Sakeonan y un paña cora awendia ta e imagen di e hamber na Colombia. Desde e barionan mas pober di Bogota ta e pueblonan mas leu di e Caribe, e protestanan di esunnan mas desespera pa falta di cuminda ta lago cu ta ripiti dia pa dia.
“Nos ta casi pelando wea pasobra nos no tin nada pa come”, Edward Avila, un hoben cu ta biba na bario Arborizadora Alta di Ciudad Bolivar na Bogota ta bisa y na unda e ta lider di un blokeo pa motibo cu segun e ta sigura, nan ta sigui wardando e ayudo alimentario cu a priminti pa nan ora e cuarentena a cuminsa dia 25 di maart pa via di coronavirus.
Ciudad Bolivar ta e potret di e necesidad. Casnan di colornan bibo den algun sector y e Transmicable, un teleferico pa subi te e parti mas halto di e sero, ta duna un toke moderno pa e zona di miseria aki cu ta marca e limite sur di Bogota.
E principal paso pa e caya di e bario, cu desde algun mirador por mira e inmenso capital Colombiano, ta tapa cu saconan preto yen di santo y varios contenedor na unda normalmente e hende ta pone e sushi den dje.
Den bentananan di hopi cas tin un bandera haci cu paña cora, esey ta un señal cu eynan tin hende cu mester di cuminda urgentemente. E movemento a cuminsa na e localidad bisiña di Soacha, cerca di Bogota, cu ta uni su pobresa cu esun di Ciudad Bolivar y a extende te distinto luga di e pais.
Sinembargo, e Alcaldia di Bogota ta bisa cu desde cu a cuminsa e cuarentena y te diahuebs ultimo, por lo menos 317.553 famia a ricibi ayudo di placa y cu na e ciudad a wordo entrega 2.2 miyon di mercado, bono di alimento y cuminda cayente.
