Actualmente ta trahando riba salanan di operacion nobo pa hospital, pero tambe lo tin salanan di operacion cu lo bini disponibel na Imsan. Sala di operacion cu tin na hospital actualmente ta planifica operacionnan te cu 3or di atardi pues a cuestion dicon no ta uza esey mas ora, en bes di traha mas sala. Charlaine Huntington vocero di hospital a splica esaki.
“Ta opera hende despues di 3’or di atardi, esakinan ta den caso di emergencia. Mester imagina cu no ta planifica un hende pa opera despues di 3’or di atardi pasobra e hende lo mester keda na yuna henter e dia. Pues e echo cu no ta planifica hende pa opera despues di 3or di atardi ta algo cu ta hopi aña asina, y por bisa cu e ta ya den nos cultura.” Claro cu tin casonan di urgencia cual ta haci cu un persona ta wordo opera 8’or di anochi. “E ta pasa, OK ta sigui draai pa esunnan cu tin emergencia.”
Proceso operacion
Hendenan cu cita si esaki ta sosode te cu 3or di atardi, bou di e orarionan di trabou normal di hospital, Sra. Huntington a splica. Awo den e cantidad di ora di mainta te cu 3or di atardi ta registra tur cita, cual ta experiencia cu ta yena e planificacion (P’esey cu mester di ams sala). Banda di esaki e operacion di un hende ta encera henter un proceso cu mester tene cuenta cun’e pa loke ta personal di hospital. Si un persona opera 5’or di atardi, mester tin cuido riba piso tambe. Antes Aruba tabata mas chikito, cual ta hunga un rol riba con a atende cu esaki, Sra. Huntington a bisa. Pues ta hopi añanan cu OK a opera manera cu nan a opera. Y awo mas cu Hospital a crece, tin mas specialista cu tabatin antes, e cantidad pa opera ta mas halto. Banda di ‘djis un operacion’ mester anestesista, y hendenan pa provee cuido na e pashent despues di e operacion, e no ta un proceso simpel y full e proceso ta importante, Sra. Huntington a enfatisa. Den contacto cu Solange Tchong vocero di AZV, pa e situacion aki, el a bisa Bon Dia Aruba cu no tin comentario pa e orarionan actual y uzo di sala di operacion, pio tampoco locual ta regarda e costo pa mas sala di operacion.
Amplia orario
Terminando Sra. Huntington a bisa cu ta haciendo investigacion pa amplia e orarionan di trabou si di sala di operacion, pero esaki ta tuma tempo, algo cu Sra. Tchong bisa cu ta evaluando tambe hunto cu hospital. Pasobra si e orarionan wordo amplia mester mira con lo haci cu empleadonan pa cuido despues di operacion. Ora caba di opera mester tin hende pa provee e cuido. Si no tin suficiente hende riba piso despues di 3or, e ora ken ta monitor e pashent?, el a conclui.
