San Nicolas Business Association (SNBA) ta pro reapertura di e apertura di refineria, teniendo na cuenta e impacto cu e lo tin pa Aruba. Tambe gobierno lo haya fondo cu ya no mester sali for di cartera di ciudadanonan. Andres Hernandes presidente di SNBA ta sigui splica.
“Como habitante y empresario na San Nicolas, nos tur lo kier wak San Nicolas turistico cu palo di coco, botonan entre otro. Sinembargo Aruba na San Nicolas no ta cla pa esaki.” E reapertura ta yuda San Nicolas, pasobra por lo menos 50% negoshi tabata habri e tempo aya y awo ni 10%. Cu refineria lo tin mas hende cu mester bay pariba di brug y cumpra algo na San Nicolas entre otro. Mas importante ta e importancia pa Aruba, e ta splica. Pasobra aworaki e refineria cu ya no t’ey no ta trece placa den saco di gobierno y ta pueblo ta pagando pa esaki. El a bisa cu tin varios plan a wordo presenta pa loke ta desaroyo na San Nicolas cu tambe lo ta bon manera esun di e waf y un ferry.
Pa loke ta e aspecto di salud, el a bisa cu e tin famia y mayornan y famia tur cu ta/a biba riba 80 y 90 aña. “Cu tin gas toxico malo ta posibel y no ta nenga esey, pero di otro banda sin e refineria ta bay caba pagando na belasting locual cu nos no por produci.” Riba un comentario pa loke ta e voto contra di refineria cu Presidente di Parlamento a duna, Sr. Hernandes a bisa: “Marisol tin rason pa motibo di e gas malo entre otro, pero no tur hende tin su salario.”
E ta un conflicto di interes cu na final e sobrevivencia di Aruba ta gana. Mester un forma pa gobierno balansa e presupuesto di gobierno, Sr. Hernandes a splica.
Departamento di Salubridad Publico (Despa)
Bon Dia Aruba a puntra Maribel Tromp di Despa si nan a yega di ricibi keho di personanan particularmente cu ta habita na San Nicolas pa loke salud. El a splica den corto cu hopi tempo pasa un bario specifico na San Nicolas tabatin keho cu a drenta di hopi hende cu garganta ta kima y problema cu halamento di rosea. Un rapport a wordo haci di esaki, sinembargo Sra. Tromp no por corda e resultado for di cabes y lo busca e documento aki pa por duna mas detaye di dje.
Unabes biento bira, tur casnan cu ta keda pariba di e refineria ta keda cu e problema di huma y holo malo.
Abogado John Zara
Algun aña pasa (2012) abogado John Zara a representa grupo di habitantenan preocupa a cuminsa cana caminda pa demanda e refineria Valero pa e dañonan di polucion. El a splica Bon Dia Aruba cu a stop cu e caso aki como cu el a perde contacto cu un persona cu tabata traha cun’e entre otro. Pero tabata buscando pa un refineria para responsabel pa e daño cu e ta laga atras despues di haci su operacionnan. Mirando e posibilidad cu un refineria por habri atrobe e no a dicidi ainda si ta bay habri e caso aki bek of continua cun’e.
Comentarionan ciudadanonan
Algun opinion cu Bon Dia a logra ricibi ta mustra cu hopi hende ta hopi cauteloso y tin duda di locual cu nan mes ta opina. Cautelosamente nan ta pone e aspecto financiero y salud den balansa. Comentario di Sr. G. Orman ta indica cu e pregunta di si ta pro un reapertura di refineria of no ta bin hopi den su mente, como e ta un persona cu a lanta na San Nicolas, den un bario un poco mas leu di e refineria. Asina mes tabata haya hopi molester ora cu biento bira y for di un subida banda di su cas e ta corda cu semper e por a wak un mist ta colga riba San Nicolas ora cu no tin biento. En berdad por bisa cu e refineria a yuda hopi famianan y economia di Aruba, pero esey ta pa short-term y no ta algo sigur cu semper por a conta cun’e. Di otro banda salud di famia ta long-term, pues e ta conta te dia cu bo muri. Asina mes bo yiunan su yiunan su yiunan lo keda haya contaminacion. Na final el a indica cu su pensamento ta mixto, lo tabata great si nan bin cu un proyecto cu ta mas saludabel y por duna mas cupo di trabou.
Comentario si Sr. S. Kock ta cuestiona mas e parti di si berdad lo tin cupo di trabou pa Arubiano y si nan ta bay gana locual cu tabatin custumber di gana antes.
For di un fuente digno di confiansa di nos matutino, kende ta habitante di San Nicolas henter su bida, tambe a expresa opinion mixto. E ta na altura di e molester c e huma tabata causa den su bario y tambe ora cu algun scol mester a cera algun rato pa motibo di e concentracion di huma den e klasnan. E ta mira tambe con cerca e refineria ta di un area habita pa hopi hende y den caso cu tin un explosion por ehempel, e chens ta grandi cu hende ta resulta herida. E fuente aki ta un persona cu ya ta hende grandi cu yiu y ta pensa awo tambe den e futuro pa loke ta salud di su yiunan cual eigenlijk e no kier pa lanta den e San Nicolas cu el a lanta aden. Den e mesun rosea aki e ta pensa riba e famianan cu pa algun aña caba no a logra recupera financieramente, cu reapertura di e refineria lo significa un bida mas miho pa nan den e aspecto financiero. Tambe e situacion economico/financiero di Aruba cu lo mehora unabes cu tin un refineria atrobe. Concluyendo su opinion el a splica cu e ta kere cu si bin un refineria, e mester ta algo a termino largo pa rond di 20 aña, Asina esunnan di 40 cu no tin trabou awo por traha y baha cu pensioen, y esunnan hoben cu cuminsa mester por planifica nan bida teniendo e cantidad di aña nan na cuenta. Mientras cu gobierno tambe ta haci bon planificacion pa despues di esaki (si e habri) no bin cu mas refineria.
