Den su conseho tocante e concepto di Presupuesto Nacional 2025, Raad van Advies (RvA) ta señala cu aunke e cifranan pa aña 2025 ta positivo, e ta considera e desaroyo di gastonan di pais Aruba preocupante. E Conseho ta destaca cu gobierno mester fiha prioridadnan pa por logra un reduccion.

Relaciona cu e aspecto di finanzas publico, RvA ta indica cu pa e aña di servicio 2025, tanto e saldo di financiamento di e pais como un surplus ta ser calcula den e sector colectivo. E surplus di financiamento di e pais ta ser calcula na Afl. 137.6 miyon, cual ta ekivalente na 1.8% di e GDP. Pa e sector colectivo, e surplus di financiamento ta suma na Afl. 195.5 miyon, cual ta ekivalente na 2.6% di GDP.

E Conseho ta destaca cu aunke e cifranan pa aña 2025 ta positivo pa e finanzas publico di e pais y e norma di saldo di financiamento di 1.0% pa e sector colectivo ta ser cumpli ampliamente, manera stipula den e LAft, un comentario mester ser haci tanto pa loke ta entradanan di gobierno como gastonan di gobierno.

Pa loke ta trata entradanan di gobierno, RvA ta haci referencia na e rapport di Organisacion pa Cooperacion y Desaroyo Economico (OECD) recientemente publica titula ‘Estadistica di Entrada den Latino America y Caribe 2024’. E rapport aki ta analisa, entre otro, e desaroyo di e peso di impuesto colectivo (impuesto-pa-GDP) den varios pais Latino Americano y Caribense durante e periodo di 1990 pa 2022.

E Conseho ta splica cu e peso di belasting colectivo aki, tambe yama peso di belasting y prima, ta ser calcula door di e recibonan di belasting y primanan statutario di e sector colectivo di e pais pa e GDP di e pais ey. RvA ta indica cu a examina tambe e peso di impuesto colectivo pa Aruba pa 2022.

Figura 1 ta mustra pa 2022, e peso di impuesto colectivo di e varios paisnan den e region analisa,

Y tambe e peso di impuesto colectivo promedio pa e paisnan aki (21.5%).

Tabel 1 ta mustra e peso colectivo total relaciona cu GDP pa 2022 segun e guianan di OECD, cu un separacion segun e diferente sumanan di impuesto y primanan legal cu ta forma e gastonan colectivo total. Basa riba e cifranan aki e peso colectivo di impuesto na Aruba pa 2022 ta yega na 33.7%. Compara cu e otro paisnan den region, e peso di belasting colectivo na Aruba ta esun di mas halto.

E Conseho ta señala cu aunke e surplusnan presupuesta pa 2025 ta positivo pa finanzas di e pais y e sector colectivo, e cifranan presenta no ta mustra ki presion – den ningun di dos sentido absoluto como tampoco relativo – esakinan ta impone riba sociedad y economia Arubano. Teniendo na cuenta e inflacion halto di ultimo añanan y e caracter di competitividad di e industria di turismo, e Conseho ta puntra su mes te na ki grado – for di un punto di bista social y economico – e peso di impuesto colectivo halto aki ta responsabel.

Ademas, RvA ta señala cu ta parse cu e surplus di financiamento di e pais calcula pa 2025 no ta bin a causa di un reduccion den gastonan. E Conseho ta resalta cu e surplus di financiamento calcula di e pais pa 2025 ta Afl. 27.6 miyon menos cu e surplus di financiamento di 2024, a pesar di e hecho cu entradanan di gobierno lo subi cu Afl. 25.3 miyon.

Adicionalmente e Conseho ta remarca cu e gastonan di interes presupuesta lo baha cu Afl. 6.5 miyon compara cu 2024, siguiendo e acuerdo administrativo firma dia 4 di juni 2024 entre Aruba y Hulanda tocante finanzas publico duradero. E espacio financiero adicional lo ser parcialmente usa pa aumenta e suma di inversionnan cu Afl. 11.6 miyon.

Segun RvA e mayoria di e gastonan adicional for di 2025 ta mustra di ta destina pa e indexering structural di e salarionan di ambtenaar y ekivalente, for di empleadonan na fundacionnan di gobierno cu ta ricibi subsidio, cu e aumento aki di indexering relaciona cu e aumento den e reparatietoeslag. Ademas di e gastonan di interes solamente e articulo di costo di producto y servicio ta mustra un bahada hopi marginal.

E Conseho ta remarca cu ademas, e Cuadro Multianual 2024-2029 presenta den e concepto ta mustra cu e gastonan di gobierno – excluyendo efectonan di inflacion y gastonan di interes – despues di e aña di servicio 2025 lo no mustra un tendencia di bahada. RvA ta señala tambe cu ta impresionante cu algun articulo di gasto, manera e articulonan di gasto di subsidio, transferencia y contribucionnan y devaluacion, no ta cambia en absoluto.

RvA ta destaca cu e ultimo aki menciona ta notabel den e splicacion detaya pa servicio pa costo y tipo di recurso. E Conseho ta resalta cu aunke ta ser declara cu e splicacion detaya aki ta duna bista riba un desaroyo di varios aña, ta bisto for di splicacion detaya aki cu pa casi tur servicio of departamento pa tur articulo individual di gasto, cu excepcion di gastonan di personal, e gastonan pa añanan siguiente ta ser calcula na e mesun cantidad cu pa 2025. Esaki RvA ta subraya ta duna e impresion cu no tin un politica of vision multi-anual pa loke ta trata e gastonan (desaroyo) di e pais. E ausencia di un politica asina tin efectonan indeseabel y aumento di gasto evitabel.

Pa e motibo ey e Conseho ta considera e desaroyo di gastonan preocupante. RvA ta di opinion cu gobierno mester tuma pasonan concreto pa reduci esaki, pa ahusta e patronchinan di gasto structuralmente y integralmente pa reduci esakinan y pa haci esaki den e cifranan di presupuesto pa 2025 y siguiente añanan.

RvA ta indica cu considerando e peso colectivo di impuesto halto na Aruba, cual compara cu otro paisnan den region ta mas halto, y e presion cu esaki ta pone riba sociedad y economia, e caminda finanzas publico sano y sostenibel no ta depende completamente di desaroyo di

e recursonan. E Consheo ta agrega cu ademas, e masterplan “Repositioning our Sails” y e

Landspakket, tur dos dirigi na, entre otro, un sector publico eficiente, confiabel y decisivo, ta partinan importante di politica di gobierno na 2025.

RvA ta indica cu e desaroyo pronostica di gasto no ta indica esaki ainda, y ta señala un biaha mas cu e ta considera necesario, na fabor di finanzas di publico solido y sostenibel, cu e gastonan presupuesta ta ser analisa criticamente y prioridadnan ta ser fiha pa asina por logra un reduccion di gasto integral anual.