Den un entrevista cu Bon Dia Aruba, Ryçond Santos do Nascimento a sigura cu ta bay participa den eleccion aworaki cu su partido cristian democrata Lucha Pa Reforma (LPR) cual a keda institui na juli di aña pasa ora a pasa un proceso y su registracion a keda cla.
El a splica cu nan tin un ekipo cu varios candidato aunke esaki a bay di un forma basta silencioso segun e ta conta, pa motibo cu den caso aki “mester actua cu strategia tambe y no ta tur prensa ta gusta lo cual mi ta skirbi, p’esey nos a traha cu basta cautela y aworaki nos por bisa cu nos tin candidatonan, programa di partido, mensahe y nos ta diferente cu e otro partidonan,” el a sigura.
Den su opinion, partidonan di oposicion actual tin un influencia riba nan y nan ta trahando den conhunto, esey ta haci cu no por haci un diferencia entre por ehemplo, Accion21, Futuro y MAS “tur tres ta mesun style, mesun pensamento y no tin diferencia,” e ta sigura.
Su preocupacion ta cu e tres partido aki “no tin ni un interes pa adresa e problema structural di e pais y e manera cu por wak ta hopi cla, ta cu a nan no kier papia di e problema di AVP tampoco, nan kier papia di gobierno actual. Pero gobierno actual ta parti di nos gobernacion pero si bo kier problemanan structural bo mester wak e pais desde 1986 y awor bo tin un otro cuadro pa bo busca con e pais aki a ser goberna.”
Ta conoci cu Do Nascimento ta ser cuestiona den algun media local por medio di diferente declaracion cu el a bin haciendo, como por ehemplo, cu un persona condena pa corupcion “no ta algo normal, no ta aceptabel y no ta cos pa celebra.” Ademas, el a defende minister di Finanzas, Xiomara Maduro contra atakenan di partidonan di oposicion, algo e ta sigura cu “Problemanan financiero di awe a ser crea desde 1986. P’esey e KB na 2015. Xiomara a logra catch up cu atrasonan crea durante 30 aña, logrando loke ningun minister di finansa a logra: entrega di tres presupuesto consecutivo na tempo y tur tres cu surplus. Esey ta haci reduccion structural di nos debe nacional posibel.”
Debi na su opinion, el a ser cuestiona y hasta señala cu e ta bay forma parti di partido MEP “pero esey ta atakenan di Patrick Paskel y Speed Andrade contra mi persona pero e punto ta cu ora nos ta wak e pais na e punto aki, cu nos mester wak for di un perspectiva na largo plaso pa asina ey por reconoce cu e pais no ta bay bon den area di Finanzas publico y e no tabata bay bon riba area di integridad, hopi corupcion.”
Den esaki, tin e intervencion di Hulanda na 2015 “y e tin un impacto grandi pasobra for di e momento ey nos tin supervision financiero, na 2017 a haya cambio di gobernacion y esey tambe tabatin impacto positivo pasobra den gobernacion nobo bo ta pone finanzas publico como algo importante y a pone bon gobernacion combati corupcion tambe,” e ta señala.
Ora pandemia di Covid-19 a dal Aruba, Hulanda a bin cu exigencianan extra den e Landspakket lo cual ta exigi reformanan “ora bo ta wak tur esfuersonan aki cu a ser haci for di 2015 pa awor, bo ta cuminsa wak e frutonan, tres presupuesto entrega na tempo cu a ser entrega tambe cu surplus, bo ta wak cu parlamento di Aruba a haya hopi mas informacion cu ever por a haya den historia di pais aki. Analisando esey, bo ta wak e trabou estrecho cu tin pa reeforsa nos sistema hudicial, ekipa Ministerio Publico, pasobra bo ta wak mas caso pasobra Ministerio Publico ta mas ekipa aworaki,” Do Nascimento a bisa. Pero esaki ta un trabou cu mester continua segun loke e ta indica.
E problema pa cierto periodistanan, manera e ta sigura ta cu “AVP no ta den e posicion pa haci nada ni riba parti di Finanzas publico ni riba parti di combati corupcion, pasobra nan a demostra cu nan ta hopi willing pa critica y ataca tur corupcion cu tin di haber contra partido MEP pero ora ta pasa un corupcion den cas, e partido ta keda keda. E ora bo no ta serio pa ataca corupcion.”
Lo cual Aruba mester aworaki manera e ta sigura, ta cambionan structural y no ta scucha ni un caminda pa combati corupcion unda cu awor tin un ley di Financiamento di Partido Politico y un ley di Screening di Minister.
Pero di mesun manera el a defende minister di Transporte, Ursell Arends pa loke ta trata e situacion cu taxistanan caminda Do Nascimento a expresa cu partidonan di oposicion tin un agenda y cu “a mi si ta apoya e esfuerso pa mitiga e corupcion cu a tuma luga pa motibo di poder demasiado grandi pa ministernan, esey ta conta pa un minister cu tin Transporte den su cartera, pero bo ta wak cu e mesun origen di soborno y corupcion den caso di Benny Sevinger y den e caso di Paul Croes.”
Pa loke ta trata su puntonan principal pa su plan di campaña, el a bisa cu maneho di medio ambiente y maneho di desperdicio mester di un solucion lo cual ta nifica cu mester di un ley pa regla lo cual ta maneho di medio ambiente unda por acapara polucion di aire, awa y tera.
Banda di esey, combatimento di corupcion unda mester enfoca riba e poder di e ministernan “pasobra den pasado tabatin yen ex-minister cu tin un boca grandi tocante integridad y combati corupcion, manera Otmar Oduber y Marisol Tromp pero un di e problemanan ta cu ora e ministernan tin poder demasiado grandi, eynan e corupcion ta tuma luga.”
Papiando di su candidatonan cu lo subi su lista, Do Nascimento a informa cu tin candidatonan riba e parti preventivo, cu un plan di accion riba salud. “pero esnan cu kier sa mas di nos, semper keda pendiente kico nos ta papia di dje, caminda den un flyer nos a enumera e principionan basico di e partido, despues di entregamento di lista nos lo public e programa di partido Lucha pa Reforma.”
