San Nicolas Business Asociation (SNBA) mediante su presidente Errol de Freitas a tene un conferencia ayera mainta pa trece dilanti un update tocante e caso di Secrets Hotel Baby Beach y ademas e 2nd San Nicolas Business Summit 2023 cu lo tuma luga otro siman.

“Say YES to Secrets” ta yama e accion di firma cu SNBA a cuminsa recientemente na unda nan ta solicitando na comunidad di Aruba en general pa firma y asina apoya e desaroyo di San Nicolas a traves di e construccion di e Hotel Secrets Baby Beach cu debi na varios caso den corte su construccion a haya incovenientenan pa por continua cu e realisacion di e hotel.

Den caso aki, ayera mainta De Freitas a menciona cu debi cu hopi hende ta bisando cu accion di firma no tin validez y pa De Freitas tin diferente cosnan cu tin validez, manera el a sigura bisando cu “hues ta tene na cuenta cu tur loke ta pasa den un comunidad. Si nos yega di hiba na HOF 20.000 firma, e no ta valido segun e ley pero e ta weita influencia di comunidad, con e comunidad ta weita e proyecto y mi no ta kere cu ni un hende cu ta biba den e districto di pariba cu no kier weita un progreso of un hotel pa trece un economia pa San Nicolas.”

E prome fase di e hotel tin un envergadura di 600 camber y 6 infinity pool, e prome cu lo ta bay ta All Inclusive y ta bay ta mas caro cu e otro hotelnan cu nan a construi caba, cual ta bay ta un di e miho 22 hotel cu nan tin mundialmente y ta bao encargo di Hyatt, segun De Freitas a comenta.

“Nos ta papiando di un economia directo y indirecto. Nos ta papiando di trabou, trabou pa hendenan den hotel, e doñonan a bisa nos dos aña pasa ‘laga e ciudad prepara su mes’ pasobra e ta nan intencion di stimula nan huesped pa sali, come y disfruta di e pueblo pasobra mas tempo nan ta afo mas nan ta gasta y den un aña nos ta papiando di 30 miyon y den tres aña 60 miyon cu ta bay cay den economia di pariba di brug cu ta bay tin su prome hotel,” De Freitas a sigura.

Pa e motibo aki, el a haci un peticion na e pueblo di Aruba y di San Nicolas pa purba di establece un catalisador pa San Nicolas na unda el a informa cu no ta cuestion cu e hotel no ta bin; e hotel ta bin pero e problema ta di e cantidad di casonan cu a ser entama door di un poblacion chikito caminda De Freitas a pidi na Gobierno di Aruba su abogadonan pa drecha e situacion pa cu e hotel aki y nan no lo haya mas reclamo: “Mi ta pidi tambe na abogadonan di gobierno pa splica huesnan e envergadura di e proyecto aki y kico e kiermen cu pariba di brug,” el a bisa.

Pa esnan interesa di firma pa apoya e proyecto aki, por subi riba e Facebook Page di San Nicolas Business Asociation (SNBA) y click riba e QR Code.

E desaroyadonan di e hotel lo ta na Aruba otro siman y ta bay ta presente den e 2nd San Nicolas Business Summit 2023 pa asina por reuni cu comunidad di Aruba y specificamente di San Nicolas pa contesta preguntanan y aclaria dudanan cu algun persona lo por tin riba nan proyecto.

Den su opinion, De Freitas ta declara cu pueblo di pariba di brug ta cansa, pero esey no ta di awor, sino di hopi tempo caba “nan ta cansa, historicamente ora bo ta weita di pariba ta traha un proyecto aki of aya, pero cu esaki e hendenan ta bay ta contento pasobra nan ta bay tin un trabou y un bida social, for di e ultimo cumbre cu nos a haci nos ta mira inversionistanan cumprando y otronan ta warda, nan ta warda Secrets, pero den Secrets nos tin dos cos negativo, e daño di perhuicio y cua ta bay ta e siguiente oportunidad pa San Nicolas, esey ta mi pregunta,’” el a comenta.

2nd San Nicolas Business Summit 2023 lo tuma luga otro siman
 De Freitas a bisa cu esaki ta un iniciativa cu a cuminsa na 2019 unda nan a haci e prome. Despues pandemia di Covid-19 a bin y esaki no tabata posibel mas. Awor nan ta bezig ta organisando e segundo, caminda nan como asociacion a crea e cumbre aki pa pone tur e atencion back riba mesa pa nan por sinta papia cu inversionistanan y nan por presenta nan proyecto pa e desaroyo y economia di San Nicolas.

Den e congreso tin oportunidad pa haci preguntanan y pa evalua, cu segun De Freitas a menciona ayera, tin inversionistanan cu no por avansa debi na permisonan na DIP: “Algo cu no ta awo, esaki tin añanan caba cu nan no por haya ni pa cas ni pa comercio. E ta increibel loke ta pasando cu nan no por cuminsa pasobra nan no tin ni tereno, pero no ta esey so nan tin mester di permiso pa traha, e ciclo di inversionistanan ta pega pasobra tur e departamentonan kier haci nan mes doño di esaki, ta e placa di e inversionistanan ta bay yuda nos,” el a sigura.

Pa loke ta trata e cumbre mes, pa dia 30 di augustus 17 compania, 7 di nan internacional cu ta bay ta presentando nan proyectonan.

Igualmente De Freitas a haci un yamada na esnan interesa pa inverti pa nan tambe presenta nan proyecto na e asociacion “pasobra nos kier pa comercio crece pariba di brug.”

Tabata augustus di aña 2019 ora ex-minister Otmar Oduber tabata presente den e cumbre aki na unda e tempo ey el a expresa cu “tocante e infrastructura di Baby Beach, el a presenta pa DOW un solucion lihe pa e area residencial, hotelero y pa centro di ciudad y tambe pa haci posibel cu den cinco minuut canando of den un golf cart, e turistanan lo por yega desde hotelnan y nan por sinti mas sigur. E parti mas importante ta cu bo lo bay tin 1.200 te 1.400 turista pa dia canando den area aki cu no lo t’ey awe, pero mas importante ta e hecho cu bo ta bay crea un cantidad di empleo back na San Nicolas”.

Pa finalisa, loke ta trata e parti di prostitucion tambe ta keda un topico relevante den area central di San Nicolas. Fen esaki, Andres Hernandez, ken tabata fungi como presidente di e asociacion, a expresa na 2019 cu nan tabata trahando riba esey y nan tabatin hopi idea pero cu tabata hopi dificil. Awendia, 4 aña a pasa y no por a mira mucho cambio den e parti aki.