Cu e programa di enfermeria mester renobacion ta un hecho. Pero cambia henter un curiculo, unda ta duna docentenan e tempo tambe pa prepara pa un programa nobo ta costa placa y no ta sosode manera ta hisa un switch di luz. Asina Director General di EPI Ryan Maduro a bisa Bon Dia Aruba.

Maduro ta desapunta pa e forma con Directiva di dr. Horacio Oduber Hospital unilateralmente a kibra e combenio pa studiantenan di enfermeria di EPI drenta den servicio, cu sosten di ex Minister di Enseñansa dr. Armando ‘Rudy’ Lampe.

E expresion di ex Minister Lampe ta extra pisa mirando cu ta e propio Minister mester a percura pa EPI por haya fondonan pa asina renoba su curiculo, entre otro e programa di enfermeria.

Dos trayecto

EPI ta brinda dos trayecto pa studiantenan gradua como enfermero general, na nivel MBO. Uno ta e trayecto BOL, cu ta e Beroepsopleiding Leertraject, cu ta un estudio basa riba teoria na scol combina cu periodonan di practica, 60 porciento di e cuater añanan ta dedica na teoria y 40 porciento na practica. Y tin e BBL, e Beroepsbegeleidends Leertraject, cu ta 70 porciento practica y 30 porciento teoria. Un studiante cu ta drenta e programa BBL ta drenta den servicio di hospital despues di dos aña na EPI pero ta sigui scol un biaha pa siman pa dos aña. Ambos trayectoria ta produci e mesun nivel di diploma, y ta inclui cu tur mester tin e minimo di competencianan. E otro programa cu ta ofrece e trayecto BBL ta e estudio di Koki Certifica.

Posicion di Rudy Lampe

Segun Ryan Maduro, tin combersacionnan andando cu HOH desde 2016 y despues na 2017 hunto cu Minister Lampe, pa motibo cu tin preocupacion cu nivel di e programa di estudio di enfermeria. HOH a bisa cu e programa di estudio di EPI ta anticua.”Esey ta berdad. E ultimo biaha cu nos a conoce un renobacion di programa tabata na 2010. Pero awor e pregunta ta, pesey mi ta lamenta e posicion di dr. Lampe. Kico e ex Minister di Enseñansa a haci pa facilitia recursonan pa EPI, cu ta un scol publico por a haci su renobacion. E ex Minister a bisa cu el a spaar 25 miyon. EPI no a haya e fondo ey pa renoba su programanan,” Maduro a bisa. “Renobacion di cada programa educativo ta costa placa. E ta cuminza na 100 mil florin pa aña, cu ta encera e salario di docentenan nobo cu ta familiar cu e programa. Mester di material di les y sala di practica. EPI ta ofrece 14 programa, pues mester inverti 1.4 miyon florin pa renobacion continuo, tur aña.”

Ademas, e costo pa cada studiante den enseñansa profesional na EPI, ta mas o menos 14 mil florin pa studiante. Esey ta encera salario, servicio y producto, tur locual mester pa por maneha un estudio profesional na nivel cu su renobacionnan continuo. “Pais Aruba ta cubri salario di docente. Pero pa producto y servicio, Pais Aruba ta paga un parti y EPI ta cobra un parti como pago pa les di scol. En total, incluyendo e contribucion di studiantenan y di Pais Aruba, e suma ta yega na 10 mil florin pa aña. Kiermen cu tur aña EPI ta keda falta 4 mil florin pa studiante pa aña. Y aki ta papia di un scol di 2000 studiante, cu ta nifica cu tur aña EPI tin un buraco di 8 miyon florin. Pues, si mester haci un escogencia pa drecha un dak di un di e edificionan cu ta den cay den otro cu ta costa 135 mil florin versus inverti den un programa nobo, no tin escogencia. Nos no por permiti dak cay riba cabez di studiantenan.”

Aruba ta corta, Hulanda ta inverti mas den enseñansa

Mientras cu ex Minister Lampe ta gaba cu el a scapa 25 miyon florin den enseñansa, Hulanda cu di mes caba ta inverti mas pa studiante cu ta permiti cu por trece renobacion continuo, awor ta bay hinca hasta mas placa den enseñansa. Esaki pa yuda studiantenan recobra tur locual a perde durante e pandemia. “Hulanda tin un Plan di Recuperacion di COVID, unda a pone 8 biyon adicional pa enseñansa. Aruba tin un plan asina? Cada institucion a keda pa su cuenta y mester y ta busca con ta sali di e buraco, pa mira con ta carga cu e retraso. No tin un plan nacional cu a bin cune.” Tanto Comision Enseñansa, Minister Lampe y Directiva nobo di HOH a haya e splicacion aki.

Y riba dje, no ta EPI ta dicidi so su por dicidi di renoba e curiculo. “Nos ta raporta pa DPS, y Direccion Enseñansa, Seccion Curiculo, Buro Examen y Inspeccion di Enseñansa tur tin pa dicidi. “ues ta depende di tur e cuadro aki aki. E ta manera un tela di haraña. Si trek un parti, tur ta bin cune. E tin di haber cu finanzas.” Y si mester renoba un programa, tin cu renoba tur. EPI ta e instituto nacional pa nivel 3 y 4 di enseñansa profesional, reconoci pa Direccion Enseñansa. Y como tal, mester tin e base nacional pa haci cualkier cambio.

Cambio continuo na Hulanda

Hulanda a cambia su sistema di enseñansa profesional for di competencianan pa e Beroeps Kwalificatie Struktuur cu awor a bira e Herziene Kwalificatie Struktuur. “ Y awor Hulanda ta na HKS 2, pero Hulanda tin e placa. Nos no por mantene e paso, pasobra nos no tin e recursonan. Y pa e ultimo 10 aña no tabatin inversion structural. Tabata haya un edificio nobo, of 100 computer. No tabata haya fondo structural pa adapta curiculo. Si mester saca docentenan for di circulacion pa nan bay dedica oranan pa prepara pa e renobacion, mester di otro docente pa duna les. Y Pais Aruba no por carga e salario ey. Ex Minister Lampe ademas a para tur overtime di docentenan, cu a manca e proceso mas ainda. Docentenan por a duna les so, y no a resta tempo pa prepara pa renobacionnan. “Pues nos no tabatin espacio pa haci e cambionan desea.”

Maduro kende a bira director general na 2018 a compronde cu e palabracion tabata na 2016/17 cu ta bin un structura di scol di ofishi (vakschool constructie), cu ta un variante di e BOL. E variante aki ta permiti un studiante sigui dos aña den e trayecto BOL y cambia pa e BBL. E lo a nifica cu e studiante ta atende dos aña di scol na EPI, ta bira empleado HOH den su di tres y ta sigui e structura BBL pa caba su nivel 4.

E prome grupo cu a drenta e programa variante aki tabata consisti di 10 studiante y e siguiente tabata 18. Pero na 2020, HOH a para e programa pa motibo di falta di fondo door di e pandemia y finalmente a par’e e aña aki. EPI a haci lo maximo pa adapta e variante BOL/BBL, pero Directiva nobo di HOH na Maart e aña aki a ataca e scol di no kier cambia. Miembronan di directiva Jacco Vroegop, dr. Jamiu Busaris, y Barth Koster, kende ta encarga cu e HOH Academy, a haya sosten di Rudy Lampe. “Pero e Minister tabata sa pakico nos no por cambia. Nos kier cambia hopi cos, pero sin recurso nos no ta logra. Tur aña tabata manda presupuesto y no ta haya aprobacion di e propio Minister,” Director General di EPI Ryan Maduro a bisa Bon Dia Aruba.