“Mi ta usa hero cu mi mes ta busca pa mi recicla y duna nan bida nobo.” Asina Samuel van der Bliek ta mira cierto materialnan cu hopi hende ta simplemente benta afo.

Sam, manera e ta conoci, ta un Arubiano cu ta traha cu su man, ta crea producto local haciendo uso di material cu e ta ‘rescata’ di bay pa dump of ta keda benta den mondi.

Sam van der Bliek ta traha bou e nomber Tortugaforge cu a drent’e den un momento di inspiracion. “E nomber no ta nada special, mi djis kier a mustra cu mi ta di un isla, y pesey e nomber y mi kier a incorpor’e den mi trabou tambe, pa laga hende sa cu aki na Aruba tin hende cu ta haci e tipo di trabou aki y pa den futuro, si su trabou bira conoci, cu no solamente e nomber di Sam bira conoci pero sigur di Aruba tambe.”

Kico ta locual Sam ta traha

“Hopi hende lo yama mi trabou arte. Pero mi ta hinca hopi amor den mi creacionnan.” Y e creacionnan tin un funcion diario. Den otro palabra, e ta locual ta Ingles lo yama ‘functional art’ pero traha cu material recicla.

Sam ta colecta hero cu e ta haya benta afo, y ta dun’e un di dos bida. “Na Aruba nos no ta recicla hero manera otro pais. Nos no tin un smelter manera otro pais cu por procesa esakinan. Aki na Aruba, ta djis benta nan afo, e ta keda putri.”

Sam no ta considera cu e tabata un mucha artistico, pero si cu fantasia. Y e tabata haya forma pa traha su mesun artefactonan pa su imaginacionnan. “Mi ta un mucha cu tabata gusta fantasia, storianan di dragon, guereronan cu nan armadura. Pues ora mi tabata chikito, mi tabata pretende di ta eseynan.” Y e mucha cu su fantasia tabata traha su mesun spada di palo y tabata pasa hopi tempo den mondi den un mondi di fantasia. Su tata, un carpinte a yud’e tambe den e proceso. Tabata su tata kende a siñ’e con pa traha hopi di su mesun ‘co’i hunga,’ cu a permiti Sam haya e habilidad pa traha cu su man y sa e tecnica. “Mi tabata siña hunto cu mi tata y mi tabata pone hopi atencion y capta informacion con pa traha.”

Pero como mucha nunca Sam tabata pensa cu su profesion lo ta pa colecta material pa traha su creacionnan. “E actividad aki ta algo mas recien.”

Un cuchiu

E prome artefacto cu Van der Bliek a traha, como adulto, tabata un cuchiu mes. El a lesa tur locual e por a lesa riba e arte di manipula hero. “Pa hopi aña mi tabata lesa pa sa e tecnica y acumula conocemento, con pa haci e ‘craft.’ E prome cos cu mi a traha tabata un cuchiu cu mi a regala na un amigo cu te ainda e ta usa pa corta carni, por ehempel.”

Sam mayoria biaha no ta planea kico e ta bay traha, sino ta laga e material cu e recoge determina kico e por haci cune. Pero, si e mester di algo e ta mira kico tin pa e mes traha.

Por ehempel, e no ta bay cana den mondi pa busca material pa un stoel sin mas. Ta ora tin e necesidad y inspiracion, esey ta locual ta gui’e pa busca forma pa traha su stoel. “Mi a bay busca palo y mi a traha un stoel. Semper mi tabata un persona asina. Mi tabata semper trata di traha algo cu mi mester, en bes di bay cumpra. Mi semper tabata consciente cu nos forma di biba, no ta mucho sostenibel. Den e mundo di consumidor, tur luna kier algo nobo y prome inclinacion ta pa cumpra algo cu nos gusta cu ta produci pa un compania grandi cu ta produci miles di e mesun cos. Pa mi mesun bida mi a purba trece cambio den esey.”

Consecuentemente Sam ta lantando su mesun famia cu e pensamento cu nan mes por crea locual nan mester. Por ehempel, e mesa unda e tabata sinta pa duna entrevista, tabata uno cu el a traha cinco aña pasa. “Tabata palo, martiu y clabo envolvi y nada mas y ainda e ta bon. Nos ta us’e tur dia.”

Palo di mondi rosa

Mayoria su material ta locual otro hende lo a benta afo. E palo pa su mueblenan ta di palet y por combina cu palo di nos matanan local. Pero no ta cuestion di kap un mata, sino di busca e matanan rosa. “Ta rosa hopi mondi na Aruba, mi ta busca den tur e cantidad di mata kibra cu ta bay benta afo, pa mira kico mi por usa. Hopi biaha ta trata di mata di kwihi, y recientemente mi a cuminza usa palo di Wayaca, pero tambe di mata di Mango of Tamarijn. Tur ta depende si mi por haya un mata cu a kita caba.”

Sam ta admiti cu e ta haci dolor si pa mira cuanto mata grandi ta desaparece pasobra hende ta rosa mondi na cantidad. “Mi ta kere hopi ta mira esaki como progreso, sinembargo tin hopi edificio y cas bashi cu otro hende por usa. No mester di rosa sin mas.
E ta kere cu ademas cu ta kita hopi mata grandi, ta di lamenta cu no ta haci miho uso di e palonan mes. En todo caso, e ta contento si cu e por evita cu tur e matanan aki, e palonan bunita ta bira sas pasobra te ainda ta kima nan na cantidad. “Mi ta purba salba algo di e destruccion aki.”

Di otro banda, Sam no tin ekipo pa corta tronconnan y haci mas uso di e palonan. Tur su trabou ta na man y como tal, e palonan cu e ta ‘rescata’ ta e brasanan di matanan cu e por corta cu su mesun zaag di man. “Asina mi ta bay un taki, no mucho grandi ni mucho chikito y ta pon’e na mi cas. Cada biaha cu mi mester un pida, mi ta zaag e afo y traha locual mi mester. E ta un proceso cu ta dura y ta tuma hopi esfuerso. Pero e ta yuda mi, pasobra e ta tene mi activo. Pa mi e ta hopi importante pa hende por crea. Creacion ta un forma pa ‘destress’ y haci bida mas aceptabel.”

Ainda Tortugaforge , despues di 5 aña, no ta brinda Sam e posibilidad di biba di su creacion. Sinembargo aunke cu e no ta un negoshi ainda, e ta ripara cu mas y mas tin interes pe y e ta resa tur dia cu ta yega un momento cu e lo por biba di dje.