Despues cu a bira conoci e veredicto di hues di Corte Administrativo Lar siman pasa pa loke ta trata proyecto di compania Three Rives denomina “Secrets Baby Beach” cu mester para e construccion tanten lo keda pendiente di un resolucion nobo, ayera mainta San Nicolas Business Association a trece nan punto di bista dilanti di e tema aki den un conferencia di prensa.

Diasabra di siman pasa, Grupo di habitantenan di Sero Colorado mediante un comunicado dirigi na medionan local a informa cu pa ley e proyecto Three Rivers tin un permiso di construccion suspendi y como tal no tabata autorisa pa a sigui traha riba su proyecto di hotel Secrets Baby Beach.

Den comunicado ta indica cu hues di Corte Administrativo, Lar, Mr. W.C.E Winfield a considera cu e peticion di e ciudadanonan pa Lar bisa Gobierno pa suspende e permiso di construccion no ta necesario, motibo ta cu articulo 59 di e Bouw en woonverordening, Bwv, ta bisa cu na momento cu ta apela e permiso aki, mester para tur construccion pendiente di resolucion.

Sinembargo, ayera mainta miembronan di San Nicolas Business Association (SNBA) como Errol de Freitas su presidente, Joe Brooks vice-presidente y Rondel Heyliger tesorero, a dicidi di bin dilanti como asociacion pa expresa cu San Nicolas mester di progreso.

De Freitas a menciona cu e hotel cu mester habri pa november di otro aña ta encontrando un situacion atrobe cu pa nan no ta husto, mientrastanto cu e situacion aki ta existi actualmente tin otro tipo di hotelnan y otro construccion cu ta tuma luga ‘Pabou di Brug’ cu no ta haya ni 10% di e problemanan cu Secrets Baby Beach ta enfrentando.

Den comunidad di San Nicolas ta bin papiando di e frase “Why We Again” loke ta splica cu si no ta un, ta otro problema cu e districto ta enfrenta. Den pasado tabata papia di e tereno di refineria cu pa otro aña ta cumpli 100 aña “cu nos ta bezig nos ta purba di desaroya esey na un caminda cu lo ta algo cu lo ta sostenibel, pero akinan nos ta papiando di un hotel,” de Freitas a bisa.

Segun el a indica, ROPV a habri caminda pa duna San Nicolas un hotel “All inclusive,” pa ta e catalisado y trece un economia na San Nicolas, pa asina ey e area por tin trabou, oportunidad y felicidad atrobe.

Nan como asociacion a tuma e decision di keda keto un par di dia mirando tur e discusion cu tabatin den comunidad y incluso articulonan cu prensa mes a publica, pero De Freitas a bisa cu “ora bo trece conflicto, bo no tin caminda di combersa, bo no tin caminda pa yega na entendimento, bo no tin caminda pa bo surpasa e diferencianan y esey ta e caminda cu nos a scoge,” de Freitas a sigura.

Tambe el a indica cu Landspakket mes ta bisa cu nan mester zorg pa proyectonan pa trece un balans economico pa San Nicolas y pariba: “bo no sa of bo no ta ripara cu pabou di brug no tin e problemanan aki den sector hotelero—ni un hende ta protesta. Hotel ta sigui bin y nos no tin ni un problema cu esaki, pero esaki ta e ultimo frontera, esaki ta e caminda si cu ROPV a cay, pasobra pabou ta parce cu no tin ROPV, al caso cu den Colony ta e unico caminda cu shoco ta biba? Pero ni un hende no ta protesta, just pa e simpel hecho por e ta bin pa San Nicolas y atrobe mi ta pidi disculpa, mi ta un poco emocional pero, a nos ta deal cu e cos aki y a nos ta haya critica como un gremio comercial cu durante di e pandemia cu a tuma e aspecto social tambe, mayoria di nos hendenan ta traha pabou, con economia por florece? Tur e cosnan aki ta stanca y ta stop economia,” el a declara.

Nan ta haciendo studionan y nan a mira e hechonan cu na 2019 den e cumbre nan a trece e cumbre den cual nan a bisa cu “The time for San Nicolas is now,” pero segun el a sigura, nan a keda keto y no critica. E pensamento di nan ta cu nan kier bay “caminda e pueblo cu echt tabata t’ey pa Aruba, no solamente pa San Nicolas, cu awor ta pasando den su temponan dificil.”

Di mesun manera de Freitas a señala cu mester para keto un rato y ripara kico ta importante pa e districto di pariba.

Di loke ta trata e veredictonan di hues, tin shete cu a desbarata tur esaki y un so “cu a habri e pandora box atrobe” cu por tin un aspecto negativo no solamente pa San Nicolas, “sino pa e resto di e isla pa via di tussenvonnis cu nan ta bisa, cu bo ta shotdown un proyecto cu ta den pleno proceso, un proyecto cu a pasa tur cos den medio ambientalista,” segun el a splica.

Ademas, el a sigura cu nan ta papiando cu gobierno y ambos tin un bon relacion pero e simia ta planta y cu den proximo dianan nan ta bay convoca un otro rueda di prensa pa papia di e resto di e historia di e situacion aki.

Nan ta puntra nan mes ken ta bay responsabilisa su mes pa tur e dañonan aki? unda tur cos tabata bon studia manera el a bisa: “awor cu tur e construccionnan t’ey nos ta bay bishit’e pa tumb’e, esey ta lo cual e ciudadanonan aki ta pensa? Y mi no ta contra di nan, kisas si ami tabata den nan sapato mi tampoco lo no ta contento, pero nos tin cu pone un par di cos den perspectiva di kico ta efectonan di esaki,” el a bisa.

Pa finalisa, nan ta afirma cu nan ta den contra di e decision ultimo di hues pero nan no kier perde e bista di loke esaki ta nifica: “bo mester sinti con un pueblo, con un comunidad di e parti aki ta sinti. Cana den nos caya y keda bisa cu nos ta un ghost town, keda bisa nos cu bo no ta cana cu bo famia den caya principal pasobra e ta puro prostituta. Nos historicamente tin e prizon y tur e cosnan aki ta cana bisa como si fuera cu nos no tin un derecho di existencia. E cos aki ta basta serio pa nos y mi ta haya cu nos ta perde e bista riba esaki.”

Pa Grupo di habitantenan di Sero Colorado un di e puntonan di esaki ta cu parti di edificio di e hotel no ta cuadra cu e ambiente y e casnan den cercania, ta baha e calidad di aire y luz pa esakinan, y cu e construccion ta contra e ROPV (Planificacion Ordenanza Teritorial), cu regla e ROPV ta permiti 600 camber maximo y no 900.

Nan ta argumenta cu e ‘bouwplan’ a base di su ubicacion of sistema di construccion lo ta un estorbo grandi pa e ambiente, riba dje nan ta argumenta cu despues cu realisa e construccion, mirando e ubicacion y su forma of sistema di construccion entre otro lo kibra e bista y privacidad di e habitantenan. E plannan ta mustra cu e edificio ta hopi cerca di nan parcelanan y cu e edificio ta bay ta di diferente piso, esta lo ta un edificio masivo.