Trahadonan di Eagle Resort & Casino a acerca FTA pa pidi un referendum pa busca representacion sindical. E solicitud aki a wordo haci caba cerca departamento di Mediador di Gobierno. E proceso a cuminsa cana caba di acuerdo cu ley di referendum.
Un preocupacion cu a bira uno comun actualmente, ta cantidad di trahado a mira cu nan salario a bay atras, debi na e situacion actual di e crisis di conoravirus. Algun di nan a haya un 60% so di nan salario pa medio di e subsidio di salario. Finalmente nan a yega di acuerdo pa haya un 60% di nan salario.
Esaki ta un di e preocupacionnan cu e trahadonan di Eagle Beach Resort tambe tin. Tin trahadonan cu ta interpreta y convenci cu dunado di trabao tambe tin obligacion legal di a paga un 20% tambe. Ademas e resort aki a bin conoce cambio cu eventualmente a trece mas inkietud cerca e trahadonan.
Mediador di Gobierno, Anselmo Pontilius a declara cu e cambio aki no mester trece inkietud. E hotel tabata pertenece na un grupo grandi na Merca. E grupo a bende su participacion den e hotel, y aworaki nan ta para ariba nan so. E ta diferente ora e hotel ta pertenece na un cadena grandi cu ta un organisacion mas fuerte. Pero esaki no ta kita afo cu e hotel aki ta opera solido.
Eagle Resort tin un gran expectativa di ocupacion y nan clientenan ta sigui yama y tin reservacion ariba mesa. Pero esaki no ta suficiente pa trece ingreso pa cubri gasto operacional, salario y tur otro gastonan cu nan tin mensualmente como compania. Solamente cu aworaki tin e crisis di covid cu ta afecta e sector hotelero en general.
