Prome tabata e inmigrante Nicaragüense, despues e Haitianonan y awor anto e Salvadoreñonan. Gobierno di Donald Trump a dicidi di pone fin dialuna pasa na e Status di Proteccion Temporal (TPS na Ingles), un programa migratorio special cu ta evita deportacion, pa alrededor di 200.000 inmigrante Salvadoreño, segun fuentenan cita pa medionan Mericano.
E ciudadanonan Salvadoreño cu ta bao di TPS tin 18 luna, te september 2019, pa sali di Merca o haya otro permiso di residencia legal. Si nan no hacie, desde e momento ey, lo considera nan inmigrante indocumenta y por deporta nan. Hopi di nan tin mas di un decada na Merca. E anterior cancelacionnan di TPS a afecta hopi menos inmigrante: 59.000 Haitiano y 5.300 Nicaragüense.
E programa TPS a keda converti den un blanco facil pa e politica di man duro pa cu inmigracion di Trump. E Departamento di Siguridad Interior mester dicidi si ta renoba o no e proteccionnan aki di e programa, crea na 1990 pa concede visa extraordinario na ciudadano afecta pa guera o desastre natural.
E TPS pa El Salvador a inicia na 2001 despues cu e pais Centro Americano a sufri dos temblor devastador. E criticonan di e programa ta sostene cu a concebi esaki pa ofrece proteccion migratorio temporal y no permanente.
Pero e cancelacion lo tin efectonan traumatico. Por ehemplo, e miles di yiu cu e inmigrantenan aki a haya na Merca ta ciudadano Mericano, por lo cual, diferente cu nan mayornan, no por deporta nan.
Segun e Centro di Estudio Migratorio, tin 135.000 hogar di inmigrante Salvadoreño, ampara pa TPS. Como 88% di nan ta traha y un 10% a casa cu ciudadano Mericano. Un cuarto parti di e Salvadoreñonan ta biba na California y un quinto parti den e suburbionan di ciudad di Washington.
