Ayera mainta, Sindicato di Aduana di Aruba (SADA) a ofrece un conferencia di prensa pa e medionan local y nan a trece dilanti e tema di pronunciacion di sentencia cu Lito Pablo, trahado di Cuerpo di Aduana, a haci contra pais Aruba.

Edward Maduro, presidente di sindicato SADA a comenta cu e caso aki tin cosnan cu no a bay corecto di parti di director di Aduana; tampoco pa e director di departamento di Recurso Humano (DRH) cu tambe ta culpabel di actonan, cu nan como sindicato a sigura cu no ta integro.

Maduro a specifica cu gobierno no ta mustrando interes manera Cuerpo di Aduana ta desea, pa motibo cu Pablo den e sentencia a gana su caso y nan anuncia cu tabata basa riba mentiranan cu director Ricky Croes a hinca den un voordracht, cu a wordo manda na aña 2017.

E caso.
Maduro a duna a conoce con e caso a aki a tuma luga te cu e sentencia cu a cay dia 20 di januari ultimo. Dia 22 di juni 2017 director di Aduana, Ricky Croes a manda un voordracht pa e minister di e tempo ey, cu tabata Angel Bermudez, pa asina ascende Pablo pa un rango di inspector aunke e no tin un diploma academico cu ta un di e rekisito pa un persona por wordo nombra pa e rango aki.

Bermudez dia 27 di juni a manda e voordracht pa DRH pa duna un conseho tocante esaki y di esaki, Maduro a bisa cu director di DRH aproximadamente dia 17 di augustus ta informa SADA di e voordracht aki.

SADA a puntra con e persona aki ta para den e caso aki y e director di DRH a comenta cu e no por haya e nombramento pa motibo cu e ta carece di opleiding academico cu e mester pa inspector di Aduana.

Maduro a informa cu na aña 2017 y henter 2018 nan no a haya mas informacion di e caso. Pero despues nan a haya sa na februari di 2019 cu e landsbesluit pa e nombramento aki a sali.

Di su parti, Maduro a bisa cu nan a puntra director di DRH tocante esaki; di locual e director mes a indica cu e no tin conocemento y lo haci un investigacion pa haya sa kico a bay robes. Tambe tabata un sorpresa pa nan pa motibo cu DRH a bisa cu lo trek in e landsbesluit, pasobra e ta un nombramento robes.

A pesar cu DRH a bisa SADA cu na februari di 2019 e no tabata sa di e nombramento, Maduro a comenta cu SADA a haya e voordracht di DRH cu a sali na april di 2018. “Esaki ta un falta di integridad” pa motibo cu Maduro a menciona cu na 2017 el a sigura cu e meneer no por haya e nombramento y 6 luna despues e mesun DRH a firma e voordracht pa asina nombra Pablo cu e funcion di inspector.

Na unda Integridad a keda?
Maduro a trece dilanti cu ora un persona ta traha den departamento di gobierno, cu tur hende ta papia di integridad y nan a punta e director DRH como un di esunnan cu tin cu dirigi e Bureau Integriteit. “Y tur tipo di atrocidad aki ta tuma luga den un aparato gubernamental” el a manifesta.

Di mesun manera, Maduro a señala cu minister presidente Evelyn Wever-Croes y minister di finanzas Xiomara Maduro a duna indicacion cu nan tambe ta parti di esaki, locual Maduro a sigura cu ta lamenta profundamente.

Maduro ademas a anuncia cu a pidi pa un investigacion cuminsa di biaha, pa motibo cu esaki ta un caso ‘hopi serio’ y cuestionabel. SADA a purba di tuma contacto cu gobierno pa haci un reunion, pero nan no a haya contesta. Asina mes, el a afirma cu lunanan despues nan a bolbe manda otro carta pa puntra con a para cu e investigacion aki, pa saca afo kico a bay robes y kendenan ta bay para responsabel pa tuma e decision cu ta contra regla y ley.

Ademas, Maduro a duna di conoce cu nan a tuma nota di algun caso di nan coleganan cu a wordo nenga un di bevordening pa motibo cu DRH a bisa cu e persona na escala 6 no por haya esey pa scala 7, pa motibo cu ta carece di un opleiding. “Di unda DRH a saca su linea pa midi? Aparentemente esun cu nan tin, tin varios tipo di midi cu ta depende de ken bo ta”, Maduro a declara.

Pa e motibo aki nan ta pidi pa Gobierno actua na e momentonan aki y demostra cu di berdad e ta para pa integridad; no solamente pa Cuerpo di Aduana sino pa aparato gubernamental completo, pa traha riba cosnan corecto y asina cuminsa tuma accion den e caso aki.