ORANJESTAD – Sindicato Aduana di Aruba (SADA) a tene un reunion cu nan miembronan riba e ultimo desaroyo di e trahamento di e concepto di descripcion di funcion (functieomschrijving)  pa e cuerpo uniforma aki. E concepto di Departamento di Recurso Humano (DRH) ta un ‘falta di respet’ pa e trahadonan di  aduana, segun lider sindical Edward Maduro.

E ta haya cu e reunion cu nan a sostene un dia prome (diamars atardi) cu minister encarga Angel Bermudez, directiva di Departamento di Recurso Humano (DRH), director di Departamento di Duana y Departamento  di Recurso Humano di Duana mes, a bay bon.  Pero e contenido no tabata mucho na nan agrado. SADA ta haya cu e proposicion cu a bin di parti di DRH  no ta nada di locual SADA a propone. “Nan a bin cu un proposicion cu nos no por acepta na absoluto.”

Proximo reunion
Di un banda,  SADA a haya sa for di DRH cu  nan a traha e concepto ey, ya cu esey tabata esun cu e mandatario tabata kier, pasobra nan no a haya tarea for di minister Bermudez pa traha riba esun di SADA mes. Pero di otro banda, ora cu nan a acerca e minister den cuestion riba e asunto aki, nan por ripara cu e ta tratando lo maximo pa nan  por keda cla. Sr. Maduro ta haya cu e mandatario tin boluntad pa traha y bin cla cu e concepto aki mas pronto; y tambe bin cu un solucion drechi. Pa tal motibo diabierna awor, representantenan di SADA ta bay sinta cu directiva di DRH  pa asina nan por discuti un proposicion satisfactorio pa ambos parti. E ta kere cu pa  mañan  atardi, despues di e reunion cu DRH, nan ta bay sinta cu minister Bermudez un biaha mas. “Nos ta sperando cu nos por keda cla pa diabierna.” SADA ta wardando riba kico lo bay sali di e reunion aki,  ya cu e sindicato no kier pa esaki bira un wega pa haci mas largo e proceso; y nan ta cuminsa cansa. For di januari ultimo nan ta bin reuniendo y nan no ta mira e boluntad di DHR  pa yega na un ‘proposicion husto’ cu nan por acepta. Ademas si eleccion venidero ta produci un cambio den gobernacion, SADA no kier cuminsa full di nobo cu e proceso aki, ya cu e ta bira mas largo ainda. E situacion aki ta afecta pa personal di Aduana bay dilanti; y e ta  bini for di cu duana a independisa di departamento di Impuesto, birando un departamento riba su mes na aña 2013.

 

Efecto pa aduana
E sindicalista ta laga sa cu e concepto traha pa DRH riba  e descripcion di funcion pa personal di duana no tabata completo. Tampoco e no ta ilustra claramente kico ta e structura nobo. Sr. Maduro a laga sa cu nan a mustra minister Bermudez riba e situacion aki, ya cu den e proposicion aki di DRH e mandatario a wordo mal informa ‘pa mustra kere cu e ta bon’.  E sindicalista  ta haya cu e concepto aki a wordo traha pura. P’esey e ta considera cu loke a wordo traha ta un falta di respet; y cu no a tene cuenta a cu e concepto cu SADA a  traha cu ‘ta un cos bon hinca den otro’, segun sr. Maduro. E ta haya cu e descripcion di funcion pa e cuerpo uniforma aki mester a keda cla caba. E lider sindical a declara cu e situacion aki ta afecta e cuerpo inmensamente  pasobra e ta wordo traduci den e productividad di e trahadonan cu ta wordo afecta. Nan tin practicamente 4 aña cu departamento aki ta los di departamento di Impuesto, y nada a sosode den e restitucion  di salario di  nan personal. Esaki ta afecta e trahadonan di duana, mirando cu si nan ta compara otro cuerponan uniforma cu nan cuerpo. “Nos a keda pega den tempo basta leu.”

Bon Dia Aruba ta busca ainda e reaccion di banda di DRH y minister.