Sam Wine & Cashew Liqueur ta habri nan porta pa asina comunidad di Aruba por purba biña local. E tin diferente boter di sabor di biña, tambe persona lo sa cua ta e sabor di biña cu ta bay cu nan.

Samuel Lopez, doño di e compania ta bisa cu locual nan tin ta biña popular. El a haya su druif for di Surinam. “Nan ta yam’e Jambolan druif of Java Plum, e motibo ta cu e plum ta mas grandi cu tur otro druif.”

Lopez ta bisa cu nan tin mas potencial ainda, mirando cu e casca paden por traha un biña diferente. E ta splica tambe cu e proceso di fermentacion cu ta pone den e biña, ta haci cu e calidad ta comparabel cu cualkier otro biña cu ta bin di afo.

E ta comparti cu nan a actualisa nan mes. Nan tin sabor di papaya, banana, coffee liqueur na mesa y tambe ‘dushi rum’. E ta continua splica cu persona cu a purba por bisa di experiencia cu e ta un ‘algo di super bon calidad’.

Pa locual ta trata producto, Lopez ta bisa cu ta uza producto cu no ta obtenibel na Aruba ‘no cualkier hende por yega na nan’. Sinembargo pa fermentacion si ta tuma luga na su mesun local.

“Hopi hende ta papia di biña of licor, pero nos tin cu aclara algo cu ora nos papia di biña, hamas por papia di otro fruta cu no ta e druif mes. Biña ta bin di druif. Cu oportunidad pa un wine tasting bo por conoce bo smaak y holo”, Lopez ta splica.

Segun Lopez, no ta tur hende tin e mesun smaak y holo pa biña. E ta bisa cu manera un persona haci e wine tasting nan por haya sa esey, pa e motibo aki nan ta duna un ‘full tasting’ cu e persona ta haya for di cuminsamento.

E ta splica cu hende nan custumber ta pa ora nan bebe biña nan ta draai y pone bou di nanishi, e ta bisa cu tin 3 otro factor cu un persona tin cu sa prome cu e yega eynan. “E keuring, body di biña for di leu, e holo biniendo cerca y potencial di holo cu tin. Despues di esey ta yega na boca.”

Tin 3 factor prome cu bo bebe biña. Esey nan ta pone enfasis riba dje, segun Lopez, manera conoce e manera di purba e bebida, un persona por haci tasting na cualkier otro luga rond mundo.

Con e idea a cuminsa.
Sam Wine & Cashew Liqueur ta un compania local cu a nace di un pasion di Lopez, kende ta para patras di tur su producto di alcohol. Hunto cu su casa, nan dos hunto a logra di lanta nan luga y traha nan creacion.

For di hopi tempo e tabatin e idea den mente. E tin mas di 25 aña den e mundo di horeca. El a sigui su estudio na Hulanda den e mesun area. Tambe e tin su certificado den biña. Un punto importante pa locual ta trata e tasting, ta relaciona cu ‘e conocemento di etiket, label’. “Cu e diploma cu tin e persona por funciona manera un supervisor di un cafe of traha manager di un restaurant of hotel.

Oportunidad pa wine tasting.
Lopez ta duna di conoce cu e ta duna e basico na su luga cu ta keda na Macuarima 154 D. E ta haci’e cu grupo di 10 pa 13 hende, anochi cuminsando for di 6or y mey. E ta encera un ora pa cada sesion, pues despues di 6:30 pm ta sigui 7:30 pm, 8:30, etc. E ta bisa cu solamente ta traha cu reservacion pa asina nan tin control cuanto hende nan por tuma.

Pa cualkier persona cu ta interesa den cumpra producto bebida local por yama na 563-2222 y por cuminsa na tasting pa asina hende por ‘cera conoci cu biña y 8 licor cu mi tin’, di eynan hende pro scoge cua boter nan kier.

E tin cuatro diferente size di boter di 10oz (300ml), 12 oz (350 ml) y 700 ml (e tradicional) y un boter di 50 ml cu ta un boter chikito pa cualkier ocasion di regalo of saco di cuminda. Pa otro informacion of pregunta por sigui riba nan medio social Facebook ‘Sam Wine & Cashew Liqueur’.