SADA ta haya insinuacion di gremio comercial como ‘infunda’ y no basa riba berdad

Tin supermercadonan grandi y importadonan di e productonan aki cu ta culpa Duana di e escasez aki, ya cu nan tin containernan cu fruta y berdura para cu ta wardando riba nan pa varios dia. Mientras otro supermercado, manera Ling & Sons, tabatin gran cantidad di tomati ‘chonto’ na benta y na bon prijs siman pasa cu ta un di e productonan mas scars localmente.

SADA
Di su banda, sindicato SADA cu ta representa e empleadonan di departamento di Duana ta haya cu e sector comercial ta acusa nan inhustamente. Segun presidente di SADA, Edward Maduro, hopi biaha e insinuacionnan aki ta infunda y no ta basa riba berdad.

Segun e sindicalista Maduro, personal di duana no ta riba ningun tipo di accion actualmente. Ademas despues cu diahuebs ultimo nan a tene un accion di 3 ora y mey, tur cos a bira normal pa 11.30am. El a reacciona bisando cu e accion aki no a perhudica comercio manera ATIA y Camara di Comercio (KvK) ta pretende lesa e reaccion di KvK aki riba.

Igualmente el a laga sa na Bon Dia Aruba cu tur container friu ta haya prioridad pa sali prome pa nan no daña. No ta importa dia ni ora, ora cu un barco ta yega Aruba cu container friu abordo, nan ta haya aprobacion pa sali. Te hasta tin biaha nan ta haya autorisacion di ariba pa atende cu e container friu cu fruta y berdura te hasta prome cu tur documento ta cla. “Pues nan no por tira culpa riba duana”, asina sindicalista Maduro a bisa.

Incertidumbre comercial
Actualmente e scarsedad di fruta y berdura ta debi na e incertidumbre cu ta existi rond di e blokeo aki, caminda e importadonan di e productonan cu ta putri facilmente, no kier core mucho riesgo. E incertidumbre tin di haber si e blokeo aki lo sigui pa largo tempo of no. Ya cu si e blokeo aereo y maritimo aki lo wordo lanta di e mesun forma cu el a wordo impone, esta di un pa otro dia, e perdida ta grandi pa e comerciantenan aki, ya cu dificilmente nan por competi no tanto riba calidad, pero si riba prijs di e berdura y fruta Venezolano.

E siman aki ta wordo premira cu un biaha mas nos mercado local lo wordo abastece normalmente cu fruta y berdura for di Colombia. Ya caba un barco cu a sali for di Barranquilla ta carga cu varios container di e productonan aki. Mirando cu awe ta un dia di ATV (liber pa instancianan di gobierno), ta wordo premira cu mas tarda diaranson awor lo tin suficiente fruta y berdura riba mercado local.

E blokeo di e gobierno Venezolano a haci cu e abastecemento di fruta y berdura na prijs mas barata for di estado Falcon a keda restringi totalmente. E prijs a subi debi na escasez y prijs di importacion for di otro paisnan entre na Merca, Colombia y Republica Dominicana ta mas caro.

Sinembargo e habitantenan di estado Falcon ta sufriendo mas cu Aruba pa e medida aki imponi pa e gobierno central di nan pais. Ya caba e importacion di productonan di fruta y berdura a cay durante e ultimo añanan, debi na e situacion interno di Venezuela. Pa ehempel, si 10 aña pasa, 10 barco carga cu fruta y berdura Venezolano tabata bin Aruba for di estado Falcon, ultimo tempo solamente 2 barco tabata bini pa siman.