Den marco di e desaroyonan politico recien den regionnan cu tin lasonan estrecho cu Aruba, manera e victoria abrumante – y pa algun persona sorprendente – di Geert Wilders na Hulanda y di Javier Milei na Argentina, Bon Dia Aruba a combersa cu parlamentario independiente y fundador di partido politico Lucha pa Reforma, Ryçond Santos do Nascimento, kende ta considera cu un resultado asina por tambe sucede na Aruba proximo eleccion.

Por nota cu na diferente pais na Latino America y Europa tin un cambio unda e votadornan a tuma un birada hopi radical pa forsa un cambio den politica tradicional. Y maske talbes no tabata precisamente den e direccion den cual e votadornan kier a bay, nan a considera nan voto como e unico manera posible pa kibra cu e status quo den gobernacion. Bon Dia Aruba a puntra Santos do Nascimento si e ola aki lo por toca Aruba y nos por spera un cambio radical den un siguiente eleccion, faboreciendo partidonan no tradicional?

“Si bo ta wak mundialmente tin tendencia – y nos no sa ainda si ta juist cu e hende a vota pasobra nan ta, por ehemplo den e caso aki pa un Geert Wilders na Hulanda, of si ta un voto di protesta, ‘nos ta cansa cu e politica tradicional’. Y mi ta kere cu e elemento ey ta creciendo na mundo,” Santos do Nascimento a comenta.

“Bo ta wak cu politica a desaroya den cierto manera hopi liga cu medionan di comunicacion, bo ta wak e na tur caminda na mundo, unda cu ta manipula informacion, unda cu ta hunga cu sentimento di e ciudadano. Y dado momento, esaki ta cuminsa acumula. Y bo ta wak e na Latino America, na Merca mes, e fenomeno di Donald Trump. E ta un voto pasobra tur hende ta asina emociona tocante Donald Trump, of pasobra nan ta gewoon cansa di e sistema anto e ora nan kier pa un forsa pasa y kibra e sistema cu a wordo estableci durante hopi aña?” Y e mesun cos por puntra cu por ehemplo presidente di El Salvador, Nayib Bukele, of Javier Milei di Argentina.

Santos do Nascimento ta mira si cu na Aruba, eleccion tras di eleccion, pueblo a cuminsa cansa di un politica cu ta populista. “Mi no ta bisa cu tur hende a cambia, pero bo ta wak cu e grupo cu kier algo diferente ta cuminsa bira mas grandi.”

“Mi ta haya cu pueblo mester haya e informacion manera e ta, un politica cu ta educativo, un politica cu ta honesto cu e ciudadano, no un politica sentimentalista. Mi ta kere cu na Aruba, e hendenan cu ta desea algo asina, e grupo ey, ta creciendo aña tras aña.” Y e grupo aki no ta vota riba e mesun partido pasobra no ta fanatico, sino un ciudadano cu kier mira un cambio y ta busca e politico cu ta honesto, cu ta duna e informacion necesario. Por mira e influencia di e grupo aki di ciudadano cu kier un politica di informacion honesto ta cada bes mas grandi den por ehemplo e resultado di partido MAS. Ademas di bin cu informacion cu pueblo a considera importante, tambe e incidente di retiro di e tempo ey minister Marisol Lopez Tromp tabata un evidencia pa e grupo aki di con e politica tradicional no ta respeta nos propio ley y Constitucion.

“E voto di MAS ta un sorpresa pa tur hende, pero alabes e ta demostra cu tin un grupo grandi den comunidad cu ta haya cu e topico di integridad ta importante. MAS a presenta esaki na un manera hopi efectivo. Tambe nan a wak claramente con e politica tradicional kier a kit’e for di caminda, abusando di nos mesun leynan, kibrando nos mesun Constitucion – pasobra nan a pasa un mocion di desconfiansa sin cu tin quorum. Y mi ta kere esey ta un di e motibonan pakico partido MAS a haya asina tanto apoyo.”

Cambio t’ey caba

Pa Santos do Nascimento, e ola di cambio a yega Aruba caba, si tene na cuenta cu e grupo di ciudadano cu no ta votando pa partidonan tradicional ya ta mas grandi. “Si bo ta wak e grupo cu no ta votando ni riba ni berde ni geel, e grupo ey ta mas grandi cu e votadornan di berde of e votadornan di geel.”

Bon Dia Aruba a puntra si esaki lo por nifica cu den apenas un eleccion, Aruba lo por mira un cambio radical y grandi manera Hulanda of Argentina. “Mi ta kere cu si, pa dos motibo,” Santos do Nascimento a contesta. “Mi ta kere cu AVP a haci un fout hopi grandi e aña aki, cu tabatin tres momento cu e partido a demostra cu no tin compromiso cu integridad.” Esaki tabata durante e caso di Paul Croes; durante e reunion publico tocante e contract di Eddie Briesen cu Lee Tofanelli; y durante sentencia di Benny Sevinger. “E situacion aki di AVP mi ta kere ta bay tin impacto den eleccion cu ta bin. Mi no ta bisa cu e partido no tin fanatico mas, pasobra e fanatico no ta importa hechonan, pero mi ta kere cu tin hopi ciudadano consciente y cu a lanta fo’i soño y ta bisa, ‘no, e partido ta bayendo den un direccion hopi robes.’”

Pa loke ta trata e otro partido tradicional, MEP, “hasta si bo no ta bay wak e cosnan cu a bay malo, dos biaha di gobernacion tras di otro tin su desgaste cune. Kiermen naturalmente bo ta bay tin hende cu ta menos inclina pa vota MEP.” Ademas di esaki, den opinion di Santos do Nascimento, tin cada biaha mas hende di MEP mes cu tin rabia cu e partido.

“Un parti di esey ta cu un caso manera esun di Besaril ta demostra cu esun cu ta hopi cerca di e nucleo di liderazgo di MEP ta biba na grandi. Pasobra esey nos a wak literalmente – y dispensa cu mi ta bis’e asina – Besaril a drenta flaco Arubahuis y el a sali gordo for di Arubahuis. Kico el a haci? El a come na restaurant mainta, atardi y anochi.” Si ta compara e actonan di Besaril cu e negoshi cu a tuma lugar rond di Paul Croes of rond di Benny Sevinger, Santos do Nascimento no ta haya nan comparable, “pero pueblo ta mira si cu ora cu bo ta cerca di e nucleo, bo tin yen beneficio.” Anto e ta kere cu pa e motibo aki, malcontento ta creciendo entre den partido MEP.