Dianan di fiesta ta acercando, un temporada den cual hende ta come y bebe sin tene cuenta di nan salud. Bon Dia Aruba a papia cu Sheryl Arends-Croes kende ta nutricionista y ta traha na Ibisa, pa e duna algun conseho pa tene na cuenta cu estilo di bida durante dianan di fiesta y despues.

Come saludabel y haci ehercicio regularmente ta e manera pa controla peso manera mester ta, asina Arends-Croes ta splica. “Nos tin cierto programanan anto nos ta midi scol basico, nan peso, BMI, nan haltura y di eynan nos ta haya sa si nan tin sobrepeso, obesidad, of si nan peso ta mucho abou tambe.”

Na e parti di 18+ tin departamento di deporte y departamento di salud. Deporte ta maneha cu tur e cosnan deportivo, sport pa ta activo. Nan ta haci e parti campamento pa asina por pisa e personanan y di esey ta saca conclusion si e persona ta normal, obeso of cu peso abou.

Nan ta haci charla y lectura conhunto cu DVG, pa asina trece dilanti diferente temanan cu por toca cu e hendenan; por ehempel, desayuno saludabel. “Kico ta un tayo saludabel? En bes di keda come pastechi, miho opta pa algo simpel y barata manera pindakaas, e ta mas barata, mas saludabel pa e mucha y tin mas nutriente.”

Ta importante pa incorpora mas ehercicio den bida rutinario. Por ehempel: Cana na luga di uza auto pa un distancia cortico, rek y relaha musculo ora di haci trabou diario, para e auto un poco leu y cana e resto. Uza trapi y evita lift. Otro actividad cu por yuda ta baila, chapi cura, bay cana den naturalesa of bay landa.

El ta informa cu por lo menos 5 bes pa siman pa 30 minuut cada bes mester haci ehercicio. Participa den algun deporte organisa of recreativo manera futbol, baseball, tennis, ciclismo of gymnastiek/ aerobic, pero keda activo. Comemento no saludabel ta vincula na factornan di riesgo pa locual ta desaroyo di condicion di malesa cronico, manera problema di curason, presion cu colesterol halto, diabetes tipo 2 y algun tipo di cancer ta relaciona cu sobrepeso of obesidad.

Arends- Croes ta bisa cu cada persona, nan mesun curpa ta detox su mes. E ta remarca cu ora un persona cuminsa come mas saludabel y ta cuminsa stop cu e cuminda manera ‘junk’ of no saludabel, e malo ta cuminsa sali di e sistema di e persona, hasta cambia e smaak di e cuminda.

Si un persona cambia su cuminda rapidamente pa fruta, e curpa mes lo pidi pa sucu; sucu di refresco of producto cu e persona tabata come/ bebe constantemente. Sinembargo, si stop di consumi producto cu sucu y cuminsa come producto natural, ‘e curpa lo custuma cu tempo, e smaak pupil ta bira limpi, asina por disfruta berdura, fruta cu antes no tabata smaak satisfactorio’.

E ta agrega cu e proceso ta bin si e persona mes dicidi di haci e cambio pa un bida mas saludabel. E detox, e curpa mes ta hacie. El a bisa cu tin hende cu kier baha peso de inmediato pa asina cuminsa wak e resultado di nan curpa. E ta remarca cu ‘magic pill’ no ta existi.

A puntra Arends- Croes tocante persona cu ta asina desespera pa baha peso, cu sa bay botica pa cumpra un tablet of laxante, pa asina nan por bay af constantemente pa saca e sushi, e vet cu nan tin den nan curpa.

E ta splica cu sistema digestivo di cada ser humano tin bacteria, cu ta necesario den curpa pa momento cu ta bay digeri. E ta continua cu ora un persona flush of uza laxante, kico cu ta, e curpa ta saca hunto e bacteria ey. “Cu despues di tempo cu persona ta haci esey, tin consecuencia cu e bacteria saludabel no ta eynan mas.” Esaki ta hiba na problemanan cu digestion.

Arends- Croes ta bisa cu si no tin e bacteria saludabel mas, e ora e persona tin cu uza probiotico, tambe por trece problema cu bo sistema paden, esta bo organonan. E ta agrega cu tin cu para completamente cu laxante. E ta bisa cu tin cosnan natural, manera chia seed (cu vet saludabel), come mas fibra pa bay af y ta bay bon den sistema digestivo.

Sinembargo e ta expresa cu si un mucha/ hoben of adulto ta keda cu bariga cera, ta bon pa wak kico ta come pa asina busca otro opcionnan di cuminda. “Manera pan blanco of si ta come riba caya por trece consecuencia cu no por bay af. E ora ta bon pa cambia pa pan bruin, pa asina por nota un diferencia, tur cos ta vincula na comemento.”

Algun tip cu Arends- Croes ta duna pa por baha di peso, ta pa persona come tres biaha pa dia un cuminda. Desayuno, cuminda di merdia pa e ta cayente, y atardi. Den e cuminda di merdia, e ta bisa pa come mayoria berdura. Tambe e ta bisa pa come por lo menos 1 pida fruta, pa haya vitamina. Y bebe mas o menos 4 glas di awa, alabes cu ta ‘minimalisa uzo di vet’.