Recientemente, riba nan pagina di Facebook, San Nicolas Business Association a post tres potret unda por mira un pier den mal estado, cu e comentario: “Tur e discusionnan rond di ken ta beheer y ken ta doño que hubo pa un solucion?”
Mientras cu intencion di SNBA tabata parce di ta pa hala atencion riba e problema cu e pier pa asina instancianan concerni por tuma accion, comentarionan riba e post a dirigi critica directamente riba e asociacion.
“Si SNBA sa ken ta encarga cu piernan anto yama e instancia concerni, bo solucion ta pone aki riba pa otro hasie pa bo?” J.F. a cuestiona. Den mesun linea, J.N. a agrega: “Como SNBA bosonan no mester tin e informacion ey den boso database? Bosonan no mester ta na altura cu tur locual ta pasando na San Nicolas? E no ta e deber dje comunidad pa restaura e pier, anto si nos [tabata] por, mester permiso toch.”
Di su banda, Hilario Doncker, kende ta conoci den comunidad pa boga pa bienestar y desaroyo di San Nicolas, a comenta: “E Minister concerni mester tuma contacto cu Fundacion Parke Marino debi cu e Fundacion ta encarga cu e maneho di e area di lama cu ta pertenece na Seroe Colorado. Y na mesa lo mester yega na palabracionnan cu ta toca mantencion di e pier concerni y otronan cu ta na Rodgers Beach. Den esey lo mester haci palabracionnan cu ta toca e calidad di trabao cu companianan ta haci.”
SNBA a aclaria cu “Parke no ta encarga cu e lamanan sino e rifnan pier etc., pero mester bisa cu ta trata di 3 pier cu ta bandona pa demasiado y nada no a wordo haci.” Na final, Doncker a indica cu esey no ta cuadra cu berdad, consehando e asociacion pa tuma contacto cu Fundacion Parke Marino pa haya informacion amplio riba e topico aki.
Realidad ta cu tur rond Aruba tin cantidad di infrastructura cu gobiernonan consecutivo a laga sin atencion y sin mantencion, pa loke hopi di nan ta den estado deplorable. Y den esey, SNBA tin rason: tur discusion por bay riba ken ta carga e responsabilidad, pero na final, loke mester ta un solucion.
