A pesar cu e trabou den e refineria no a cuminsa full swing ainda, Mediador di Gobierno sr. Anselmo Pontilius ta kere cu na momento cu nos tin e posibilidad di crea mas empleo ta positivo, eventualmente un empleo cu por paga miho salario.
Igualmente el a indica cu ya caba sindicato IOWUA a vocifera su preocupacion riba e parti di siguridad na pia di trabou; y tambe riba e salario cu mester paga realmente, sea cu bo ta un trahado inmigrante of un trahado local. “No por ta asina cu bo ta paga un salario inferior di loke nos ley ta stipula”, segun Pontilius.
Siguridad
Den reunion cu el a yega di sostene cu representantenan di IOWUA y e mandatario di Labor, sr. Paul Croes, e sindicato aki a pidi pa vigila di cerca tur compania cu ta bin traha riba e parti di siguridad riba tereno di trabou. Pero tambe cumplimento di e companianan aki y nan obligacion cu e trahadonan pa paga entre otro nan prima di SVb, AZV, etc…y logicamente e pago di e trahadonan . “Mi ta kere cu sindicato lo tira bista riba esaki”, el a declara. E echo cu e refineria a bira propiedad di Aruba, pues e departamento di Labor y siguridad di gobierno mester tin un bista skerpi y di cerca riba e desaroyo relaciona cu e trahadonan di e refineria. E ta haya cu hopi cos cu a sosode den pasado cu nos por preveni awor combersando caba cu representantenan di Citgo y su sub contratistanan. Si lo bay tin entre 1mil pa 2mil trahado ta hopi hende moviendo den e refineria, e ta kere cu bo mester no solamente reuni awor pero periodicamente pa keda hopi di cerca vigila kico ta pasando. E ta supone cu lo bay tin trabou pisa di henter siman y mas cu 12 ora pa dia, y semper den un situacion asina lo por surgi situacion di peliger laboral cu mester tene cuenta cu ne.
Economia
For di punto di bista di economia e ta haya cu operacion di e refineria tambe ta positivo pa pais Aruba tambe. Ya cu e trahadonan cu a custumbra traha den e refineria lo tin mas ingreso. E factor aki ta contribui pa draai nos economia. Aunke e trahadonan lo gosa basicamente di un periodo di 24 luna of mas cu ta e proceso cu lo dura pa re start e refineria. “Nos no mester lubida cu un grupo di trahado na momento cu Valero a stop su operacion, e prome grupo cu a haya e impacto aki tabata e trahadonan y e contratistanan”, el a bisa . Algun di e trahadonan a sali bay pafo di Aruba, mientras cu otro a wordo adapta su mes y a bay traha den otro sector. E echo cu nos tin un refineria cu un operador nobo e ta crea espacio , y lo habri cupo di trabou tambe den otro sectornan di nos mercado laboral y nos mester mira con lo wordo atende cu esaki.
