faborable pa maneha un empresa, entre otro e regimen fiscal pa esaki, ainda ta wardando respuesta. Nos ta pendiente.