Caso Avestrus ta un bon momento pa educa comunidad pa bira mas critico. Ryçond Santos do Nascimento a scohe pa un plataforma politico grandi pa trece cambio na nivel politico, y ta den e contexto ey mester mira su afiliacion cu AVP. Asina e doctor den Ley Constitucional a bisa Bon Dia Aruba. A acerca Santos do Nascimento despues cu a bira conoci cu personanan hopi yega na miembro di AVP, actual miembro di Parlamento y ex Minister Benny Sevinger a keda deteni pa e caso di corrupcion, Avestrus y cu Ministerio Publico ta considera cu Sevinger ta parti di e investigacion.

Su entrada den politica y den AVP como tal por ta considera controversial, pero no pa Ryçond Santos do Nascimento. Pasobra nunca el a scohe e caminda di mas facil y su trayectoria personal ta marca pa tuma decisionnan cu hopi biaha ta bay contra e fluho, sinembargo na final ta traha p’e. Y den e sentido aki e ta kere cu e caso Avestrus ta un oportunidad pa comunidad siña hopi .

Campaña den tempo di Avestrus

E caso di Avestrus lo afecta e campaña di Santos do Nascimento. Pasobra e ta sigur cu e lo haya hopi pregunta. “Pero mi ta sigur cu na final e lo ta algo bon. E hecho cu periodistanan ta haci mi e pregunta aki, e ta forsa mi pa mi drenta un area cu ta hopi delicado den comunidad. Pero netamente e ta unda mi ta sinti cu mi por duna mi aporte, pasobra mi por duna informacion y mi por educa riba e area kico e principionan di bon gobernacion y kico ta e proceso penal, e proceso administrativo.”

Dr. Santos do Nascimento a bisa cu un persona sospecha ainda e no ta culpabel y e mester pasa den un proceso. Mester compronde cu tin un proceso largo, pa proteha sospechoso y ta unicamente ora un huez imparcial dicidi cu e persona a comete cierto acto, ta haya e castigo cu ta ancra na ley. “Esaki tambe ta parti di e estado di derecho. Ora cu detene un hende ta kibra su derecho fundamental di libertad. Mester tin un motibo pisa pa tuma e paso aki y tambe e garantianan necesario. Proceso penal ta buskeda di e berdad, pa haya sa kico realmente a sosode.”

Den e sentido aki, comunidad mester realisa cu Ministerio Publico ta traha a base di ley existente, cu ta duna e espacio pa haci e trabou investigativo. “Pa un partido e ta fastioso, pero si kier cambio den comunidad ta gara tur oportunidad pa educa comunidad, pa uz’e como les. Awor aki hopi hende ta acusativo y hende defensivo, cu ta nifica cu tin hopi emocion. Pero netamente awor mester tin calmo pa analisa con e proceso ta hinca den otro, sin tuma e decision pa considera un persona culpabel of inocente.”

Rycond Santo do Nascimento ta sigui e desaroyo di e investigacion Avestrus hopi di cerca. E ta sostene e trabou di Ministerio Publico pero ta corda tur hende cu un sospechoso tin tur derecho pa un investigacion husto. “Nos tin confianza cu ta encamina e proceso den un forma profesional. E ta importante pa estado di derecho cu tin control. Esey ta sumamente necesario. Mester tin un Ministerio Publico fuerte den nos estado di derecho.

Pakico drenta politica

Ryçond Santos do Nascimento kier cambio den e forma con ta hiba politica na Aruba. “For di 2014 caba, ora mi tabata cabando cu mi proefschrift, m’a wak cu tin hopi necesidad den comunidad pa informacion, sigur riba e manera con tabata y ta goberna nos. Tin hopi espacio pa hisa calidad di politica y gobernacion na Aruba.”

El a bisa Bon Dia Aruba cu tin diferente manera pa ataca e problema. Por haci’e di afo, manera Armand Hessels ta haci cu su fundacion Deugdelijk Bestuur. “Locual ami ta convence di dje ta cu tanten cu profesionalnan no drenta tur e partidonan, profesionalnan cu tin e curashi pa uza nan stem, cu comunidad ta dispuesto pa scucha nan no ta bin cambio. Mi no ta papiando di AVP of MEP, sino tur partido. Mi deseo ta cu profesionalnan ta tuma e curashi pa subi e listanan.”

