E parlamentario independiente, Ryçond Santos do Nascimento a tene un conferencia di prensa ayera mainta pa trece dilanti su preocupacion riba diferente punto. E biaha aki el a papia riba e problematica di pobresa, “tin hende ta haci como si fuera cu no tin pobresa na Aruba, pero e realidad ta cu hopi hende ta pasa den necesidad,” el a bisa.

Pa loke ta trata e necesidad, Do Nascimento a sigura cu mester analisa loke diferente partido ta papia over di esaki, por ehemplo, lider di partido AVP, Mike Eman, ken segun Do Nascimento a bisa, mita di e forsa laboral ta biba cu menos di 2,600 florin. E ora ey ta bin e pregunta cuanto hende ta biba cu salario minimo?

Tin un grupo grandi di pensionado di Gobierno cu ta cobra 70% di pension di behes pero tambe tin otro grupo, cual ta e mamanan soltero y esnan cu ta biba cu bijstand, “pero esaki ta conoci pa nos; lo cual nos no ta analisa ta kico ta pobresa. Pasobra ta haci como si fuera cu pobresa ta un cuestion di entrada, ora mi ta papia di salario minimo ta un manera di midi entrada,” el a bisa.

Pobresa ta hopi mas cu solamente entrada, e situacion di e mamanan soltero ta diferente ya cu segun Do Nascimento nan no ta haya e mesun trato cu hende homber cu ta bay banco. E capacidad pa haya acceso na financiamento ta menos pa e mamanan soltero. E ora ey por mira cu pobresa tambe ta un cuestion di acceso na financiamento.

“Ora cu nos ta bay analisa pobresa na e pais aki, nos no por wak solamente inflacion pasobra nos ta keda riba enfoke di entrada, e ora ta kere cu full e problema ta inflacion y nos ta cay den e trampa di berde cu geel. Pasobra awor AVP su mensahe ta cu e ta na beurt pa bira esun cu ta bay ta gobernando, e ora ey bo ta enfoca riba e termino cortico y bo no ta papia di kico ta e causanan di e pobresa cu tin na Aruba.”

Santos do Nascimento ta indica cu leynan ta existi pero doñonan di trabou mester percura pa su trahadonan tin un pension, banda di esun di AOV di AZV, “kiermen unda e handhaving di esey a keda? No solamente di ayera sino di 10 aña pasa. Kiermen ora bo no a haci esey, awe un pensionado ta solamente depende di un entrada di pension pero e no tin otro pension banda di esey.”

Otro tema cu cual politiconan a haci hopi propaganda ta e tema di inmigracion, cu segun Do Nascimento, a trece hopi hende pa traha den hotel y no a ser planifica di un bon manera, pues awe e hendenan aki ta haya un pension so di casi 800 florin, “pero e placa ey simplemente no ta yega y di esaki a haci asina tanto politikeria di dje, awe ta un grupo di mas o menos 8,000 pensionado cu ta haya nan mes den peliger di un pobresa extremo,” el a expresa.

Den su opinion, e pobresa cu tin na Aruba na e momentonan aki ta e resultado di e falta di maneho di largo plaso. Cu gobiernonan, no solamente esun di Gabinete Wever-Croes I y II sino di Mike Eman y di Nelson Oduber no a inverti den enseñansa. “Bay wak studiantenan cu a bay Hulanda cu slaagpercentage compara cu esun cu ta na Hulanda mes, bo ta wak con abismal e slaagpercentage ta na Hulanda. Kiermen nos supuestamente miho studiante di HAVO y MAVO ta fracasa na Hulanda; nos sistema di enseñansa ta bon? No,” el a sigura.

E problemanan aki ta persisti si ta keda mara na un politica di corto plaso, manera e ta enfatisa. Politica di corto plaso ta ora e politico ta priminti “coy kens” manera reparatietoeslag, indexering, aumenta bijstand, aumento pension di behes, pero no ta solucionnan structural pa e pais aki.

“Gobierno a desgracia bo futuro, e futuro di bo yiunan y di bo nietonan si nos no ta tuma un postura cu nos mester di maneho a largo plaso. Y un problema grandi di structura di nos politica, esun di fanatismo, di tribu, en bes di busca e berdad, lo cual bo ta busca ta e manera pa pinta den caso aki, pinta gobierno of contra partido malo y e ora bo ta lansa bo mes como salvador. Pero den e pais aki lo cual mester compronde ta cu abo mester traha bo futuro y gobierno mester haci su maximo esfuerso pa yuda abo haci miho trabou como mayor, tata of mama di famia y den e sosten ey, abo por prospera y no keda mara na e man di e politico,” Do Nascimento a comenta.

Como politico y parlamentario independiente, e solucion di su parti ta cu Aruba mester di un miho balans pa combati pobresa di un forma structural pero mester cuminsa cu educacion y enseñansa, pa motibo cu “e mucha cu ta pober awe, cu ta lanta den pobresa, mañan en bes cu e ta bay sigui studia pa haya un salario di 4,000 of 5,000 florin, e ta keda pega den mesun structura cu pueblo ta lanta aden a base di un salario minimo. Nos mester cuminsa adresa e problema di enseñansa den pais aki. Doño di trabou mester percura pa cumpli cu tur su debernan como doño di trabou, pasobra no por ta asina cu tin un cantidad grandi cu ta traha den e pais aki pero ora ta bay cu pension ta depende completamente di un pension di behes di gobierno.”

Un bes cu ta inverti structuralmente pa eleva e nivel di enseñansa den e pais aki den largo plaso ta hisa entrada di tur hende y gobierno ta resta mas placa pa e ora combati pobresa agudo, por ehemplo e 8,000 hende cu ta biba cu menos di 1,000 florin pa luna.

Na e momento ey, por bin cu programanan pa e mamanan soltero pa nan tambe haya acceso na financiamento y cosnan asina pa henter e pueblo, “e ora nos ta papia di solucionnan, pero si nos no ta papia di solucion nos ta keda depende di indexering, bijstand, reparatietoeslag, regalito na corto plaso pasobra awor cu bo mester di dje ta haci como si fuera cu inflacion ta causa pobresa y asina bo ta mantene e pueblo dependiente di bo pa garantisa bo voto den e siguiente eleccion,” el a finalisa.