Recientemente Raad van Advies (RvA) a publica su conseho pa loke ta trata e presupuesto di e Tourism Product Enhancement Fund (TPEF) pa aña fiscal 2025. RvA a emiti e conseho aki dia 8 di november 2024, y a manda esaki pa Gobernador di Aruba SE Alfonso Boekhoudt como tambe minister di Asuntonan General, Innovacion, Infrastructura, Organisacion Gubernamental y Planificacion Teritorial di e tempo ey, ex prome minister Evelyn Wever-Croes.

Mester remarca cu Gabinete Wever-Croes II ta esun cu e manda pidi e conseho na RvA den luna di october 2024. Y desde e momento cu RvA a emiti y manda su conseho pa aworaki, dia di publicacion di e mesun conseho aki 8 di april 2025, Gabinete AVP-FUTURO a huramenta.

Den su conseho, RvA ta indica cu aunke e gobierno, Gabinete Wever-Croes II e momento ey, tabata di opinion cu e Ordenansa di Comptabilidad 1989 (AB 1989 no. 72) mester ser ahusta riba e punto aki, e Conseho a subraya cu basa riba e articulo 40, segundo paragraf, y articulo 3, segundo paragraf, di mes ordenansa, ta obligatorio pa inclui un reseña specifico di e debenan y cobransanan den e splicacion.

RvA a constata cu e reseña aki tabata falta, un biaha mas y a recomenda pa por lo menos duna splicacion tocante e grado na cual e Tourism Product Enhancement Fund (TPEF) tin debe y cobransanan.

Den e splicacion ta indica cu e fondo di TPEF ta ser financia pa e doñonan di timeshare. RvA ta señala cu e entrada na vigor di e Ordenansa Nacional di Plan di Impuesto 2023 esaki no ta e caso mas. E Conseho ta splica cu for di 1 di januari 2023, 2.2% di e totalidad di impuesto di turista ricibi – sin importa si e ta proveniente di doñonan di timeshare of no – ta ser asigna na TPEF pa cubri e gasto. Por lo tanto RvA a recomenda pa ahusta e splicacion riba e punto aki.

Tocante e financiamento di e inversionnan, of sea e gastonan di capital, e Conseho ta pone e pregunta con esaki ta ser regula tecnicamente. RvA ta splica cu parce cu for di un banda e totalidad di medio disponibel ta suma na Afl. 3.8 miyon, y cu e exceso den operacion entre gasto y ingreso ta sirbi como cubrimento pa e inversionnan cu un total di Afl. 1.8 miyon.

Di otro banda, e ley ta menciona medio disponibel cu ta inclui tanto ingreso normal como ingreso di capital, hunto Afl. 5.6 miyon, y den e splicacion ta referi na “bijdrage kostenbegroting” como fuente na banda di medio financiero, cu hunto tambe ta yega na Afl. 5.6 miyon). Esaki, RvA ta señala, ta crea confusion tocante e cubrimento di e gastonan di capital. P’esey, e Conseho a recomenda pa duna un splicacion adicional tocante e manera tecnico di cubri e gastonan di capital.

Den su anterior consehonan, RvA varios biaha a pidi atencion pa preveni fraccion y doblamento di tarea y responsabilidadnan den e aparato gubernamental, pa clarifica te ki punto trabounan di mantencion y limpiesa ta keda den e definicion di “mehoracion” (“enhancement”) di e producto turistico, y con e politica di TPEF ta relaciona cu e vision a largo plaso di gobierno riba e calidad di e producto turistico.

RvA a subraya cu nan ta haya cu e ordenansa nacional actual y su splicacion no ta cla riba e puntonan menciona. Combina cu e amplio interpretacion cu e gobierno a indica den su politica, e Conseho ta enfatisa cu e falta di un definicion cla y explicito den ley tocante e obhetivo y criterionan di contenido ta causa cu pa Parlamento di Aruba e no ta cla riba kico nan ta votando, y cu despues lo ta dificil pa evalua si e fondo a resulta efectivo y si fondo publico a ser gasta di manera legitimo y eficiente. Esaki ta ser reforsa mas pa e hecho cu no tin cuentanan anual disponibel di e fondo. RvA a pidi atencion pa esaki un biaha mas.

Por ultimo, e Conseho ta remarca cu na margen di e memorie van toelichting (splicacion di motibonan), algun sugerencia pa mehoracion editorial a ser inclui.

Pa loke ta trata e resto di e presupuesto di TPEF, e Conseho a indica cu e por uni su opinion cu e obhetivo y contenido di e diseño di e presupuesto presenta.