No ta sancion sino collapse di PDVSA ta e causa
Porfin e confirmacion cu nos tabata anticipa di basta tempo a drenta: Citgo ta laga sa cu nan mester ‘slow down’ e preparacionnan di e proyecto di rehabilitacion, pa motibo di e sancionnan Mericano cu ta haci dificil pa haya financiamento. Esey por ta parti di e berdad pero no e berdad completo. E proyecto tabata destina pa fracasa hopi tempo prome cu esey. Y esey tabatin tur cos di haci cu e deterorio gradual den henter e consorcio di compania cu ta propiedad di Petroleos de Venezuela S.A. Desde e momento di firma e famoso documento di 2000 pagina na Palacio Miraflores, na juni 2016, a cuminsa un caminda di cruz cu tabata duna e impresion cu berdad Pdvsa a bay di acuerdo cu inicia e proyecto, pero cu ainda nan no tabata sa ta con ta financia e baina. Un dia despues di e firmamento, Citgo Petroleum Corporation a manda un comunicado di prensa, cu nan no ta responsabel pa e proyecto pa loke ta financiamento, pero cu nan ta duna nan colaboracion tecnico.
E asunto a keda drag on te fin di aña, te cu a firma un acuerdo cu tres contratista cu tabata colabora den otro proyecto di PDVSA na Venezuela caba, pa nan bay busca financiamento, ya cu PDVSA mes no tabata mira manera con pa haya financiamento. Esaki tabata e set up cu e companianan aki na Venezuela caba: financia, construi y cobra ora tin produccion. Nan (Technip, Y&V Group) a bin te bay, contal cu no a tende nada mas di henter e aventura aki. Muy probablemente despues e filialnan di PDVSA a haya orden di oficina central pa nan wak kico nan mes por haci. Esey a conduci na algun actividad reduci, entre otro e mancamp cu lo mester a sirbi pa aloha e trahadonan di exterior. Y despues… silencio, te awor. No cabe duda cu e sancionnan Mericano a caba di saca e ultimo tiki rosea for di e proyecto aki, pero ya na 2016 tabata dificil pa PDVSA haya placa fia pa inversion, na Venezuela y cualkier otro parti unda e consorcio tin actividad. Esey ta conta tambe pa e parti Mericano, e refinerianan y e red di distribuimento cu Citgo Petroleum Corporation tin, cu a keda asina carga cu debe, incluso duna e empresa Ruso Rosneft 49,9% di su accionnan como garantia, cu nan mes tin problema pa haya placa hasta pa por opera normalmente.
Y esey no ta tur. Pasobra e perspectiva mas probabel pa PDVSA y su subsidiarionan ta cu nan por yega na un collapse total di e empresa, cu den su caida lo lastra henter e pais cu ta depende di su ganashi. Manera nos por tende por lo menos un biaha pa siman, PDVSA ta percura pa mas di 95% di tur divisa cu e pais ta gana. Cu e collapse di e agricultura y cria di bestia local, mester cada biaha mas divisa pa importa cuminda, y esaki no ta chansa. Venezuela tin casi dos biaha e poblacion di Hulanda! Na e momento aki caba hamber y mal nutricion ta dal gran parti di e poblacion y e parti pio no a yega ainda.
Y kico esaki ta implica pa nos? Cu ora ta sinta na mesa cu e hendenan aki, ta bon pa corda di unda nan ta bin y kico nan a haci y ta haciendo. Nan por conta nos un storia bunita cu ‘e aña aki nos no ta logra, pero no worry, otro aña nos t’ey manera un clabo pa caba e trabao aki…’ No ta nan mes ta bisa: “a otro perro con ese hueso”?
Como ser humano nos no por haci nada otro cu spera, pa bon di pueblo Venezolano, cu pa otro aña nos no mester di deal mas cu e criminalnan aki, cu a traha un santana di un di e paisnan mas prospero di e continente. Y e motibo pakico esey no ta speransa so ta cu e situacion na e pais lo yega na un culminacion e aña aki. Esey no pa via di eleccion, o pa cos cu e oposicion ta haci o laga, pero pasobra e pais ta cerca di un collapse total di su aparato productivo, di su industria, agricultura, transporte, suministro di energia, etc. E unico enemigo grandi cu e dictador y su compinchinan tin no ta Merca, no ta Europa, no ta e otro paisnan Latino Americano. E unico enemigo ta e situacion economico cu ta den un caida ireversibel. Ta di spera cu pa otro aña sikiera Venezuela haya democracia atrobe, anto nan ta bay duna prioridad na un convenio cu no a pasa Asamblea Nacional legitimo? Nan mes tin cuatro upgrader pa bay drecha. Den tur e caos y miseria aki, con importante ta pa nan rescata un refineria bieu na Aruba?
Manera nos a tende, tin candidato nobo caba pa ‘take over’ e refineria. Bunita. Kico a cambia desde cu varios aña pasa, tur compania di reputacion den e ramo aki a nenga di acepta e reto? No ta e aventureronan so a keda? Cu un di eseynan nos mester bay purba nos suerte, atrobe?
