Minister di Salubridad Publico, Dr. Alex Schwengle kende a realisa e apertura oficial di e di cuater simposio “Bo Curason den Bo Man”, organisa pa Aruba Heart Foundation, a referi no solamente riba tereno preventivo, pero e avance y modernismo di nos isla pa atende casonan relaciona cu problema cardio-vascular.
E mandatario a declara cu inversionnan necesario pa e parti curativo t’ey caba y ta biniendo mas. El a menciona como ehempel cu den e sala di operacion nobo lo tin un camber special pa haci hopi caterisacion.
Den e caso aki no lo wordo limita simplemente riba e parti di diagnostica so, pero tambe den e parti di intervencion kirurgico.
“Unda nos mes na Aruba ta bay caterisa pashent y hinca ‘stem’ ora cu nan adernan di curason ta cerando”, el a bisa.
No obstante esey, e mandatario a declara cu e atencion lo keda riba prevencion. E ta haya cu si nos no ta haci esey y si nos no ta haci nada pa e cantidad di diabetes, pashent di hiper tension, pashent cu problema cardio-vascular, obesidad, etc… nos mester tin 10 camber pa caterisacion. Kiermen e ta bira un situacion impagabel y e no ta sostenibel.
E ta haya cu tur hende a cera cabes pa traha riba e parti preventivo, pero e mandatario ta admiti cu kisas ta falta mas coordinacion. Pero di nan banda su ministerio ta trahando riba esey pa nan tur bay den e mesun direccion.