E ta admiti cu na Aruba e ta dificil pasobra normalmente un profesional no ta gusta subi riba un lista pasobra e no ta ‘leuk’. “E por pone e carera profesional na peliger unda ta habri bo mes pa atake personal cu no ta bon pa e persona como su famia. Pues tin hopi aspecto pa descurasha e profesional. Consequentemente e tin efecto pa e potencial di politica na Aruba.”

AVP y MEP tin e plataformanan pa cambio

Pero Santos do Nascimento a bisa cu e semper e tabata kier duna bek na comunidad di Aruba. Door cu mi specialisacion ta riba Constitucion y Bestuursrecht ta areanan di derecho cu tin di haber cu politica, e ta e caminda unda mi por contribui. Den mi pensamento y conviccion, e dos plataforma mas grandi ta MEP y AVP. Si kier trece cambio na Aruba, ta den un di e dos plataformanan mester laga scucha stem. Na 2017 m’a uni cu e Digna Herrera Fundacion y a esey hende a wak mi ta haci. Ma cuminza cu cursonan na Hulandes, pero despues ma haci’e na Papiamento pa e ta accesibel. na momento cu hende ta compronde con ley ta hinca den otro, con principio di bon gobernacion ta traha y kico democracia ta, y kico ta un estado di derecho, bo ta haya un pueblo mas critico, un pueblo cu ta exigi mas di su politiconan. Y mi ta hopi contento di mira con partido Raiz ta cuminza duna curso cu Luciano Milliard, Geoffrey Wever y Armand Hessels. Pues nan tin nan impacto. MEP e aña aki a funda Fundacion Formacion Politico Nelson Oduber, cu ta mustra cu tin necesidad den comunidad pa un politica diferente. Pero mester di hende pa mustra con e politica diferente ey ta. Y den esey mi ta wak con mi ta cuadra den henter e imagen. Mi no kier ta djis uno den un rij largo cu ta haci e mesun cos.”

Santos do Nascimento a bisa cu e nunca a haci algo cu ta similar na otro. For di tempo cu e tabata hoben cu no tabata sa kico kier haci cu su bida, y tabata chapi pa gana placa, te ora cu el a skirbi su proefschrift pa haya su doctorado den ley. “Mi tabata semper un poco straño. Mi ta bay contra e fluho y tin biaha hende no ta compronde locual mi ta haci. Mi ta spera cu otronan lo copia e tipo di politica diferente.

Ryçond Santos do Nascimento tin su mesun pensamento con su politica lo ta y hasta den e partido cu e ta forma parti di dje lo mester accepta su filosofia cu mester bin cambio. Tin necesidad pa cambio den AVP y tin e disponibilidad pa esey tambe.

Un mandatario tin hopi responsabilidad pa tene na regla

E politico nobo no ta laga Avestrus stroba su conviccion. Al contrario, e ta kere cu e caso Avestrus ta ilustra cu un persona cu autoridad, un mandatario tin su responsabilidad y “mester duna cuenta na Parlamento, manera tabata e caso recien di Marisol Lopez Tromp, mester duna cuenta pa maneho financiero manera tabata e caso di Minister Glenbert Croes den caso di trahadonan di WEB, y e caso di Paul Croes cu mester responsabilisa su mes dilanti di un Huez den un caso penal.” E doctor den ley ta mustra cu e ehempelnan aki ta ilustra cu poder publico ta pa beneficio di interes general y no pa beneficio personal di ningun hende. “Y ora cu bo tin e poder aki bo mester tene bo mes hopi stricto na e cuadro di ley cu ta existi y no por desvia di dje. Si a constata cu algo a sosode cu no mester ta, tin consequencia. No por scapa di consequencianan di un decision. Tur ta señal cu poder publico ta uno hopi grandi y mester trat’e como tal tambe. E ta bon pa comunidad y ta bon pa keda informa comunidad. Si na final di dia, si anda di e manera aki cu locual nos ta confronta cu n’e, henter comunidad ta bay dilanti.”