Minister di Turismo, Salud Publico y Deporte, Dangui Oduber recientemente a presenta su vision pa cu salud mental na Aruba pa aña 2019-2024 na tur instancia cu ta traha riba tereno di salud mental y adiccion na Aruba.
Segun un comunicado di gobierno, e vision di Oduber ta encera cu cuido di salud mental mester ta integral y accesibel pa un y tur caminda muchanan, hobennan y adultonan cu problema mental ta ricibi ayudo mas trempan posibel. Asina ta evita cu e problema por escala y/of bira mas dificil pa maneha of trata. E meta di Oduber ta pa tur ciudadano cu problema mental of adiccion haya e yudansa pa cu nan necesidad.
E vision ademas ta dirigi na reconoce e problema di adiccion como un problema mental asina esunnan cu ta sufri di e malesa aki por haya tambe e ayudo necesario. E meta principal ta pa crea perspectiva y cuido di calidad pa e hendenan cu ta sufri di un of otro malesa mental. E vision aki ta cuadra cu loke PAHO y WHO ta indica caminda adiccion ta wordo reconoci como un problema di salud mental por locual e ta un materia di Salud Publico.
Oduber ya caba a inicia diferente programanan cu danki na e fondonan di Sociaal Crisisplan por a wordo realisa. Esakinan ta entre otro, introduccion di FACT team/cuido ambulatorio pa muchanan y hobennan cu problema mental, programa di conscientisacion di e risiconan y efectonan di adiccion pa muchanan den 5 de klas basico cu ta yama B-Smart cu ta wordo ehecuta pa FADA, investigacion nacional pa cu uzo problematico di substancia, revisa fondonan destina pa tratamento di adiccion y tambe training pa profesionalnan den cuido di salud mental pa asina ofrece un cuido di calidad. Minister ta kere cu e vision aki lo stimula tur cu ta traha riba e tereno aki pa traha mas hunto pa asina logra calidad di cuido halto pa esunnan cu mas mester di dje.
