Den un articulo publica den e edicion di ayera di Bon Dia Aruba nos a elabora ariba e propuesta di Raad van Advies (RvA) na Gobierno di Aruba tocante con por dividi e ministerionan di un manera mas eficiente y efectivo.

E propuesta di RvA ta consisti di limita e cantidad di ministerionan na shete. Den e articulo di ayera a presenta e propuesta di e responsabilidadnan cu lo cay bou di e ministerio di Asuntonan General y ministerio di Finanzas. Den e articulo aki lo elabora riba e otro cinco ministerionan.

Desaroyo Espacial, Vivienda y Medio Ambiente

E asuntonan cu ta responsabilidad di e ministerio di Desaroyo Espacial, Vivienda y ministerio di Desaroyo ta inclui: infrastructura; maneho di propiedad inmueble di gobierno; registracion di datonan di kadaster; inspeccion tecnico y di seguridad; desaroyo espacial; vivienda; proteccion di naturalesa; medioambiente; y supervision di e coleccion y maneho di desperdicio di cas y di negoshi.

RvA ta splica cu desaroyo espacial, infrastructura, naturalesa y medio ambiente por ser considera como parti di e entorno fisico y cu e combinacion di esakinan den un ministerio e desaroyo, establecimento y implementacion di un vision cla y sigur por wordo garantisa un miho forma den un manera integral y efectivo. Esaki, e organo ta resalta, lo beneficia e maneho y desaroyo di e entorno fisico.

Pa mesun motibo e ministerio ta carga cu e responsabilidad pa e proteccion di naturalesa y e medio ambiente.

Asuntonan Economico, Turismo y Transport

E asuntonan cu ta responsabilidad di e ministerio Asuntonan Economico, Turismo y Transport ta inclui: promocion di un desaroyo saludabel di e economia; diseño di e politica di impuesto; turismo; promove politica di desaroyo sostenibel; cooperacion pa desaroyo; recoleccion, procesamento y publicacion di datonan estadistico; politica tocante derecho di propiedad intelectual; politica di recursonan; asuntonan di huur y consumo; telecomunicacion; post; aviacion; trafico maritimo; transporte publico; agricultura, criamento di bestia y piscamento; y politica di awa, energia y petroleo.

E organo consultativo ta remarca cu turismo ta un elemento importante di e desaroyo economico di e Pais. Nan ta sigui indica cu desaroyo sostenibel tambe ta fundamental pa garantisa cu e desaroyo economico ta continua di un manera cu no ta daña e entorno natural y social.

RvA ta resalta cu un combinacion di e asuntonan di turismo y transport den un ministerio ta haci posible pa tin un vision cla y sigur pa promove e interesnan economico di e Pais. E politica di economia tambe ta inclui e politica di impuesto, ya cu impuesto ta un herment importante pa regula e economia.

Pa mesun motibo, e ministerio ta carga cu e responsabilidad pa coleccion, procesamento y publicacion di datonan estadistico cu ta fundamental pa e desaroyo di un politica economico basa riba e datonan di e sector economico.

Salud Publico, Asunto Social y Labor

E asuntonan cu ta responsabilidad di e ministerio di Salud Publico, Asunto Social y Labor ta inclui: salud publico; seguro social y nacional; asuntonan social; asuntonan di labor; salud mental; cuido contra adiccion; tratamento ortopedagogico pa hende cu tin problema den nan estudio of criansa; asuntonan di famia; centronan di bario; asuntonan di adultonan mayor, incluyendo cuido di adulto mayor; y deporte.

RvA ta remarca cu si atribui e asunto di adulto mayor na un ministerio cu ta encarga tambe cu Salud Publico y Asuntonan Social, por sigura cu e cuido di adultonan mayor no ta ser trata solamente for di un punto di bista medico. Di e forma aki por considera tambe e interes di e adultonan mayor den sociedad y tambe e consecuencia di e populacion cu ta bira mas bieu.

Ariba e tema embehecimento, e organo ta señala cu e situacion di e populacion cu ta embeheciendo lo trece presion riba gasto di cuido y fondo social den e proximo aña. Debi na cu e grupo di adulto mayor ta aumenta, e edad promedio tambe ta bay subi, cu ta trece cune e asina yama ‘dobbel embehecimento’ (dubbele vergrijzing).

RvA ta agrega cu ademas e gasto di cuido pa adultonan mayor ta generalmente mas halto, entre otro, pa motibo cu adultonan mayor tin varios malesa mas frecuentemente. Cuido di adultonan mayor tin un gran impacto riba desaroyo financiero di AZV y SVb, y mester wordo trata den combinacion cu e entidadnan aki.

Pa e tareanan complica di cuido di adultonan mayor, asuntonan di famia y tratamento ortopedagogico di persona cu ta haya su mes den situacion problematico di estudio of criansa den un ministerio solamente, por logra cu un vision unico ta na e fundeshi di esaki. Esaki mester wordo evita debi na e dificultad pa establece limitenan entre e areanan di tarea. Cierto partinan di e tareanan no wordo completa den su competencia y ta keda sin wordo ehecuta.

Husticia

E asuntonan cu ta responsabilidad di e ministerio di Husticia ta inclui: mantene orden publico; control di e frontera; weganan di suerte; y politica di inmigracion y integracion.

RvA ta remarca cu Aruba conoce actualmente un ministerio di Husticia y Asunto Social. E ministerio aki tin como responsabilidad asunto di husticia, asunto social y cuido mental. Sin kita importancia di e otro areanan di politica bou di e ministerio aki, Aruba a señala cu e areanan politico aki tin desafionan grandi di diferente tipo.

E organo ta destaca cu ta esencial pa nan haya e atencion individual cu nan merece ya cu si pone nan bao un solo ministerio tin un riesgo grandi cu nan no ta bay haya e atencion individual ey. Pa e motibo ey den e propuesta aki, RvA ta recomenda pa e politica di asunto social y cuido mental cay bou di e ministerio di Salud Publico y Asunto Social.

Enseñansa y Cultura

E asuntonan cu ta responsabilidad di e ministerio di Enseñansa y Cultura ta inclui: enseñansa; promove investigacion cientifico; innovacion; recapacitacion y formacion continuo; cuido di mucha y cuido despues di scol; bibliotecanan; cultura y monumentonan

Por ultimo, RvA ta recomenda cu na cabes di cada ministerio mester tin un secretario-general. E persona aki ta bay ta encarga cu e operacion di henter e ministerio y e ta bay tin e responsabilidad final administrativo pa e direccion di e ministerio.

E secretario-general mester ta responsabel pa coordina e preparacion di politica y e ehecucion den e ministerio. Esaki lo yuda den e aspecto di stabilidad y continuidad di e ministerionan, y lo reduci problema di inicio despues di eleccion. Despues di eleccion, ta usual cu diferente departamento y direccion ta bay na ministerionan nobo den un composicion nobo, cual ta crea un riesgo pa unidad, continuidad y consistencia di politica.