Presidente di sindicato di duana (SADA), Edward Maduro a bisa cu Duana a wordo reforsa cu 20 hulp kommies nobo locual ta un adkisicion hopi positivo pa e cuerpo uniforma aki. Sinembargo ainda e gap di falta di personal di duana pa atende cu nan trabou debidamente.

SADA a yega di haci evaluacion y e cuerpo mester un total di 230 persona lagando afo e parti di administracion pa nan por haci control mas riguroso y efectivo. Actualmente nan tin alrededor di 170 incluyendo e grupo nobo, kiermen ainda falta 60 duanero mas.

Igualmente el a laga sa cu e echo cu recientemente nan a logra bin cu un functieomschrijving (descripcion di funcion) y structura di salario for di cu duana a bira independiente di departamento di Belasting, no a contribui na e proceso di seleccion di personal nobo. Sindicalista sr. Maduro a indica na Bon Dia Aruba cu e parti di seleccion personal nobo ta algo full apart, y nan ta dos comision full apart tambe.

E capitulo di functieomschrijving (descripcion di funcion) y structura di salario ta casi full cera y e ultimo parti ta esun di ehecucion. Pero nan ta wardando riba Directie Wetgeving, cu ta e di dos fase di e proceso aki. Pa nan ta un bon señal, pues nan a bin cla cu e fase uno caba. Aunke e formulacion ainda ta falta, pero e no ta kere cu lo tin obhecion of tardamento, ya cu Departamento di Recurso Humano (DRH) ta envolvi den e proceso aki. Ademas DRH a duna conseho positivo. P’esey SADA no tin preocupacion cu e proceso aki lo bin cla pronto y sin mayor problema.

Seleccion y influencia politica
SADA ta hopi contento cu pa prome biaha nan sindicato a tene un rol participativo den e proceso di seleccion di personal nobo. Pero na final di cuenta gobierno ta esun cu ta dicidi. Pero nan a haci nan best di selecta esunnan miho posibel. Sinembargo tin cos cu no ta bay bon y esaki SADA lo trece na atencion di e minister di Financia, Angel Bermudez.

Encuanto si tin influencia politico pa recluta duanero nobo den cuadro di eleccion venidero, e sindicalista sr. Maduro a bisa cu nan a haci esfuerso pa laga influencia politico pafo. Pero gobierno ta esun cu tin e decision final. Esaki a yega di sosode den tur signatura politico cu a goberna y esaki no ta un excepcion, segun e sindicalista. Esaki ta un aspecto cu nan lo trata entre otro cu e mandatario. E ta considera cu esaki ta un asunto delicado ya cu ta trata di hendenan.

“Como sindicato bo ta trata di haci lo maximo pa bo tin e miho nan den bo cuerpo”, el a bisa. Specialmente considerando cu nan ta un cuerpo uniforma cu ta traha cu leynan y nan integridad mester ta hopi halto, y esaki ta algo cu SADA ta para pe.