Salario na Aruba no ta atractivo: Escasez di personal na hospital ta afecta calidad di cuido

Recientemente den un articulo publica pa un medio di comunicacion local director di hospital Jacco Vroegop a confirma cu hospital tin dificultad pa haya y retene dokter y enfermeronan specialisa pa motibo di, entre otro, nivel di salario na Aruba. Bon Dia Aruba a combersa cu Director Financiero di hospital, Gregory Croeze, ken a elabora mas tocante cual ta e areanan mas critico y con esaki ta afecta calidad di cuido.

Den e publicacion di e noticiero local, Noticia Cla, Vroegop ta indica cu e ta birando mas dificil pa nan haya y despues retene dokter-, enfermeronan specialisa y otro personal di hospital cu no ta den cuido di salud. Basa riba esaki Bon Dia Aruba a puntra Sr. Croeze cual ta e areanan mas critico.

El a splica cu e problema di escasez di personal den sector di cuido ta algo cu no ta sucede solamente na Aruba, pero ta un problema mundial. El a remarca cu actualmente riba e website di hospital tin un lista di vacatura cu tin alrededor di 50 posicion habri, locual ta nifica cu ta trata di mas o menos alrededor di 150 persona cu tin mester pasobra tin diferente posicion cu tin mester mas cu un persona.

El a sigui splica cu hopi biaha nan tin varios specialistanan medico cu ta bin y ta keda pa un termino hopi cortico, algun siman pa algun luna. Esaki ta nifica cu tin biaha tin vacatura ta keda habri por si acaso tin un specialista cu kier bin vast of un tempo mas largo.

Croeze a duna como ehempel e posicion di gipsverbandmeester, cual el a resalta ta casi imposibel pa haya pasobra loke cu hospital ta paga na salario, locual ta conforme nan CAO, no ta atractivo suficiente pa haya specialistanan bin Aruba y keda.

El a agrega cu e problema aki no ta solamente pa personal di cuido di salud, pero ta conta pa hopi otro funcion tambe. “Nan ta prefera keda na unda nan ta pasobra eynan nan ta gana of nan por bay por ehempel Boneiro cu tambe lo paga un tiki mas. Esey ta e reto mas grandi cu nos tin pa haya hende pero tambe pa mantene hende pa keda akinan,” el a enfatisa.

Tocante con e problema aki ta afecta e calidad di cuido cu ta wordo brinda na e pashentnan na hospital, Croeze a indica cu obviamente si no tin suficiente personal nan no por duna tur e cuido cu bo kier duna.

Esaki por conduci na cu nan ta haya nan mes ta busca personanan cu tin un nivel mas abou cu si nan lo por paga, cual ta afecta e calidad di cuido, of pashentnan ta kies pa busca e cuido otro caminda cu no ta na Aruba. Tocante esaki, el a resalta cu e no sa pasa hopi pasobra mayoria biaha nan por duna e cuido, pero loke ta pasa ta cu e peso ta bira mas pisa riba e grupo di persona cu tin trahando aworaki.

“Riba e grupo cu tin cu ta trahando e peso ta bira mas hopi door cu tin escasez di personal. Bo ta haya e hendenan ta mas cansa, mas demotiva, tin por hasta haya burnout pasobra nan ta traha demasiado hopi ora, nan no ta haya suficiente ora pa tin liber of una bes nan tin liber nan ta wordo yama pa bin traha pa cambia warda cu otro hende.

E peso ta hopi pisa riba e hendenan cu ta trahando pasobra no tin e espacio cu nan por disfruta di dianan liber pasobra nan mester traha extra,” el a subraya.

El a remarca cu e problema aki no ta conta no solamente pa cuido, pero ta conta pa hopi otro personal na hospital cu no precisamente ta traha directamente den cuido.

Manera ya caba Croeze a indica, e problema di escasez di personal den sector di cuido ta un problema global pa varios tempo caba, pa cual motibo hospital a tuma algun iniciativa di nan mes pa yuda alivia e situacion aki,

El a splica cu como hospital nan a tuma e decision di no simplemente keda mas crusa y depende di otro, nan a scoge pa cuminsa cu varios curso pa yuda nan personal yega na specialisacion.

El a sigui splica cu e cursonan aki a cuminsa algun aña pasa caba. E HOH Academy ta duna diferente curso pa asina hendenan por specialisa nan mes, sobre todo enfermeronan, pa nan por logra cubri e posicionnan cu ta habri.

Pero esaki ainda no ta solucion e situacion critico pa loke ta e problema di falta di personal. El a agrega cu obviamente durante periodo cu un persona ta tumando e curso mester di un persona pa haci e trabou di e persona ey, pues e ta keda un parti critico.

Otro punto di preocupacion ta cu tin hende cu ta bin Aruba, pero ta keda solamente pa dos of tres aña so, nan no ta keda un periodo largo of indefini. Pa e motibo ey, el a remarca, nan kier haci e cursonan aki y enfoca mas riba e hendenan cu si kier keda Aruba pa traha.

“Asina nos ta pensa cu talbes aki cinco, seis of shete aña por mira cu e cursonan aki ta dunando nan beneficionan pasobra no lo mester busca hopi otro hende mas di afo,” el a resalta.

Apart di esaki, Croeze a agrega, hospital di Aruba ta haci hopi cooperacion cu universidad of hospitalnan na Hulanda. El a splica cu aworaki nan tin un cooperacion cu UMC Utrecht, un centro na Utrecht cu ta yuda Aruba cu specialistanan di mucha y neurologonan, y alabes nan ta purba expande pa mas otro specialisacion.

E cooperacionnan aki, el a sigui splica, ta haci cu e personal di Aruba tambe por bay UMC Utrecht pa nan haci nan training mas avansa y esaki ta yuda e personal no perde nan capacidadnan, nan skills. E cooperacion aki ta un tipo di intercambio di persona unda e Hulandesnan ta bin Aruba y e trahadonan di Aruba tambe ta bay aya traha y haya mas experticio.

El a agrega cu actualmente nan ta purbando tambe di extende e cooperacion den region cu por ehempel Boneiro of Sint Maarten pa asina comparti e experticio tambe.