Standard & Poor’s a caba di mehora e ‘outlook’ (perspectiva) di Aruba su rating, cu a cambia di ‘stable’ pa ‘positive’. E rating mes ta keda na BBB+/A-, manera cu e ta desde e downgrading di A+/A-2 cu Aruba tabatin prome cu 2013. Cu esaki, e rating mes a keda na BBB+/A-. Ta menciona e posibel reapertura di e refineria como factor positivo, pero Standard & Poor’s tambe a expresa su duda encuanto e capacidad financiero di CITGO pa ehecuta e proyecto den e plaso proponi. E rapport ta bisa textualmente:” Nos ta kere cu e posibilidad cu CITGO haya su mes hinca den un potencial bancarota di Petróleos de Venezuela S.A. (PDVSA; Venezuela su compania propiedad estatal) chikito, pero e compania su profiel di riesgo halto di debe por limita su capacidad di haci uzo di capital. Ademas, nos no por descarta e posibilidad di PDVSA bendiendo su propiedadnan den exterior, cu por inclui CITGO, pa genera fondo den divisa adicional pa por haci pago riba su debe externo. Esaki por resulta den un retraso significante di e reapertura planea, y ta e motibo principal cu nos no ta inclui e operacion aki den nos ‘base-case forecast’.
Cu esaki S&P ta bisa anto cu eventual beneficio economico di e rehabilitacion y operacion di refineria no ta inclui den su proyeccionnan economico pa Aruba. Asina ta yega na un calculo di crecemento di GDP modera di 2% pa 2016 – 2018. Esaki a base di un crecemento modera di turismo, un averahe stabiel di placa gasta pa turista, y ehecucion mas rapido di obranan publico di gobierno. Ta remarca tambe cu e crecemento di GDP na 2015 (0.1%) tabata bao di nan expectativa, pa motibo di confiansa abao den sector priva, menos entrada disponibel pa consumo debi na e reforma den fondo di pension y cuido medico, tambe tardansa den ehecucion di proyectonan di infrastructura y e posponemento di e hotel di Bahía Príncipe, segun S&P e proyecto infrastructural mas grandi den planificacion.
Tambe S&P ta haci mencion di e lasonan fuerte cu Reino Hulandes, specificamente e acuerdo di 2015 cu a hiba na introduccion di un supervision financiero riba gobierno di Aruba. Esey ta aumenta e probabilidad cu Aruba su finanza lo keda riba e caminda proyecta pa yega na un presupuesto balansa y despues pa un surplus cu ta brinda perspectiva pa cuminsa reduci e debe grandi di e pais. Sin duda algun, y esey nos por mira den tur rapport di S&P, Fitch y IMF di ultimo añanan, ta e importancia cu e instancianan aki ta duna na e supervision Hulandes di Aruba su asuntonan financiero ta dunando e confiansa cu a mantene Aruba su rating na unda e ta. Pero esaki no a hiba ainda na un mehoracion di e rating mes, cu a keda na mesun nivel na cual el a cay na 2013/2014.
Riba su mes, e conclusionnan aki no ta un sorpresa y no ta varia di e opinion di Fitch cu a publica su evaluacion recientemente. Loke ta remarcabel cu S&P ta confirma e inkietud cu Bon Dia a publica na mas cu un ocasion y esey ta cu estado financiero di Venezuela, PDVSA y CITGO mes por tira un luz diferente riba e asunto, tumando na cuenta e optimismo desmenti di gobierno, cu aparentemente ta mira solamente e banda positivo. No ta necesario solamente pa contempla e riesgonan aki pa loke ta nan efecto riba economia; e capital cu no keda inverti na tempo, e empleo cu no ta keda genera, etc. E ta tambe e riesgo cu dado momento ta bay tuma ‘short cut’ y por ehemplo start e refineria sin cu e gas natural ta disponibel, pa yega mas rapido posibel na opera e planta pa por gana placa. Claro cu awor ningun hende ta bay comenta esey, pero mas dilanti ora problemanan di retraso cuminsa ‘pile up’, un cierto pragmatismo lo bin aden. Kico esey lo significa pa San Nicolas? Cu atrobe, a pesar di tur e promesanan, e luga ta caba na e mesun problemanan ambiental cu tabatin den pasado y na cual ningun hende cu sano huicio kier bolbe.
Aparte di tur esaki, Venezuela ta para na porta di un collapse economico total, cu consecuencia no previsible, y talbes sin precedente. Ta den e contexto aki na e momento aki gobierno di Aruba ta forsando pa yega na un acuerdo cu e regimen di Nicolás Maduro encuanto e proyecto aki. Cera e acuerdo ta factibel, claro, pero manera nan ta bisa na Hulandes:”het papier is geduldig”. Pone cos riba papel ta un hazaña caba, corda e ehecucion den e coyuntura actual cu Venezuela ta pasando aden. Pa loke ta e refineria mes, na nos opinion ta keda dos problema grandi: e factibilidad tecnico di rehabilitacion y e factibilidad pa financia esaki. Den e ultimo aspecto aki, e rapport aki di Standard & Poor’s ta conta algo otro cu loke gobierno kier haci nos kere. Manera semper, ‘time will tell’ te unda e proyecto aki lo yega.
