Sabrina Sonensein ta un psicologo for di 2008 despues di a logra su Bachelor’s na Merca y a haci su Master’s den psicologia clinico na Hulanda. Actualmente e ta traha na Aruba y ta ripara cu ta falta hopi amor propio pa loke ta trata salud mental y esey ta afecta cada persona negativamente.

Sonensein ta indica cu esaki ta relaciona na ora un persona no tin identidad ni autenticidad loke ta sucede hopi ora un persona ta cana cu un tipo di mascarada, pasobra nan ta sinti cu nan tin cu “fit in” den gruponan pa motibo cu nan tin miedo di rechaso, discriminacion of tambe pa motibonan laboral.

“Tin diferente tipo di personalidad cu nos tin y ki ta pasa ora bo no tin amor propio? Si nos no ta reflexiona riba ken nos ta y kico ta haci nos, nos mes, esaki ta afecta nos salud mental di un manera negativo. E por afecta asina tanto di un manera cu nos por haya ansiedad pasobra nos no sa ken nos ta mas,” el a sigura.

Pa Sonensein ta hopi importante pa e persona sa ki tipo di persona e ta y tambe ken e tin cerca dje. Den esaki, cu amor propio, e persona por mira su mes miho.

“Si nos ta enfoca den presente unda e amor propio ta, cu e mindset ey mes nos no por tin miedo. Enfoca den nos mes pa asina nos siña stima nos mes y tambe siña otro hendenan con pa stima nos,” Sonensein a afirma.

Ora un mucha ta chikito, e mester siña esaki manera e ta recomenda; siña e muchanan pa ta honesto cu nan mes, siña nan pa ta nan mes y ken esaki ta pa nan, esey ta algo cu mester traha cune na scol pero na cas tambe. Pero si e mayor tambe ta sufri di esey, e ta bira hopi dificil pa siña e mucha for di chikito ken e ta y cu e no tin cu adapta su mes na con otronan ta bisti, papia y haci manera otro hende sa haci pa asina ey no haya un rechaso.

“Nos mester tin mas tolerancia unda esaki por tin efectonan negativo cu por evita te cierto punto si nos tin hopi mas amor propio, si nos ta mas honesto cu nos mes y cu otro hende y siña nan respeta nos y stima nos,” el a bisa.

Cada hende tin un salud mental, pero Sonensein ta indica cu e custumber ta cu si ta papia di salud mental ta pasobra ta existi un problema y esey no ta berdad. Cada hende tin un curpa, mente y salud mental, pero esey ta diferente si e persona ta sufri di un problema di salud mental manera depresion, un problema psikiatrico of di ansiedad, loke ta pasando hopi na Aruba, pero “hende ta scondi’e. Nan ta sconde tras di mascaradanan pa evita di bira victima di bullying of di perde nan trabou, pa evita di mustra vulnerabel. Si nos ta hopi mas habri pa e topico di salud mental, lo tin mas hende cu lo kier logra pero nan no sa na unda pa acudi y mi ta kere cu for di chikito, hopi biaha nos no ta ripara con e impacto ta, vooral e hende grandi pa muchanan mas hoben y esey ta crece den nan y ta bira e normal nobo. Si bo ta crece den un entorno cu tur e cos ey ta sumamente normal, dia di mañan bo no ta bay wak’e como algo abnormal y mi ta kere cu hopi famia tin hopi problema di salud mental cu ta mira esaki como normal.”

Esaki ta algo cu ta hungando un rol grandi den e muchanan debi na e presion di red media, e presion di competencia, entre otro. Den deporte awendia tin demasiado competencia cu na opinion di Sonensein, esey ta influi den e falta di amor propio y falta di autoestima.

Ora muchanan ta enfrenta nan mes cu momentonan dificil of di adversidad, nan no sa con pa handle e situacion aki. Situacion manera bullying, discriminacion di rasa of di nacionalidad, nan no sa con pa deal cu esaki y den esaki Sonensein ta indica na mayornan si nan tin amor propio pa asina inculca esaki den e muchanan y sa con pa guia e muchanan lo miho posibel pa nan sa kico e muchanan ta sinti.

For di e Center of Disease Control and Prevention di Merca (CDC), un articulo ta mustra cu na 2021 for di 7.000 hoben mucha homber, 4 di 10 tabata sinti tristo y cu nan bida no tin balor. Ademas, 5 di nan a contempla suicidio. Pa loke ta trata muchanan muhe e cifranan ta hopi mas halto.

E parti autoestima den muchanan ta surgi nan por bin cu pensamento di “mi no ta sabi suficiente” of “mi cara ta mahos.” Tur esaki ta un señal di falta di amor propio. Nan ta haya rechaso pero si nan sa e amor propio y nan sa nan balor cu nan tin, “nan sa con pa deal cu e cosnan aki di un manera hopi mas eficiente y cu self-confidence, pasobra si nos no por cultiva esaki for di chikito, e traumanan cu nos ta pasa como mucha, nos ta deal cu nan ainda ora nos ta hende grandi.” Sonensein a finalisa.