Raad voor de Rechtshandhaving a constata den un investigacion di resumen cu minister di husticia di Corsou no a sigui e conseho cu e organo a duna pa asina desaroya y publica un maneho di persigui echonan castigabel.

Ta trata di un maneho referente e persecucion (of no) di personana cu comete un (posibel) echo castigabel. Tambe desde e ultimo investigacion den 2015 no a haci nada cu e ‘fuersa di maneho’ di e ministerio di Husticia. “Esaki a conduci den pasado na e resultado cu otro organisacionan, entre nan OM, ta haya nan mes obliga di carga e rol di e ‘voortrekker, manera den e caso di e proyecto ‘tur wowo riba bo’ (un proyecto pa prevencion cu extra atencion pa miembronan familiar jong di personanan cu a haya nan mes den contacto cu husticia), segun e investigacion di resumen.

E minister, ademas, ainda no ta haci uzo di su autoridad pa asina duna un instruccion general na Ministerio Publico (OM). Den 2015 e organo aki a duna e conseho specifico pa minister uza su autoridad pa duna un instruccion ora ta trata di terminonan maximo pa terminacion di casonan.

Den e rapport actual ta estableci cu e minister no tin ningun maneho en cuanto OM, pero, asina e organo ta indica, e minister si ta duna su prioridadnan den reunionnan semanal (driehoeksoverleg) cu e partnernan di husticia y tambe den otro reunionnan. “E Conseho ta compronde cu anda cuidadosamente cu aplica e autoridad di duna instruccion ta necesario, pero nos evaluacion ta hiba nos na e conclusion cu e minister mester por defini su cuadronan general di e maneho di persecucion pa asina carga su responsabilidad ministerial. Den opinion di e Conseho, ministerio di Husticia mester formula un maneho general di persecucion.”

Entree rasonnan cu e Conseho ta conseha pa publica un maneho di persecucion, ta cu esaki lo contribui na transparencia den cuadro di persecucion di infraccionan penal, pero tambe cu esaki lo baha e (imagen di) preferencia pa persigui cierto casonan mas o menos, e Conseho ta agrega.

No ta asina leu cu no tin otro ‘checks’, mirando cu prome cu bay na persecucion un fiscal ta delibera cu secretario di parket si ta bay over na persecucion. Alabes ta bin acerca cu e fiscal ta fungi bou e fiscal mayor. Esaki sinembargo no ta saca afo cu e minister y e ministerio mester percura pa tin un sosten di parti di su maneho pa asina establece e maneho di persecucion. E minister por pidi conseho di expertonan den derecho penal, e Conseho ta indica.