Diasabra mainta San Nicolas a disfruta di nan parada grandi di carnaval pa asina dispidi di Carnaval 70. Un parada grandi yen di luho, creatividad, beyesa y sin lubida ambiente di carnaval manera Aruba so por celebra.
Un total di 10 grupo a participa cu mas o menos 4.300 participante ariba caminda y last lap. Cuerpo Policial a informa cu pa 9:59 di mainta Polis hunto cu SMAC a duna inicio na e Parada Grandi di San Nicolas.
Gruponan cu a participa, den secuencia, tabata, TOB Carnival Group, Infinity Carnival Group, Royal Carnival Group, Dushi Carnival Group, OPC Carnival Group, Colors Carnival Group, Champagne Carnival Group, Unity Carnival Group, Los Laga Bai Carnival Group y Empire Carnival Group.
Cabes di parada a yega Joe Laveist Sports Park back pa 2:40 di atardi y pa 7:13 di anochi e parada grandi di San Nicolas a yega su final.
Mester remarca cu yegando final di parada na dos ocasion polis a para e parada pa motibo cu tabatin buraconan entre otro gruponan y tabata kier a cera e buraconan aki pa asina e parada por yega completo sin buraco te final.
Parada a cana riba un ritmo un poco mas lihe cu normalmente sa ta e caso y pa algun persona esaki tabata un poco decepcionante ya cu varios a comenta ariba social cu e parada “tabata corre mucho lihe”.
Pero no obstante e comentarionan aki, Aruba en general a gosa y disfruta di un parada grandi cu hopi luho y beyesa pa celebra carnaval su di 70 aña.
Mediante un comunicado KPA a informa tambe cu e aña aki a conta cu 19 detencion. Entre otro pa: bringamento, no sigui ordo di polis, arma blanco (machete y cuchiu), posesion di droga y buracheria. Aña 2023 tabatin 14 detencion.
