Salubridad y partnernan: Preparando campaña di limpiesa cu ta rekeri participacion di comunidad

Departamento di Salud Aruba (Despa) a yama conferencia di prensa hunto cu minister encarga cu Salud pa informa riba e situacion di Zika. Actualmente tin 4 caso confirma cu ta importa y no tin niun caso local (transmiti aki mes). Un biaha mas e profesionalnan a enfatisa riba prevencion y conscientisacion.

Sr. Schwengle a mustra riba e con importante e ta pa controla pa e sangura cu ta transmiti e virusnan Dengue Chikungunya y Zika unda cu e enfoke ta keda pa preveni. “Esaki por cu ayudo di pueblo aunke cu e ta responsabilidad di gobierno. Como persona ora cu abo no tene bo cura di cas limpi, bo ta promove malesa pa bo y bisiñanan.

Sra. Maribel Tromp a anuncia cu tin 64 aviso desde december te cu aworaki cu a drenta pa loke ta casonan sospechoso di Zika di cual 30 di e personanan aki ta personanan cu a biaha recientemente. Mientrastanto 22 muestra a bay afo pa test y ta spera di ricibi nan pa mañan pa mira si tin mas caso confirma na Zika. Banda di esaki te cu aworaki tin 4 caso cu a wordo confirma cu ta importa, Segun Sra. Tromp. Automaticamente Aruba ta bay riba e lista di World Health Organization (WHO) awor si, indicando cu tin caso importa di Zika. E casonan aki ta trata di hendenan cu a biaha pa Venezuela, Colombia y Brazil. “E personanan aki y tur otro caso sospechoso di Zika ta pasa di biaha den e protocol cu salubridad tin aworaki cu ta encera e spuitmento di e cas y bario. GKMB a duna di conoce cu e index di sangura adulto ta mas abou, cual kiermen cu transmision di virus tambe ta bay mas poco poco.”

Pa loke ta e parti di biahero unda cu tin 4 caso importa, ta enfatisando riba e medidanan di precaucion pa esunnan cu ta biaha, “Esaki ta un parti u ta keda stress riba dje”. Ta recomenda nan pa uza repelente y purba di no wordo pica (uza carson y blusa manga largo) pues prevencion ta keda mescos.

Campamento

Drentando e temporada di campamento salubridad ta conseha  mescos cu e temporada di carnaval unda cu lo tin hopi hende concentra riba otro, pues pa evita di wordo pica. “Berdad ta cu e areanan cu personanan ta campa sa tin sangura, pero no ta tur esakinan ta Aedes Aegypti cu ta transmiti e Zika, Dengue of Chikungunya, pero no por kita afo cu mester keda tene precaucion. E campaña di limpiesa lo atende cu e conscientisacion pa e temporada aki tambe,” Algun opcion mas ta uza contra sangura ta e racket pa mata sangura y uza net contra sangura. Finalmente si bo ripara cu bo tin mucho molester di sangura na e sitio di campamento, bo mester evalua si bo ta keda eynan of salud ta mas importante special pa mucha chikito, hende na estado y hende mas grandi, Sharlin a bisa

Transmision persona pa persona

Bon Dia a puntra Sr. Salazar tocante e posibilidad pa haya Zika via relacion sexual y con preocupa mester ta pa esaki. A uza e ehempel mas recien di e caso raporta na Dallas, Texas, el a bisa cu e departamento di laboratorio eynan a haci cierto testnan entre otro di sperma di e hende homber pa detecta virus unda cu a haya particula di nan. “Den e contexto di un epidemia kiermen ora e tipo di virus aki of otro tipo di virus infecta e curpa humano e ta plama naturalmente. E ta bay den scupi, sodo, den tur e organonan entre otro y despues e ta sali for di e sistema danki na nos curpa su defensa. Esaki kiermen cu si un persona tin Zika y nan ta haci un test di scupi of orina e ta bay sali positivo como cu e ta plama den e curpa. Sinembargo esey no kiermen cu e ta transmiti esaki ora ta duna un sunchi of si ta bebe for di e mesun copi etc. Pa mamanan cu ta duna lechi di pecho, e virus ta presente den e lechi pero e mucha no por haya e virus Zika for di dje.” El a enfatisa cu e unico opcion ta e vector Aedes Aegyti, pasobra esey ta su ciclo biologico pasobra e ta replica, crece y desaroya den glandula den e sanguranan y no den nos sistema.

Segun Sr. Salazar motibo cu te cu aworaki a contene e casonan di Zika na Aruba ta pasobra desde december cu hende a bira malo tabata wak si ta Dengue Chikungnya of Zika y actua. Departamento di malesanan contagioso ta check si tin otro hende malo den circulo di e persona sospecha, di unda e ta bin, kico e malesa ta y riba e mesun dia e departamento di control di vector ta haci su trabou di inspecta, elimina, spuit y conseha hendenan cu mester keda liber di cria di sangura.

Minister di salud publico hunto cu Prome Minister y minister encarga cu infrastructura a reuni den un grupo pa haci un campaña unda cu henter comunidad mester participa (Sector comercial y scolnan tambe). Den e campaña aki lo enfoca pa ruim op tur obhetonan cu tin di haber cu potencial cria di sangura. E plan aki a den preparacion y por medio di esaki lo conscientisa comunidad mas y kisas lo por hasta yega na algo cu otro paisnan no tabata por, cual ta mantene e isla liber di e sangura y virus. “E por bin importa, pero e ta keda eynan”

Mas green, menos toxico, miho efectividad

Ya pa algun tempo no ta uzando e spuit cu holo fuerte mas (kerosin). Actualmente tin un spuit/ insecticida cu ta mas green, esaki kiermen cu e no ta manda mesun efecto toxico cu esun anterior cu ta uza kerosin. Esey tabata wordo uza pa intensifica e insecticida pa mata e sangura. Banda di cu GKMB ta traha hopi den marduga hende no ta sinti holo mas como cu e spuit no tin holo. Kerosin ta toxico y hendenan cu ta malo caba cu problemanan cronico lo por haya mas problema.

Sr. Salazar a termina bisando pa pashentnan cu tin sintomanan di sospecho pa por fabor manda nan test. Kiermen si un persona tin keintura of rash mester tuma accion di notificacion di biaha pa evita un daño mayor. Pa dokternan cu ta duda por yama DBZ y comunica esaki pa wak di ta caso sospechoso of si tin mas cu un caso den un cas.