Den 10 container di e compania local Arubras e placa, husticia ta kere un suma total di 23,5 miyon euro (mas cu 46 miyon florin), a bay di Hulanda pa Aruba y finalmente destinacion Venezuela.
Entro otro esaki a bin dilanti diabierna mainta ora dos sospechosonan principal a sali pa prome biaha dilanti hues den corte Arubano. Un otro sospechoso importante ya a presenta den corte Hulandes, esta Hennie van Rey. E ta e ruman homber di e politico Jos van Rey cu tambe ta bou investigacion pa un otro caso di fraude. Segun husticia e casonan no ta relata.
E caso di labamento di placa ta uno mas grandi na Aruba. E dos sospechosonan Ramon Helgers y Rupert Genser tabata scucha den sala e peticion di fiscal pa trata e caso riba 5 di februari te otro aña. Motibo principal ta cu e investigacion despues di 3,5 luna, ainda ta andando y Ministerio Publico ta spera cu na januari esaki ta cla.
E investigacion ta hopi extenso pasobra mester tuma luga den diferente pais. Manera conoci esaki ta tumando luga na Hulanda, Venezuela y Belgica. Pero fiscal Bart Schmitz ta bisa cu cu tambe ta warda riba resultadonan di investigacion na Suisa y Croatia unda Genser tabatin negoshi tambe.
Ayera fiscal tambe mester haya contesta riba un peticion pa husticia Venezolano pa extradita un otro sospechosa pa Aruba, esta De Sousa. Nan tabata yam’e ‘Rabo’ pasobra e tabata colecta e placa na final pa e hefe grandi na Venezuela, Chichi, cu nan a duna e nomber scondi ‘Papa’.
No ta coopera
Un otro motibo ta cu e sospechosonan no ta coopera cu husticia. Pues nan mester bay den tur documento, yamada y otro informacion cu relata cu e transportacionnan. E comunicacion tabata hopi extenso y tambe nan tabata uza palabra codifica. Por ehempel 73 kilo di galiña pa Papa ta nifica 73.000 euro cu mester bay Venezuela.
Tin biaha si e investigacion a bay facil. Por ehempel ora un agente di recherche a cay door di e blafon den e cas di Genser, anto saconan yena cu placa tabata basha abou tambe. Asina husticia a haya sa cu e tabata sconde 350.000 euro riba su zolder. Genser tabata gana 2% di cada suma transporta.
E otro sospechoso Helgers a sconde su placa cerca su ruman homber y ruman muhe na Roermond, Hulanda. Eynan nan tabata sconde e placa den jug. OM ta calcula cu Genser a gana 400.000 euro y Helgers mas cu dobel cu e labamento.
Buki ros
E abogado di Genser, Marchena, a pidi hues pa pone Genser den libertad pendiente e tratamento di e caso, pasobra su cliente no tabata hunga un rol grandi den e caso. Pa convence hues cu esey no ta e caso, fiscal a divulga hopi detaye cu a sali for di e investigacion. Genser ya tabata den prison un biaha, condena den un otro caso di labemento unda tabata sconde placa den muebla. Y den e caso awor, el a uza un buki ros pa nota riba e transaccionnan. E mesun tipo di buki ros e sospechoso na Hulanda, Van Rey, tambe tin den su oficina.
Tambe polis a haya su DNA riba e papel bruin cu Van Rey ta uza den su compania y tambe pa lora e placa den dje pa transporta pa Aruba. Riba e papel tambe nan a haya e DNA di Helgers cu tambe tabata bou di investigacion den un otro caso di labamento na Aruba, yama Tunis (unda e nomber di Van Rey tambe a cay). Y e caso Tunis a bin despues husticia di Merca tabata investiga un caso di droga.
Pues ta sospecha cu e placa laba ta di e benta di droga. Pero husticia na Hulanda ni na Aruba a confirma esaki te ainda.
Rechasa
Na final hues a dicta cu e tratamento di caso lo ta riba diabierna 5 di februari 2016. Maske fiscal no por garantisa cu e investigacion lo caba na tempo pa asina tin suficiente preparacion prome cu e fecha aki. El a bisa hues cu medio december e por informa corte si tur cos ta canando ainda manera planea.
Hues si a rechasa e peticion pa pone Genser den libertad aworaki.
E abogado di Helgers, Demis Illes, ta splica Bon Dia Aruba dicon su cliente no ta papia. “Esey ta un strategia den su defensa. Pero esaki lo cambia.”
Den e sala di corte e director di e compania di transportacion, Arubras, tambe tabata presenta y cuminda e sospechosonan. Montival Da Silva Santos (di Brasil) ta bisa cu Helgers a yud’e lanta su compania. “No, mi no tabata sa nada di e asunto aki.” Helgers ta un persona conoci entre otro como e ta un di e doñonan di e restaurant popular Madame Janette.
