Manera ta conoci un di e cambionan cu ta inclui den e amienda, entrega pa fraccion AVP y Futuro, ta e aumento di reparatietoeslag pa pensionadonan cu 250 florin entrante 1 di mei 2025. Despues cu presidente di parlamento, Gerlien Croes, a suspende e tratamento di presupuesto pa manda e amienda pa e organonan consultativo pa conseho, Raad van Advies (RvA) a duna su conseho riba e aumento aki, y demas cambionan inclui den e amienda.

Un di e cambionan mas spera ta e aumento di reparatietoeslag pa pensionado. Esaki ta un punto cu partido AVP a enfatisa durante temporada di campaña prome cu eleccion. E suma inicial tabata 700 florin, pero segun Eman a splica pa motibo di diferente factor esey no por ta realidad na e momentonan aki.

RvA ta indica cu den e splicacion di e amienda ta bisa cu e miembronan di parlamento di e fraccionnan AVP y FUTURO ta pone enfoke riba desaroyo inclusivo di henter e pueblo Arubiano, y cu prosperidad y bienestar di tur ciudadano y hogar ta tanto e punto di partida como e meta principal.

Den e contexto aki, RvA ta indica, ta planea pa a desde 1 mei 2025 subi e reparatietoeslag pa pensionado, manera un comienso, cu 250 florin pa luna. E Conseho ta remarca cu for di e splicacion no ta cla kico e palabra ‘manera un comienso’ ta referi na dje precisamente. Segun e formulacion, e por referi tanto na e cantidad di aumento di e raparatietoeslag, como tambe na e grupo di persona cu ta beneficia for di dje, den e caso aki e pensionado.

RvA ta splica cu reparatietoeslag pa empleado cu tin derecho riba dje segun articulo 2 te cu 5 di e Ordenansa di Ley di Reparatietoeslag (AB 2010 no. 99), no ta ser aumenta. Ademas, e Conseho ta agrega, Aruba tin otro persona of hogarnan tambe, manera hende cu ta ricibi un otro tipo di beneficio cu no ta pensioen, cu ta biba bou di e nivel di subsistencia.

E Conseho ta señala cu den e caso aki e ora solamente un grupo specifico di ciudadano ta ricibi sosten financiero, locual RvA ta subraya, no ta cla con e proposicion aki ta cuadra den e bista mas amplio social-economico di e fraccionnan cu a propone e medidanan. E Conseho ta recomenda pa den e splicacion pone atencion riba esaki, den e marco di un desaroyo inclusivo pa henter e pueblo Arubiano.

RvA ta sigui splica cu articulo 6 di e Ordenansa di Ley di Reparatietoeslag ta establece ken tin derecho riba un reparatietoeslag. E articulo ta splica cu e persona aki ta e persona cu (a) ta ricibi solamente un pensioen, y (b) cu ta ricibi un pensioen y cu tin un otro ingreso cu no ta pasa di un cierto suma

Den su conseho riba e presupuesto di pais 2025, e RvA a indica caba cu, contrario na loke ta stipula den e Ordenansa di Ley di Reparatietoeslag, tur hende cu tin derecho riba AOV of AWW ta ricibi un reparatietoeslag, sin tuma den cuenta con halto nan otro ingreso ta.

Teniendo den cuenta e practica continuo aki, E Conseho ta señala cu e aumento proponi pa e reparatietoeslag ta basicamente un aumento general cu por a logra mescos cu un aumento den e pensioen mes di AOV of AWW.

RvA ta cuestiona si no tabata miho pa pensa riba un aumento di e suma di AOV/AWW mes, na lugar di un aumento di e reparatietoeslag.

E Conseho ta recorda cu anteriormente a ser indica cu e implementacion di un evaluacion di ingreso por trece un spaarmento di 10 miyon florin. E calculacion aki tabata basa riba un reparatietoeslag di 170 florin pa luna. Cu un reparatietoeslag di 450 florin pa luna, y suponiendo cu e mesun cantidad di persona cu tin derecho riba AOV/AWW ta keda mescos, RvA ta señala cu implementacion di un evaluacion di ingreso lo por trece un spaarmento di aproximadamente 26.5 miyon florin. Cu esaki, mas cu mitar di e aumento proponi pa e e reparatietoeslag por ser financia.

RvA ta ratifica su conseho pa e implementacion real di e evaluacion di ingreso, segun loke ta stipula den e Ordenansa di Ley di Reparatietoeslag.

E Conseho ta splica cu implementacion di e evaluacion di ingreso aki, den e tempo actual di digitalisacion, no mester ta complica. E ta sigui splica cu e forma di peticion cu ya ta disponibel riba e website di SVb por ser adapta na un forma digital, di manera hopi similar cu otro proceso cu SVb ya a digitalisa.

Finalmente, pa duna un bista di e importancia di e evaluacion di ingreso na nivel individual, RvA ta remarca cu e situacion actual ta tene como resultado cu tur hende cu ta bin biba na Aruba, cu tin riba 65 aña, y cu a acumula un derecho limita riba AOV den e pasado, ta ricibi automaticamente un uitbetaling (liber di impuesto) di 5.400 florin pa aña. Esaki ta pasa sin tene na cuenta si e persona tin un pensioen stranhero substancial of otro medio financiero suficiente.

Pa RvA, esaki ta demostra claramente e necesidad urgente pa implementa e evaluacion di ingreso, segun e ley cu ta vigente.

Otro cambio cu fraccionnan AVP y Futuro a presenta den e amienda ta un aumento di inversion cu 30 miyon florin den 2025.

RvA ta remarca cu no tin ningun inversion concreto cu ta contra-balansa esey, cu ta haci cu e aumento aki tin mas e caracteristica di un stelpost. Aunke e Conseho ta considera necesario pa tin mas inversion den e economia y comunidad Arubiano, e ta di opinion cu esaki no ta e manera corecto di traha.

E Conseho ta subraya cu pa por asigna fondo pa inversion, mester tin un plan di inversion elabora den base, pa asina por presupuesta y realisa inversionnan dirigi. Na mesun momento RvA ta señala cu esaki ta tambe loke e splicacion mes ta enfatisa; cu ta esencial pa gobierno por haci inversionnan dirigi y strategico.

RvA ta indica cu e mesun linea di pensamento ta ser sigui den e manera actual di traha di e comision di inversion y evaluacion (IEC) – cu ta forma pa Directie Financien y Directie di Economische Zaken, Handel en Industrie (DEZHI) – cu ta evalua e proporcionnan di inversion cu ta bin di varios ministerio.

Pa e motibo aki, e Conseho ta recomenda pa aumenta e post pa inversionnan solamente ora cu tin un plan cla cu inversionnan dirigi cu mester ser presupuesta.