Diabierna pasa, durante un conferencia di prensa cu miembronan di San Nicolas Business Asociation (SNBA) a ofrece pa medionan local, nan a splica cu lo kier ratifica algun tema cu tin di haci cu San Nicolas y pariba di brug.

Andres Hernandez, presidente, a trece dilanti cu na principio di aña 2019 nan a haya un yamada di diferente comerciante di caya principal di San Nicolas, aproximadamente 20, cu ainda ta habri tur dia nan portanan y cinco di nan a acerca SNBA pa bisa cu na final di aña nan lo cera nan portanan.

El a expresa, cu esey tabata algo hopi dificil cu nan no por laga bay. Tambe el a conta cu nan a haya diferente persona profesional di pabao di brug, di diferente sector, cu a cuminsa haci comentario positivo di e manera con nan por cuminsa crea of rebiba un miho San Nicolas.

Na februari, tur e miembronan di SNBA a bin cu un idea pa nan por uni tur e personanan ey y asina nan a crea un reunion cu e profesionalnan ey y tur otro di Aruba, pa duna nan idea di kico nan lo por haci pa renoba San Nicolas.

Di esey, el a menciona cu nan a haya un ‘metamorfosis’ cu a resulta den un Summit, cu ta un reunion mas halto cu un pais y gobierno por haci; esey tabata regarda 28 proyecto combina cu esunnan di gobierno y e propio inversionistanan.

Di e manera ey, Hernandez a señala cu siman pasa nan a haci un Community Gathering unda nan a informa pueblo kico a sucede den e summit y kico ta e proyectonan cu a bin afo. Nan a dividi e proyectonan den diferente parti cu nan a yama ‘posibel proyecto’. Un di nan tabata e plantacion di cannabis medicinal den un tereno masha grandi cu ta bin di Aruba Ports Authority di cual nan por haci uso.

Hernandez a comenta cu nan no ta kere cu riba e tereno ey por traha cas, pero pa proyecto industrial e ta hopi bon pa por realisa un desaroyo extra pa San Nicolas.

Di mesun manera, el a conta cu den caya principal nan lo tin e Barbershop cu ta di grupo Giannis, unda nan mes a informa cu na luna di februari nan lo cuminsa cu e construccion, cu lo trece un cambio masha grandi den e caya, segun Hernandez. Ademas, el a menciona cu otro di e proyectonan ta banco, cu na januari nan lo habri cu un inversion basta grandi.

Hernandez, a bisa cu nan como SNBA kier ratifica nan posicion y cu hende lo scucha den proximo luna di proyectonan real pa San Nicolas, cu lo duna trabao na hende y lo trece un economia diferente, esun mas grandi tabata presente diahuebs pasa, cu ta Hotel Secrets Baby Beach, cu lo tin 300 empleado y cu a bisa di lo emplea persona local y nan ta mira e proyecto aki como un ‘revival’ pa San Nicolas.

“Si nos no tabatin e hotel aki, mi no ta pensa tur loke ta sucediendo akinan por tabata posibel,” Hernandez a manifesta.

El a comenta cu tur e erornan cometi pabao di brug no lo ripiti pariba, no lo tin hopi tereno mas pa por haya 20 hotel mas manera a pasa pabao. El a declara cu nada ta toca e santo blanco pariba, e santo blanco mester keda liber, Hernandez a bisa.

“Awe, ministro di Turismo Dangui Oduber ta haci e groundbreaking di e cambionan cu nan ta bay haci na Baby Beach; San Nicolas mester bira un luga turistico, loke pabao a tuma 20 aña, pa nos lo tuma dos,” el a trece dilanti.

Hernandez a expresa cu nan lo sigui informa di kico ta pasando pariba, no solamente den turismo sino den tur otro aspecto, como por ehempel, comercial, aspecto positivo y negativo, den e situacion cu nan tin na e momentonan aki, cu ta prostitucion na San Nicolas cual lo keda converti den algo positivo.

Tocante Baby Beach, Hernandez a bisa cu no ta bay move ni un piedra, lo bay hiba aproximadamente 700 tonelada di santo blanco loke ta nifica cu ta bay extende 300 meter cu santo blanco y e renobacion di e piernan di Rodgers Beach lo tuma luga.

Di otro banda el a sigura cu den caya principal cu comercio lo bay ta pariba di brug, p’esey el a alerta e comerciantenan cu nan tin 18 luna pa prepara nan tienda y pa esunnan cu lo kier renoba esaki ta e momento pa wak kico ta haci falta den e zona pa percura cu tur esey lo ta disponibel.