Dia cuater di maart ta conoci como Dia Mundial di Obesidad (World Obesity Day). En conexion cu e dia aki Ministerio di Salud Publico, Ministerio di Deporte, DVG y IBISA a lansa e campaña “Sa bo Number”. Durante un conferencia di prensa Minsiter di Salud Publico y Turismo, Dangui Oduber, y Hoofd di Health Promotion na DVG, Dahariana Evertsz, a elabora riba e campaña aki y e meta tras di esaki.

Evertsz a inicia splicando un poco riba kico obesidad ta y kico e consecuencianan ta. El a señala cu obesidad y su riesgonan en berdad ta afecta e estado fisico, mental y emocional di un persona. Tin tres diferente categoria di peso: peso saludabel, sobrepeso y tambe obesidad.

El a splica cu un peso saludabel ta un persona cu tin un balans entre su estatura, edad y genero. Un persona cu ta sobrepeso, tin un desbalans entre e factornan aki y un persona cu ta obeso ta un caso mas severo di sobrepeso.

Evertsz a subraya cu actualmente 80% di Aruba su populacion tin sobrepeso y 50% di e 80% aki ta cay den e categoria di obesidad. 50% di muchanan di 10 aña tambe ta sufri di sobrepeso.

El a sigui bisa cu obesidad tin hopi riesgo y den hopi caso e persona no ta nota esaki pa motibo cu e percepcion di kico ta sobrepeso of kico ta obesidad ta robes. Segun el a indica den obesidad no por pone solamente un tipo di causa ya cu tin diferente factornan cu por afecta esaki. Por ehempel e por ta algo di famia, e habito di come malo of no ta suficiente, no ta activo. El inclui tambe e ambiente alrededor di e persona, kico tin como cuminda alrededor na cas y trabou y nan ta wak e factor economico tambe, si e persona tin e posibilidad di cumpra cosnan saludabel.

Manera ta conoci obesidad tin consecuencianan hopi malo pa salud di un persona. E por causa diabetes, colesterol halto, presion halto, locual por pone e persona na riesgo pa sufri di un stroke, un ataca di curason of por hasta bira pashent di dialyse.

“Pa e motibo aki nos a bin cu e campaña ‘Sa bo Number’. Nos kier enfatisa na comunidad pa tuma e iniciativa y responsabilidad social di midi nos cintura regularmente na cas E campaña aki ta netamente e comienso di hopi mas, nos lo bay traha hunto cu organisacionnan den nos comunidad pa duna informacion y instruccion di con pa trece cambio saludabel y un habito nobo y miho calidad di bida tambe”, Evertsz a indica.

DVG conhuntamente cu IBISA a traha un video unda lo tin informacion basico di con ta tuma midi di cintura y kico ta e limite pa hende muhe y hende homber.

Minister Oduber a remarca cu e ultimo dos añanan aki cada persona a bira mas consciente di nan salud pa motibo tambe di e pandemia y hopi a atende cu nan salud den diferente manera, comiendo mas saludabel y haciendo mas movecion pa hisa nan inmunidad.

“P’esey awe nos ta haya importante pa nos par keto tambe y reflexiona riba tur esunnan cu tin problema cu obesidad con nos por yuda nan y guia nan pa mehora na propio salud. P’esey conhuntamente cu Ministerio di Deporte, IBISA y Departamento di Salud Publico a pensa riba e campaña “Sa bo Number” cu ta un cooperacion entre dos ministerio y dos departamento pa asina nos ciudadanonan sa nan number”, el a señala.

Minister a splica cu e campaña “Sa bo Number” nan kiermen cu cada persona mester por sa si nan peso ta bon, si nan ta sobrepeso of nan tin problema cu obesidad. El a menciona cu durante luna di maart nan lo pone enfoke special pa prevencion den salud y muy specialmente enfoca riba e problematica di obesidad.

En conexion cu e campaña aki DVG a lansa su website y riba e website lo tin un BMI (Body Mass Index) calculator. Cu e calculator aki cada persona por calcula pa nan mes, abase di nan estatura y nan peso si nan peso ta bon, si nan ta sobrepeso of nan ta obeso.

Minister a subraya cu e indicador aki ta hopi importante pasobra cada persona riba nan mes por cuminsa tuma accion pa mehora nan propio salud. “P’esey nos kier lansa e campaña aki pa asina nos por concientisa comunidad riba e importancia pa cuida bo mes”, el a agrega.

El a remarca tambe cu Ministerio di Salud mes a lansa un Plan Nacional di Prevencion conhuntamente cu tur stakeholders na Aruba y hunto cu Organisacion Panamericano di Salud (PAHO). Segun el a splica parti di e plan nacional aki ta e campaña “Sa bo Number”, pero tambe el a menciona cu nan a anuncia caba cu nan kier bin cu un clinica pa yuda e personanan cu tin problema cu peso y muy specialmente personanan cu tin problema cu obesidad.

“Nos ta trahando hopi duro riba e centro aki y nos lo kier yama e centro aki Aruba Healthy Lifestyle Center. Den e proximo simannan nos ta bay duna mas informacion y contenido kico ta e tareanan specifico di e centro aki pa yuda e personanan cu tin problema cu obesidad, guianan pa hiba un bida mas saludabel, guianan pa come mas saludabel, guianan pa participa activamente na actividadnan di movecion y esaki sigur nos ta bay haci conhuntamente cu Ministerio di Deporte”, Minister Oduber a enfatisa.

El a indica cu esaki lo contribui pa tin un comunidad mas saludabel, pa baha e mortalidad y asina tene cuenta tambe cu e gastonan di AZV. El a menciona cu pa motibo di tin un comunidad cu no ta asina saludabel, pa motibo di un dobel vergrijzing, e gastonan di AZV lo bay aumenta drasticamente si no dedica atencion riba prevencion.

Minister a señala cu e plan nacional di prevencion aki lo cuminsa inverti tambe den prevencion. Segun el sigui splica, actualmente tin un seguro obligatorio na aeropuerto, cual a wordo introduci na juli 2020 ora cu a habri e fronteranan back. Aworaki cu e fin di e pandemia ta yegando, segun el a indica, ta bay elimina e seguro obligatorio y ta bay introduci un tipo di ‘zorgheffing’.

E meta ta pa e entradanan di e heffing aki lo wordo destina pa amplia e capacidad di ICU conforme e exit strategy di gobierno y tambe haya fondonan pa inverti den prevencion. “Nos ta consciente cu si nos kier percura pa tin resultadonan concreto den prevencion, lo mester tin inversionnan tambe mara na esaki y por medio di e heffing cu nos ta bay introduci reemplasando e seguro obligatorio, nos ta kere nos ta bay tin fondonan disponibel pa asina inverti den por ehempel e centro di obesidad y tur e otro proyectonan cu ta forma parti di nos plan nacional di prevencion”, el a enfatisa.