Sindicato SADA ta lamenta cu den henter debate riba siguridad y control di nos costanan, cuerpo di Duana casi no ta wordo menciona, siendo cu nan ta prome pa yama pa realisa e tipo di trabou aki. Ya cu nan ta considera e control aki como parti di e trabou di duana, esta e control di costa.

Presidente di SADA, Edward Maduro a declara na Bon Dia Aruba cu un aspecto cu ta keda di preocupacion cerca personal di duana ta nos fronteranan. E ta argumenta cu den tur parti di mundo, duana ta haci control di nan costa, mientras cu akinan ta manera cu nan no por haci e tipo di trabou aki.

Nan ta tende cierto critica riba e ausencia di duana pa locual ta trata e control di costa, pero -segun presidente di SADA – esaki lamentablemente no ta den man di e trahadonan, pero mas bien e ta den man di e director. Pasobra ta e director ta esun cu ta tuma e decision. Ya cu SADA como sindicato por keda señala esaki pa añanan largo, pero nan no por bin cu e instruccion aki. Nan a yega di trece e preocupacion aki cerca e gobierno anterior, y tambe cerca gobierno actual, y te hasta nan a papia cu minister president tempo cu e tabatin e rol di formado.

Te aworaki tur locual ta wordo haci durante e reunionnan cu ta tumando luga na nivel mas halto entre paisnan di reino y Venezuela ta pa importacion legal sea via waf of aeropuerto. Pero esaki no ta kita afo cu mester protege nos fronteranan. Pa añanan, SADA cu ta representa sindicalmente e trahadonan di cuerpo di Duana, ta bin bogando pa e supervision di nos costa. No solamente cu trabou estrecho cu polis y kustwacht, pero pa bin cu e coast suveillance di cuerpo di Duana mes.

Coast suveillance di Duana

No ta un secreto cu cosnan ta sali ilegalmente for di e pais bisiña pa Aruba, y esaki ta e preocupacion cu SADA ta expresa. Pasobra e tipo di actividad aki no ta bay stop, independiente cu Venezuela lo percura pa cosnan ilegal no sali for di nan pais. Pero di nos banda nos no por keda keto a pesar di e reunionnan cu ta tumando luga pa importacion legal.

SADA ta lamenta cu a pesar cu e frontera bilateral ta cera pa varios luna caba, e director di cuerpo di Duana no a percura pa probecha e momento pa bin cu e coast suveillance di cuerpo di Duana mes, uzando e personal pa ehempel di waf na Barcadera. Nan sa cu esaki no ta un trabou dushi, pero e ta un trabou cu mester wordo haci, pasobra nan tin cu yuda pa proteha nos comunidad di tur cos cu ta drenta ilegal.

Considerando cu e frontera maritimo te ainda ta cera, pues no tin hopi traficacion di carga entre paisnan, e trabou ta menos na Barcadera. “Nos obstante esaki, e director no a opta pa cuminsa cu e coast suveillance”, segun sr. Maduro.

E ta haya cu e director ta prefera manda e personal haci trabou di control di container, pasobra den concepto di SADA, e director actual ta solamente wak placa. E sindicalista ta haya cu berdad e placa ta importante pa entrada di pais Aruba, ya cu e ta yuda pa financia di gobierno, pero ‘di otro banda bo no por gewoon tapa solo cu un dede y pensa cu esey ta tur cos’. Ya cu di un banda placa ta drenta, pero di otro banda bo porta ta habri pa cosnan ilegal, entrada di personal ilegal, entrada di mercancianan ilegal, armanan te hasta handgranaat a drenta siman pasa.

Esaki ta e punto di preocupacion cu SADA ta trece dilanti den nomber di nan miembronan, ya cu personal di duana kier duna un aporte pa e otro cuerponan cu ta haciendo nan maximo esfuerso pa por intercepta tur locual ta ilegal cu kier drenta pa via di nos costanan. “Pa nos join e bataya y cu nos cera nos fronteranan mas posibel.” Esaki ta e punto cu pa SADA ta keda di vital importancia y preocupacion.

Di otro banda e ta haya cu e posicion di nos pais ta bon sentido cu porfin ta bin algo di mas claridad den e relacion cu Venezuela. Semper nan a yega di señala cu hopi cosnan cu no a cuadra den pasado, pero lamentablemente nada tabata wordo haci. Esaki a pesar di e cantidad di señalnan cu nan tabatin tocante importacion di diferente producto.

SADA lo sigui e desaroyo pa loke ta trata e nivel mas halto di reino y Venezuela, unda ta bin cu un acuerdo mas formal. “Nos ta sinta warda wak precies kico tur ta wordo hinca den otro”, el a finalisa.