(AP)—Carlos Sainz Jr. ta kere cu e tin “suficiente opcion” den Formula 1 otro aña ora e retira for di Ferrari pa traha espacio pa Lewis Hamilton, segun e Spaño a bisa ayera.
Hamilton ta uniendo cu Ferrari for di Mercedes otro aña den un decision cu a sacudi F1. E shete-biaha campeon lo ta partner di Charles Leclerc.
“Tin suficiente opcion eyfo” pa 2025, Sainz a bisa mientras Ferrari a lansa su auto di 2024 diamars, agregando cu e tabatin aviso di antemano cu Hamilton tabata tumando su asiento di Ferrari pero e tabata sorprendi toch. Sainz a bisa cu e ta plania di tuma su tempo prome cu e firma cu un otro ekipo.
“Mi ta kere e ta bay ta probablemente un proceso mas largo. Mi tin dilanti mi e tres of cuatro aña mas importante di mi carera, bo sa, unda mi kier sigura cu mi ta den e luga corecto den e momento corecto,” Sainz a bisa. “Mi kier sigura cu mi lo scoge e proximo destinacion corecto pa mi. Pues mi ta bay tuma mi tempo pa pensa riba dje, pa evalua tur e opcionnan. E ora mi por djis sinti sigur cu, ora mi tuma e decision, mi a duna mi mes suficiente tempo y suficiente informacion.”
Sainz ta drentando su di cuatro y ultimo temporada cu Ferrari, unda el a tuma su prome victoria F1 na Britania na 2022 y tabata e unico chauffeur no-Red Bull pa gana e careda e temporada pasa cu un victoria na Singapore.
